¹ Karunga atantere Mosesa naArona. Aghamba, ² ''Wapayika livaruro paveta lyavana va vakafumu vaKohati muvaLevite, mumara ghavo na mumapata. ³ Wapayika vakafumu navantje ovo va karo namwaka dimurongo ntatu dogoro dimurongo ntano. Ovano vakafumu vakakupakerere nambunga yaukareli mutende yavigongi. ⁴ Vana vaKohati vana hepa kukeverera vininke vyakupongokerera ovyo vahangwira me mutende yavigongi. ⁵ Ntjeneshi ntanda kuna kuyiwapayika mukushapuka, Arona navana vendi va vakafumu vana hepa kuyenda mutende, mukukakurumunako likeshe lyahanguro livango lya kupongekerera nakulivango lyakupongoka nakufika shikesha shagwanikilito likeshe lyo. ⁶ Vana hepa kufika shikesha nashipapa vashunta nawa. Vana hepa kuyarapo likeshe lya shinaliwiru pantunda. Vana hepa kutura mo ngundi dakushishimbita. ⁷ Vayarepo likeshe lyashinaliwiru pashitafura sha mboroto dakukarerera. Mpopo vana hepa kuturapo vivhani, marutugho, visha, nankinda da marova da kudwilita. Mboroto dina hepa kukarerapo ngoli opo pashitafura. ⁸ Vayarepo pantunda likeshe lyaligeha wakuvembera nakufikako shimpe nka nashipapa sha shikorama vashunta nawa. Vana hepa kuturamo ngundi dakushimbita shitafura. ⁹ Vana hepa kughupa likeshe lya shinaliwiru nakufika viyimaneno vya ramba, naramba dene, mpamo, vipana, namabwitili gha maholi gha ramba. ¹⁰ Vana hepa kutura viyimaneno rambo navininke vyako navintjemukuvifika nashipapa vashunta nawa, nakushituna mushishimbiro. ¹¹ Vana hepa kuyarapo nalikeshe lya shinaliwiru pashidjambero sha ngorodo. Vana hepa kushifika nashifikito shashipapa vashunta nawa, nakushitura pashishimbiro sha ngundi. ¹² Vana hepa kughupa virughanito vyakurughanita mulivango lyakupongoka nakuvidingira likeshe lyashinaliwiru. Vana hepa kuvifika nashipapa sha shikorama vashunta nawanakutura virughanito pashidjambero. ¹³ Vana hepa kughuyukamo mutwitwi mushidjambero nakuyarapo likeshe lyashinaugeha-wiru pashidjambero. ¹⁴ Vana hepa kutura pashishimbiro naviruwanito navintje ovyo mwaruwanitanga mukuruwana kushidjambero. Vyavyo vininke vino vipana vya mundiro, marutugha gha mpana, viharaghuva, visha, na navintje navirughanito vimwe vyakushidjambero. Vana hepa kushifika shidjambero nashipapa shashikorama vashuntanawa nakushitura mushishimbiro shangundi. ¹⁵ Ntjeneshi Arona navana vendi va vakafumu vana mana kufika vyakulivango lyakupongoka naviruwanito vyako navintje, ano ntjene ntanda ayi yendi kumeho, makura vana vaKohath vana hepa kuyashimba livango lyakupongoka. Ntjene avakwata kuviruwanito vyakupongoka, vana hepa kufa. Ovino viruwana vyavana vaKohath, mukushimba vishongaghura vyamutende yavigongi. ¹⁶ Eleazar monarume waAaron wamuruti akengere likeverero lyamaholi gharamba, manganga ghatutumikida, djambo yambuto yankepano namaghadi ghakuwava. Anomene mukukeverera nkongoro ndjugho nayintje vyakaromo, livango lyakupongoka naviruwanito vyamo." ¹⁷ Karunga aghamba kwaMosesa naAaron. Aghamba, ¹⁸ "Washa pulidira rudi rwavaKohathite lira lyavo valighupe ko muva Levite. ¹⁹ Ano viruwane vino kukwavo mposhi navo ngavaparuke kapishi ngavafe, ntjeneshi munakatika kuvininke vyakupongokerera: Aaron navana vendi va vakafumu vana hepa kungena, nakutapera kehe mukafumu virughana vyendi navitumbukira vyavo. ²⁰ Ene ngoli vaKohati nakuvurashi mukungena mo mukukenga livango lyakupongoka, nampiri kadidi ndi ngavafa.'' ²¹ Karunga atantere nka Mosesa. A ghamba, ²² ''Wapayika livaruro lyapaveta kuvana vaGerishona nka, mumapata gha vakughona vavo na mumara ghavo. ²³ Varura ovo vakaro namwaka dimurongo ntatu dogoro mwaka dimurongo ntano. Varura navantje ovo vakuvura kukupakererea nambunga yaghukareli mutende yavigongi. ²⁴ Viruwana vino vya lira lyavaGerishonite, ntjeneshi kuna kukarera navininke vya kushimba. ²⁵ Vana hepa kushimba makeshe gha kunkongoro ndjugho, tende yavigongi, vifika vyako, vifikita vya shipapa shashikorama vashunta nawa, namakeshe gha kumangeneno gha tende yavigongi. ²⁶ Vana hepa kushimba makeshe gha rugumbo, makeshe gha kundjira yalivero kulivero lya rugumbo, olyo lyakaro pepi kunkongorondjugho na pepi nashidjambero, marughodi ghako, na navintje virughanito vya viruwana vyavo. Kehe vino vyakuvhurako vino vininke, vana hepa kuviruwana. ²⁷ Arona navana vendi va vakafumu vana hepa kunegheda virughana navintje vya vana vaGerishonite, muvinke yira vyauyendero wavo, naviruwana vyavo navintje. Ghuna hepa kuvatapera navintje vitumbukira vyavo. ²⁸ Ovino viruwana vya lira lya vana vaGerishonite kutende yavigongi. Itamara mona-rume waArona wamuruti ana hepa kuvapititira muviruwana vyavo. ²⁹ Ghuna hepa kuvarura vana vaMerari kutwara mumara ghavo, kutundilira mwaka dimurongo ntatu navakughona vavo, ³⁰ kutundilira mwaka dimurongo ntatu navakughona vamwaka dimurongo ntano. Varura kehe uno ogho ana kuvhuro kukupakerera mumbunga yaghukareli mutende yavigongi. ³¹ Vino mbyo vitumbukira vyavo naviruwana vyavo navintje vya kuruwana kutende yavigongi. Vana hepa kukeverera viwapikita vya nkongorondjugho, nkambo, ngundi, navitentekero ngundi, ³² navimwe yira ngundi darugumbo rwakundurukido nkongorondjugho, vitentekero ngundi, vipandikito, namarughodi, na navintje viruwanito vyako. Tura madina ghavo mumuyaro navininke ovyo vana hepa kushimba. ³³ Ovino virughana vya lira lya Merari, ovyo vya kurughana kutende yavigongi, munda yaghumpititi wa Itamaramona-rume wa Arona wamuruti. ³⁴ Mosesa naArona navampititi vambunga ava varura vana va vaKohatite mumara gha mapata gha vakughona vavo. ³⁵ Ava varura kutunda mwaka dimurongo ntatu navakughona vamwaka dimurongo ntano. Ava varura kehe uno ogho wakuvhura kukupakerera kumbunga mukukarera mutende yavigongi. ³⁶ Ava varura 2,750 vakafumu mumara ghavo. ³⁷ Olino ndyo likukwamo lyavaKohatite ovo kavakarerango mutende yavigongi. Mosesa naArona ava varura kutwara mulirawiro lya Karunga olyo ava pire mwa Mosesa. ³⁸ Vana vaGerishoni ava vavarura mulira lyavo, mumapata ghava kughona ghavo, ³⁹ kutundilira vamwaka dimurongo dimurongo ntatu vitware kumwaka dimurongo ntano, kehe uno ogho ana kuvhuro kukupakerera kumbunga mukukarera mutende yavigongi. ⁴⁰ Vakafumu navantje ava vavarura mumara ghavo namumapata ghavakughona vavo, shivaro 2,630. ⁴¹ Mosesa naArona ava varura lira lya vana vaGerishona ovo kava karerango mutende yavigongi. Mukuviruwana vino, valimburukire ovyo ava rawilire Karunga varuwane kupitira mwa Mosesa. ⁴² Vana vaMerari avava varura mumara ghavo mumapata ghavakughona vavo, ⁴³ kutundilira vamwaka dimurongo ntatu dogoro vamwaka dimurongo ntano, kehe uno ogho ana kuvhuro kukupakerera kumbunga yaghukareli mutende yavigongi. ⁴⁴ Vakafumu navantje avava varura mumara ghavo namumapata gha kuvakughona vavo, shivaro 3,200. ⁴⁵ Olino ndyo likukwamo lya vana vaMerari ovo Mosesa naArona va varulire kutwara mulirawiro lya Karunga ogho ayiro mulighoko lya Mosesa. ⁴⁶ Ano Mosesa, Arona, navampititi vaIsraeli ava varura vaLevite navantje mumara ghavo namumapata gha vakughona vavo, ⁴⁷ kutundilira vamwaka dimurongo ntatu dogoro vamwaka dimurongo ntano. Ava varura kehe uno ogho ana kuvhuro kuruwana viruwana vya nkongorondjugho yakupongoka, na ndjegho ana kuvhuro kushimba nakukeverera vininke vya mutende yavigongi. ⁴⁸ Avava varura 8,580 vakafumu. ⁴⁹ Kulirawiro lya Karunga, Mosesa avarura kehe uno, mukutura shivaro sha kehe shiruwana sha kuruwana osho vamupire aruwane. Avarura kehe uno mukafumu kuvitumbukira vyendi vyakukushuva-shuva ovyo vamupire. Mukuviruwana vino, valimburukire ovyo ava rawilire Karunga mukuviruwana kupitira mwa Mosesa.