¹ Hompa Karunga kwa ghambire atantere Moses ashi, ² "Tantera va Israeli va vyute ruwoko ku vantu vamu shirongo sha Midiyani kwavyo varuwanine kuvo. Opo ngamumana kuruwana vino, ngava fa ngava vavhumbika kumwe na vantu vavo." ³ Makura Moses aghamba atantere vantu yino mbudi. Ghuye aghamba ashi, "Tantera vakavita vakuwapayike mukondashi Hompa Karunga kuna kuyenda atape matengeko ku shirongo sha Midiyani kwavyo varuwanine kukwetu. ⁴ Tantera dimuhoko dava Israeli nadintje kehe runo rudi rutape vakavita vakutika kuliyovi limwe tupu." ⁵ Dimuhoko murongo na mbiri dava Israeli nadintje kwatapa vakavita vakutika ku mayovi murongo na mayovi maviri, kehe muhoko kwa tapire vakavita vakutilka ku liyovi limwe tupu, ava kupakerere vayende kuvita. ⁶ Makura Moses ava tumu vayende kuvita, kehe muhoko wava Israeli kwa tapire vakavita liyovi, Pinihas mona rume wa Eliyaser wa mu pristeli kwa kalire mukatji kavo, ghuye kwa shimbire viruwanita vya kupongokavya muntembeli ntani na marumbendo ghaku shiva mposhi vita vitameke. ⁷ Vakavita vava Israeli kwa rwanine vita kumwe na vakavita va va Midiyani, yira momu tupu atantilire Hompa Karunga mukareli wendi Moses. Makura vavo ava fundu ava dipaya vakavita navantje va vaMediyani. ⁸ Ntani vavo kwa dipayire nka va Hompa vatano va va Midiyani vamadina ghano ghana kukwamoko: Evi, na Rekemu, na Zuri, na Huri ntani na Reba mbo vaHompa vayendiro kumwe na vakavita va va Mediyani. Ntani nka vavo kwa dipayire na lighonga, Balamu mona Beyori. ⁹ Vaka vita va va Israeli ava kwata vakamali na vantje va vaMediyani, na vanuke, na ngombe, na vindjwi, na vimpendje, ntani na limona lyavo na lintje. Ava vatwara mushirongo shavo. ¹⁰ Makura ava shoro matungo gha vitata na ndjugho davo kumwe na dimukunda nadintje oko vatunga va Midiyani. ¹¹ Vavo ava kwata vakamali na vanuke na vantje vavatware mu ghupika, kumwe na vikorama na limona lyavo nalintje. ¹² Vavo kwayitire vankwati, na vanuke, kumwe na limona na lintje kwa Moses, na Eliyaser wa mu pristeli ntani na kumuhoko wa va Israeli. Vavo kwa yitire navitnje vaya viture mukamba ya liyana lya va Mowaba, pepi na mukuro wa Jarodani musheli munya ya Jericho. ¹³ Makura Moses, na Eliyaser wa mu pristeli, ntani na matimbi gha va mpititi ava rupuka pandje ya kamba va kagwanekere kumwe na vakavita. ¹⁴ Moses agarapa unene kumwe na vakurona va vakavita, nava vapititili vakavita liyovi ntani nava pititili vakavita lifere, ovo vaka tundiro kuvita. ¹⁵ Moses aghamba ashi, "Mukonda munke muna shuviri vakamali vakare na monyo? ¹⁶ Kengenu, ovano vakamali mbo vashwediro va Israeli, vature ndjo kushipara sha Hompa Karunga, mukonda shi Balamu kwava tantilire varaperere kwa Karunga wa Balamu, makura Hompa Karunga atumu lihamba lidipaye vantu navantje ovo vakaliro mulivhango lya Peyori. ¹⁷ Weno, vadipayenu vano vamati navantje, ntani dipayenu vano vakamali navantje ovo vararo rumwe nava kafumu. ¹⁸ Ano ngoli ghupenu vakadona ovo vapiro kurara rumwe nava kafumu muva kware vakare vakadi venu ntani vamwe vakare varuwani venu ndi vapika venu. ¹⁹ Kukwenu namuvantje muna dipayo vano vantu ntani nanwe muna kwato marutu ghavantu vakufa muna hepa kukara pandje ya kamba ghure wa mayuva matano na maviri. Kuruku rwa mayuva matatu ntani na mayuva matano na maviri muna hepa kukukusha mukare muna kene kushipara sha Hompa Karunga. ²⁰ Ntani muna hepa kukusha mukenite vyuma vyenu navintje vya ukavita ovyo mwadwatanga vya shipapa sha vimpendje ntani navi varuwana vya vitondo." ²¹ Eliyaser wa mupristeli aghamba atantere vakavita ovo vayendiro kuvita ashi, "Odino ndo veta atapire Hompa Karunga kwa Moses: ²² Muna hepa kushora vikerekeshe navintje mumundiro vya ngorodo, na siliveli, na roto, na vikugho, na vitoromani, ntani na vipereki, ²³ kehe shino shakupira kupya kumundiro, muna hepa kushishora mushikenite na mumundiro, dogoro shikare shina kushuruka. Nkene vinapu kuvi kenita mumundiro muna hepa kuvi kushurura shimpe na mema. Ntani kuruku rwa mayuva matano na maviri, muna hepa kukusha vyuma vyenu ntani muna hepa kukusha marutu ghenu ghakare ghana kushuka. ²⁴ Nkene muna mana kuruwana vino muna kushuka ntani muna kuyenda ngoli muka ngene mukamba ya va sraeli." ²⁵ Hompa Karunga aghamba nka atantere Moses ashi, ²⁶ "Varura utjange ushwi naghuntje, na vankwati vavakamali, ntani na vimuna ovyo vaka kwata muvita. Ove Moses na mupristeli Eliyaseri ntani na matimbi nava mpititili va kehe rudi rwa va Israeli ²⁷ muna hepa ku gaununa limona pakatji likare maruha maviri. Ruha rumwe vatapere vakavita ovo vayendiro kuvita ntani ruha rwa uviri vatapere marudi naghantje ghava Israeli. ^{28 29} Kehe ghuno murume ayendo muvita a hepa kufuta mutero. Mutero muna hepa kughufuta yira weno mu vantu mafere matano kughupamo muntu umwetupu mutape mufute mutero, na ngombe mushikwavo, na vidongi, na vindjwi ntani na vimpendje. Muna hepa kupongeka lino limona na lintje mutape kwa mupristeli Eliyaseri vikare vitapa vya kwa Hompa Karunga. ³⁰ Ntani ruha rwa uviri ku ushwi wava Israeli, navo vana hepa kufuta mutero yira weno: muvantu dimurongo ntano vahepa kughupamo umwetupu vatape vafute mutero - na ngombe mushikwavo, na vidongi, na vindjwi, ntani na vimpendje. muna hepa kupongayika lino limona ngamutape kumuhoko wa va Levi vakungi va ntembeli. ³¹ Makura Moses na mu pristeli Eliyaseri ava ruwana yira momu atantilire Hompa Karunga kwa Moses. ³² Vakavita kwa kashimbire limona lya vindjwi 675 000, ³³ na ngombe 72 000, ³⁴ na vidongi 61 000, ³⁵ ntani 72 000 vakadona ovo vapiro kurara rumwe na vakafumu va mushirongo shava Midiyani. ³⁶ Vakavita ovo yayendiro muvita kwa wanine shivaro sha vindjwi 337 000, ³⁷ vavo ava tapa vindjwi 675 vikare vitapa kwa Hompa Karunga. ³⁸ Vakavita kwa wanine ngombe 36 000 makura ava tapa ngombe 72 dikare vitapa kwa Hompa Karunga. ³⁹ Vakavita kwa wanine vidongi 30 500 makura ava tapa vidongi 61 vikare vitapa kwa Hompa Karunga. ⁴⁰ Vakavita kwa wanine vakadona 16 000 ava tapa vakadona 32 kwa Hompa Karunga. Makura Moses aghupu vino vitapa vya Hompa Karunga. ⁴¹ Ghuye avi twara viyende kwa mupristeli Eliyaseri yira momu vatjanga muveta ya Moses. ⁴² Makura Moses agaununa vitapa vikare maruha maviri; vitapa vya vakavita ovo vayendiro kuvita - ⁴³ ntani ruha rwa uviri limona olyo vatapire ku vantu kwakalire Vindjwi 337 000, ⁴⁴ na ngombe 36 000, ⁴⁵ na vidongi 30 500, ⁴⁶ ntani na vakadona 16 000. ⁴⁷ Pa limona lyava Israeli, Moses kwa ghupirepo shimwe mwa kehe shivaro sha dimurongo ntano, pa ushwi wa vimuna na vantu. Ghuye atapa lino limona kurudi rwava Levi vakungi va Ntembeli ya Hompa Karunga, yira momu vatjanga mumbapira ya veta da Moses. ⁴⁸ Makura vakurona vava kavita, vapititili va vakavita liyovi ntani na vapititili vakavita lifere, ava ya kwa Moses. ⁴⁹ Vavo ava tantere Moses ashi, "Atwe vakareli voye tuna varura vakavita vetu navantje ovo twa pititiranga navantje vana gwaneke, kwato ogho ana tundopo. ⁵⁰ Atwe kuna ya tuya tape mpandu kwa Hompa, mbyo tunaya tuya tape ushwi na untje ogho twa kashimba muvita wa ngorodo, na marughodi, na linga, na makwarara, na viranda, ntani na dimunntjero, tuna viyita navintje kwa Hompa Karunga mbyo tuna kushungida lighupiropo lya ndjo detu kwavyo twa djona muvita." ⁵¹ Makura Moses na mu pristeli Eliyaseri ava tambura ngorodo na linga na vikerekeshe navintje ovyo vayitire. ⁵² Ngorodo nayintje oyo vatapire kwa Hompa Karunga - ya kutunda kuva pititili va vakavita liyovi ntani na vapititili va vakavita lifere - navintje kwa tikire kushiviha shamu kumo wa 191 kilogram. ⁵³ Ovino kapi vavi pakire kuli mona olyo vawanine vano vaka vita. Moses na mupristeli Eliyaseri ava ghupu vatambure ngorodo da vakurona va vakavita liyova na va kurona va vakavita lifere. ⁵⁴ Vavo ava vidamuna vavitware muntembeli vikare shiyivito ashi Hompa Karunga kwa vatilire va Israeli va funde vakavita va vaMidiyani.