¹ Podigho, apa yatukarere ghukukutu, twathinganyekire eshi ghuwa ngeshituthighare munyima muAthens pithako. ² Twa tumine Timoteghusi, minetu no murughani muyendhetu mwaNyambi mumbudhi dhodhiwa dhaKristusi, mukuna mutjokedha nokumuhengaghura kuhatera matawero ghenu, ³ podigho eshi noghofotji temba shoghatutukwe kuyinyanda yi. Namwe mwathinda mwadimuka eshi eyi yoha tutorwera. ⁴ Ghushemwa, apa twakarire nenu, twa mu tongwerire kughutho ghoruvedhe eshi tamba twakunyande makuthakuthero, no yahokoka, dyodi mwayidimuka. ⁵ No thitambo thi, apa yani karere ghukukutu, natumine podigho eshi nidimuke kuhatera matawero ghenu. Pamwe mukanore ghamuyereka, noyirughana yetu yakarire munyara-nyara. ⁶ Ene Timoteghusi gheyire kukwetu kutunderera kukwenu no ghaturetere mbudhi dhodhiwa kuhatera matawero ghenu noruhakitho rwenu. Ghana tutongwere eshi eyi mutughayara thiwana, nomudi nodirura dyokutumona dyodi tudi natwe nodirura dyokumumona. ⁷ Pamurandu ghoyi, mwatawi, mwatukuhengaghure pamatawero ghenu, kumaghukukutu no makuthakuthero ghetu. ⁸ Pano ne tuna para, ngeshi hamwimanena mwaFumu. ⁹ Apa no ne kuna kutapa matumero kwaNyambi, kuyishamberera yoyihe eyi tudi nayo kukwenu. ¹⁰ Ghuthiku no mutenya atwe kuraperera thikuma eshi twa kumumone no kureta eyi yina kupumbwa mumatawero ghenu. ¹¹ Ninge Nyambi wetu noWihetu thinda, noFumu wetu Jesusi, ghapiterere ndhira kukwenu. ¹² Ninge Fumu wetu ghamuwedherere no kukuritha ruhakitho rwenu norwahanu wahe, thika edi tuna kurughana kukwenu. ¹³ Ghatanarithe mitjima dhenu, podigho eshi dhipire mirandu mughupongoki kughutho waNyambi naWiha, kumwiyero waFumu wetu Jesusi nohakushuki wendi wahe.