¹ Karunga kwatantilire Mosesa naArona. Aghamba, ² ''Oyino ndjo mpangera, veta nakumurawira: Ghambenu kuvantu vamuIsraeli ashi vavo vana hepa kuyita ngombe kadi yayigeha kapi yayitomarumwe ndipo kapi yakara nashipo, ntani kapi yashimba rumwe djoko. ³ Tapa ngombe kadi kwaEliyasara muruti. Ghuye ayiyite pandje yakamba, ano ghumwe ayi dipaghe kumeho yendi. ⁴ Eliyasara muruti ana kona kughupa ghumwe wahonde yayo na nyara yendi nakuyitjakera vikando ntambiri kwara kumeho yatende yavigongi. ⁵ Ngombe ayi shwakerere mundinda wayo- shipapa shayo, nyama yayo, nahonde yayo ntani nafwati yayo, vakona kuvishora. ⁶ Muruti ana hepa kughupa katondo kukutu kasedeli, kahisopo na kakeshe kahuki dandjwi, nakuvhukumina navintje mukashi kashishakerero. ⁷ Makura ghuye akushe vidwata vyendi nakubwatama mumema. Ano ntani avhura kuya mukamba, omo mo ana kara ghuye kuno ana nyata nange kungurova. ⁸ Ogho ana shwakerero ndema ana hepa kukusha vidwata vyendi mumema nakuyoghana mumema. Ghuye kwakara ana nyata nage ngurova. ⁹ Ghumwe ogho ana keno ana hepa kupongayika mutwitwi wamuna vyavikadi makura kavitura pandje yakamba mulivango lyakukena. Mutwitwi uno va ahepa kughutulikira vakamukunda wavaIsraeli. Ngava vhonge mutwitwi kumwe na mema ukuvaghupa kundjo, mukondashi mutwitwi wakutapa kundjo. ¹⁰ Ogho ana pongayiko mutwitwi wamuna vyavikadi ana hepa kukusha vyuma vyendi. Ghuye ngakara ana nyata nange ngurova. Oyino ngayikarererapo mpangera kuvantu vaIsraeli na kuvantundwavirongo ovo vatungo navo. ¹¹ Kehe ghuno wakukwata rutu rwa muntu wakufa nga nyata mayuva ntambiri. ¹² Muntu wangoweno an kona kukenita naghumwendi muliyuva lyauntatatu. Ano ntani ngakena. Ngoli ntjeneshi kapi ana kukukenita mwene muliyuva lyautatu, makura kapi ngakena muliyuva lyauntambiri. ¹³ Kehe uno wakukwata rutu rwa muntu wakufa, rutu rwa muntu ogho ana dohoroko, ano kapi ana kukenita mwene- ghuno muntu kunyateka livango lyakukarera Karunga. Ogho muntu vana kona kumutetako kuvaIsraeli mukondashi mema ghakunyata kapi vagha tetera pendi. Ngakara wakunyata, kunyata kwenbdi ngakukara papendi. ¹⁴ Oyino ndjo mpangera ntjene ghumwe ana fere mutende. Kehe uno ogho ana kangenomo nogho ana karomo kare mutende navantje kunyata mumayuva ntambiri. ¹⁵ Kehe shino osho vana fikura kunyata. ¹⁶ Mundjira ndjoyo, kehe uno ogho ana karo pandje wakukwata muntu ogho vana dipagha nashirwito, kehe rutu rwakufa, shifupa sha muntu wakufa, ndi mumbira- ogho muntu kunyata mayuva ntambiri. ¹⁷ Kuviruwana vino kwamuntu wakunyata: Kughupa ghumwe wamutwitwi wakutunda kundjambo yandjo makura kughuvhonga namema ghakukena mulikende. ¹⁸ Ghumwe wakukena ana hepa ngoli kughupa hisopi, kuntji yamema, makura kumwayera patende, pavininke navintje munda yatende, pavantu ovo vakaromo, ntani kehe uno ogho ana kwato shifupa, ogho vana dipagha, ogho ana fo, namubira. paliyuva lyautatu naghuntambiri, muntu wakukena ana kona mwayera muntu wakunyata. ¹⁹ Paliyuva lyauntambiri muntu wakunyata ana kona kukukenita mwene. Ghuye ana kona kukusha vyuma vyendi ntani ayowane mumema. Kungurova kukara ana kene. ²⁰ Ngoli kehe ghuno wakukara ana nyata, wakushwena kukukenita mwene- muntu ogho ngava mutetamo munkarapamwe, mukondashi ana nyateke livango lyaKarunga. Mema ghakunyata kapi vagha tetera papendi. Kukara wakunyata. ²¹ Eyino ngayikara mpangera ngayiyendo kehe vino ngavishoroko. Ogho ana tjakayero mema ghakunyata ana hepa kukusha vyuma vyendi. Wakukwata mema ghakunyata kukara ana nyata nange kungurova. ²² Kehe vino vyakukwata muntu wakunyata navyo kunyata. Muntu wakuvikwata kunyata nange kungurova.''