¹ Karunga atantere Mosesa mumburundu yaSinayi, mumwedi wakuhova mumwaka waghuviri kutunda opo vatundire mushirongo shaEgipute. Aghamba, ² ''Renka mbunga yaIsraeli mukutikitamo paska paruvede rwakukarererapo mumwaka. ³ Mumayuva murongo namane mumwedi, pangurova, guna hepa kutikitamo paska paruvede rwakukarererapo mumwaka. Ghuna hepa kurutikitamo, kwama ndjenditito nadintje, nakulimburukwa kudimuragho nadintje odo dahamenoko.'' ⁴ Ano, Mosesa atantere mbunga yavaIsraeli mukutikitamo shipito sha paska. ⁵ Ngoli ava tikitamo paska mumwedi wakuhova, mumayuva ghamurongo namane mumwedi, pangurova, mumburundu yaSinayi. Mbunga yaIsraeli ayi limburukwa kwanavintje ovyo Karunga arawilire Mosesa aviruwane. ⁶ Ano pakalire vakafumu vamwe ovo vanyitiro marutu ghavo mukonda yamuntu wakufa. Vavo kapi vatikitiremo paska muliyuva linya. Vavo ava yendi kumeho yaMosesa naArona muliyuva lyakukufana. ⁷ Ovo vakafumu ava tantere Mosesa, ''Atwe tuna nyata mukonda yashimpu shamukafumu. Konda munke yakutughupirako mukudjamba ndjambo kwaKarunga nparuvede rwakukarererapo mumwaka mukatji kambunga yaIsraeli?'' ⁸ Mosesa ava tantere, ''Ntatererenu mukukayuva ashi Karunga nke aka raghura kuhamena kwenu.'' ⁹ Karunga atantere Mosesa. Aghamba, ¹⁰ ''Tantera mbunga yaIsraeli. Ghamba, 'Ntjeneshi umwe wenu ndi vana venu ava nyata mukonda yashimpu, ndi ana kara muruyendo rwarure, kuvhura naye shimpe kutikitamo paska kwaKarunga.' ¹¹ Mumwedi waghuviri mumayuva murongo namane pangurova, vana hepa kulya ndjwi-ghona ya paska namboroto oyo varuwana yapiro vifulito navimeno vyaghururu. ¹² Vavo nakuvhurashi kushuvapo kehe ka dogoro ngurangura, ndipo vatavaghure vifupa vyako. Vana hepa kukwama ndjenditito nadintje da paska. ¹³ Ngoli kwakehe ghuno muntu ogho ana keno ndipo kapi ana kara muruyendo, ngoli ogho ana kudiro kutikitamo paska, ogho muntu ana hepa kumughupamo mumbunga yendi mukonda kapi ana djamba ndjambo yaKarunga yavinakugwanitapo vya ruvede rwakukarererapo mumwaka. Ogho muntu ana hepa kushimba ndjo yendi. ¹⁴ Ntjeneshi muntundashirongo atungo mukatji kenu naye kutikitamo paska yaKarunga, ana hepa kutikitamo kutwara muveta da paskanakutwara mumpangera yado. Ghuna hepa kutura veta yimwe namuvantje muntundwashirongo naghumwe ogho vashampurukira mushirongo.'' ¹⁵ Muliyuva olyo nkongorondjugho yakupongoka vayidikire, liremo ali fiki nkongorondjugho yakupongoka, tende yamakuyuvho dimuragho. Ngurova liremo kalikaranga pawiru yankongorondjugho yakupongoka. ¹⁶ Lyatwikilire murupe runya. Liremo kufika nkongorondjugho nakumoneka yira mundiro kumatiku. ¹⁷ Ntjeneshi liremo ali tundupo pawiru yatende, mbunga yaIsraeli kuyungurura vayende naruyendo rwavo. Ntjeneshi liremo ali yimana, mbunga kutoma ntanda. ¹⁸ Ano mulirawiro lyaKarunga, mbunga yaIsraeli vana kona kuyenda, vana kona kutoma tende. Ntjeneshi liremo ali yimana pawiru yankongorondjugho yakupongoka, vana hepa kukara muntanda davo. ¹⁹ Ntjeneshi liremo alikarerere pankongorondjugho yakupongoka mayuva ghamangi, makura mbunga yaIsraeli yina hepa kulimburukwa kundjenditito yaKarunga nakuyendashi. ²⁰ Maruvede ghamwe liremo kukara tupu mayuva gha masheshu pankongorondjugho yakupongoka. Murupe ngoli runya, vana hepa kulimburukwa Karunga kulirawiro- vana hepa kuyungurura ntanda nakuyenda shimpe mulirawiro lyendi. ²¹ Maruvede ghamwe liremokukara muntanda kutunda ngurova dogoro ngurangura. Ntjeneshi liremo ali yeruka ngurangura, vavo kuyenda. Ntjeneshi ali twikiri mwi namatiku, nkwandi dogoro liremo lina yeruka ntani kutumba ruyendo. ²² Vikareshi liremo lina kara pankongorondjugho yakupongoka mayuva maviri, mwedi, ndi mwaka, kutwara mughure owo lina kara po, mbunga yaIsraeli vana hepa kukara muntanda davo nakuyendashi. Ngoli ntjeneshi liremo ali tuntupo, vana hepa kuyungurura nakuyenda. ²³ Vana hepa kutura ntanda mulirawiro lyaKarunga, ano vana hepa kuyenda mulirawiro lyendi. Ava limburukwa kulirawiro lyaKarunga olyo vatapire mwaMosesa.