¹ Opo avi monine Baramu ashi vina renkita Karunga atungike vaIsraeli, kapi a yendire, yira pamuruvede ghamwe, aruwana ghupure. Pavinya, anomene kumburundu. ² Akankura mantjo ghendi amono vaIsraeli mukamba, kehe vano murudi rwavo, makura mpepo ya Karunga ayiya pendi. ³ Atambura ghuporofete wendi makura a ghamba, ''Baramu mona Beori kuna kughamba, mukafumu wa mantjo ana pahuko. ⁴ Ghuye kughamba na kuyuvha nkango da Karunga. Ghuye kukenga vya kutunda kwa muna nkondo nadintje, kwagho atongamenanga namantjo gha kupahuka. ⁵ Weni uwa watende denu, Jakopo, kulivango oko mwatunga, Israeli! ⁶ Yira ndundu omo da yingipa, yira vikunino kuntere ya mukuro, yira mfughu oyo atapeka Karunga, yira sedeli kuntere ya mema. ⁷ Meme kughapita gha tunde muvindeyindeyi vyavo, ntani mbuto yavo ngayiyingipa mumema. Hompa wavo nga kara munene kupitakana Agagi, ntani hompa wavo ngava mufumadeka. ⁸ Karunga ngamu ghupamo muEgipute. Ngakara na nkondo yira nyashi. Ngalya virongo vya kumurwanita. Ngamyona vifupa vyavo. Ngavaroya na maghonga ghendi. ⁹ Nga ghombomana yira nyime, yira nyime wamukadi. Ogho wakumunyovanyova? Kehe uno amutungiko vamutungike, kehe uno amufingo vamufinge.'' ¹⁰ Ugara waBaraka ava ghutweda kwa Baramu makura ayimiki maghoko ghendi muugara. Baraka a ghamba kwa Baramu, ''Ame nakuyito ufinge vanankore vande, ngoli kenga, ghuna vatungiki rukando rutatu. ¹¹ Ntjuve weno makura ghuyende kumundi. Naghambire ame kuvhura ngani kufute, ano ngoli Karunga akughupako mukuwana kehe yino mfuto.'' ¹² Makura Baramu alimburura Baraka, ''Naghamba kuvantumi ovo wantuminine, ¹³ 'Nampindi Baraka ampire me mbara yendi yakuyura Shiliveli na ngorodo, ndi kapi nivhura kurundakanga nkango da Karunga ntani kehe vino vya udona ndi uwa, ndi kehe vino pavyo nashana kuruwana. Ame kughamba mbyovyo tupu ana ntantere Karunga ovyo nighamba.' Kapi naghamba vino kukwavo? ¹⁴ Weno, kenga, kunivyuka kuvantu vande. Ngoli pamuhovo tanko nikurondoreovyo vaya ruwana vano vantu kuvantu voye mumayuva gha kumeho.'' ¹⁵ Baramu atameke kuporofeta. Aghamba, ''Baramu mona Beori kughamba, mukafumu wamantjo gha kupahuka. ¹⁶ Ogho ngo ghuporofete waunene ogho a yuvango nkango kwa Karunga, ogho akaro naghukonentu wakunda kundagha-ndagha, wakukenga vya kutunda kwamunankondo nadintje, kwagho atongamenanga na mantjo gha kupahuka. ¹⁷ Ame kuna kumukenga, ngoli kapi ana kara pano weno. Ame kukenga papendi, ngoli kapishi pepi ana kara. Ntungwedi ngayirupuka mwa Jakopo, ngaya hanaura vampititi vaMowabu na kudjonaura vakukunenepeka navantje vakurudi Seth. ^{18 19} Makura Edomu ngalikara livango lya vaIsraeli, ngalikara livango lya vanankore vaIsraeli. VaIsraeli ngavakara na nkondo. MwaJakopo ngatunda mpititi ogho ngakaro naunankondo, ntani nga hanuravatungi va munkurumbara yavo.'' ²⁰ Makura Baramu akenge ku Amareki makura a tameke kuporofeta. A ghamba, ''Amareki kwakalire virongo vyavinene, ngoli muruhulilira ngapakara likuhanauko.'' ²¹ Makura Baramu a kenge kumeho yava Kenite nakutameka kuporofeta. A ghamba, ''Livango olyo mwatunga lya kora, ntani ntunguru yenu mumawe. ²² Mukuwedererako anwe vaKanite ngava muhanaura na mundiro opo va Assyria ngavaya mutwara muupika.'' ²³ Makura Baramu atameke kuporofeta rwa kumanita. A ghamba, ''Vakuyita udito! Are nga paruko opo Karunga ngaviruwana vino? ²⁴ Vikepa ngavitunda kulifuta lya Kittimu, ngavayarwita Assyria ntani ngavaya ghupa Eberi, ngoli vavo, mulihulilira ngavaya hanaura.'' ²⁵ Makura Baramu a shapuka a kayende. A vyuka kumundi wendi, makura Baraka nka naye aka yenda.