¹ Makura mbunga ayi shivaghana kughudito wavongoli Karunga kuna kutegherera. Karunga ava yuvhu vantu kumwe nakugarapa. Mundiro wakutunda kwaKarunga aghuvashoro nakutwera kumaruha ghakumaghuhura ghamwe gha ntanda davo. ² Makura mbunga ayi kughu Mosesa, Mosesa nko kuraperera kwaKarunga, mundiro aghudimi. ³ Livango olyo avaliruku Tabera, mukondashi mundiro waKarunga kwasholire vamwe vamumwavo. ⁴ Vantundwavirongo vamwe ava vareke kutoma ntanda kumwe navana vaIsraeli. Kwashanine ndya dadiwa dakulya. Makura mbunga yaIsraeli ayivareke kulira nakughamba, ''Are wakuvhura kutupa nyama tulye? ⁵ Tuna vhuruka ntjwi odo katulyanga maghoko-ghoko muEgipute, rupotera, katjama, lividi, nyama, nahaki. ⁶ Ngolli lihafero ndya lyetu linapu, mukondashi navintje ovyo tuna kumona ndodo mana.'' ⁷ Mana kwafanine yira mbuto ghona. Kumoneka yira ngunguma. ⁸ Mbunga ngayiyandauranga nakuyipongayika. Vavo kuvikweya ghutura, kuvitwa ghutura, kutereka mukanyungu, nakuvirughana vikuhuna. Kuvimakera kuyuvika yira maghadi gha ndjwe ghamape. ⁹ Ntjeneshi lime alighu muntanda matiku, mana nayo kuwa. ¹⁰ Mosesa ayuvhu mbunga omo yina kulira mura ghavo, nakehe ghuno muntu ana kara pamangeneno gha tende yendi. Karunga agarapa unene, mushikenga mantjo sha Mosesa ava shivana vyamapuko. ¹¹ Mosesa atantere Karunga, ''Morwa nke ghuna kuruwanitira muntu ghoye mwamudona? Morwa nke vyakudira kuhafera me? Wandenka nishimbe murongerero wavantu navantje vano. ¹² Ame ngoli navashampuruko vantu navantje vano ndi? Ndi ame navashampuruko makura ghuntantere ashi, 'Vashimpe pepi panturo yoye yira momo ashimbanga sha mukeke?' Kuvhura nivashimbe kushirongo osho waghanine kuvakughona vavo ashi ngaghuvashivapa? ¹³ Kuni oko niwana nyama yakuvapa navantje vano? Vavo kuna kulilira kumeho yande nakughamba, 'Tupe nyama tulye.' ¹⁴ Nakuvhurashi nishimbe vantu navantje vano mpentjande. Vangi unene kukwande. ¹⁵ Momo ghuna kunduwana ngoweyo, ndipaye ngoli-ntjeneshi nawana uwa mumantjo ghoye-washampulitira nimone ruhepo rwande.'' ¹⁶ Karunga atantere Mosesa, ''Ndjitire matimbi dimurongo ntambiri ghaIsraeli. Vakare vavo shiri matimbi navakamakuto vambunga. Vayite kutende yavigongi kumwe nakuyayimba nove nkoko. ¹⁷ Nganiya ghupa mpepo yimwe oyo yakaro mumoyenakuvatura. Ngava vhure kushimba mudigho wambunga kumwe nove. Nakuvhurashi kughushimba mpantjoye. ¹⁸ Katantere mbunga, 'Kupongorenu naghumwenu, mukondashi yona ngamulya nyama, oyo mwalililire naKarunga aviyuvhire. Amughamba, ''Are ngoli wakuvhura kutupa nyama tulye? Vyatuwapilireopo twakalire muEgipute.'' Ngoli Karunga kwamupa nyama, ano kumulya. ¹⁹ Anwe kapi ngamuvhura kulya nyama muliyuva limwe tupu, mayuva maviri, mayuva matano, mayuva murongo, ndipo mayuva dimurongo mbiri, ²⁰ ano ngoli ngamulya nyama mwedi naghuntje dogoro ngayiyamupitire mumayuru ghenu. Ngamuyifa-ghunye mukondashi mwashwena Karunga, ogho ana karo mukatji kenu. Amwe kwalilire kumeho yendi. Nakughamba, ''Morwa nke twatundira muEgipute?''''' ²¹ Makura Mosesa a ghamba, ''Ame ghuno navantu 600,000 parupadi, ano ghuna tanta, 'Ame nganivapa nyama ngavalye mumwedi naghuntje.' ²² Kuvhura ngoli tudipaghe vighunda vyavindjwi navighunda vyangombe mukuvakutita? ndi kuvhura tukwate ntjwi nadintje damulifuta mukuvakutita?'' ²³ Karunga atantere Mosesa, lighoko lyande lifupi ndi? Ngoli ngaghukengashi ndi kapi yina kara nkango yande mughushiri.'' ²⁴ Mosesa arupuka nakutantera mbunga nkango da Karunga. Apongeke matimbi ghambunga dimurongo ntambiri nakuvatura vakundurukide tende. ²⁵ Karunga asheghumuka mumaremo nakutantera Mosesa. Karunga aghupu mpepo yimwe oyo yakaliro mwaMosesa nakuyitura mumatimbi dimurongo ntambiri. Opo yavangenine mpepo, ava porofete, ngoli kadidi tupu kumwe nakushaya. ²⁶ Vakafumu vaviri kwakalire muntanda, vamadina Elidada naMedada. Navo mpepo ayikavangena. Madina ghavo kwaghatjindjire mulikukwamo, ngoli kapi vayendireko kutende. Nampiri ngoweyo, ava porofete muntanda. ²⁷ Mwanuke wamukafumu wamuntanda aduka nakutantera Mosesa, ''Elidada naMedada kuna kuporofeta muntanda.'' ²⁸ Joshwa mona-rume waNuni, mukwafi waMosesa, mukafumu ghumwe atogholire, atantere Mosesa, ''Muhona wande Mosesa, vashayikite.'' ²⁹ Mosesa amutantere, ''Ove mfudu vyakukwande ndi? Ame kuna shanene vantu navantje vaKarunga vakare vaporofete nakuvatura mpepo yendi mumwavo navantje!'' ³⁰ Makura Mosesa namatimbi ghaIsraeli ava vyuka kuntanda. ³¹ Makura mpepo ayi tundu kwaKarunga nakuyita mandongondongo atunde mulifuta. Agha were pepi nantanda, ruyendo rwaliyuva limwe kuruha rumwe, naruyendo rwaliyuva limwe kuruha rwakukwamako.Mandongondongo agha kundurukida kamba kutunda kubite mbiri kutunda palivhu. ³² Mbunga ayikara nashirughana shashinene mukupongeka mandongondongo naghantje muliyuva olyo, matiku naghantje naliyuva nalintje lyakukwamako. Kwato ogho apongayikiro ghamasheshu munda yandambo murongo yamandongondongo. Ava kutapere mandongondongo ntanda nayintje. ³³ Yayo nyama shimpe nda yakarera mumayegho ghavo, shimpe vavo kuna kuyitafuna, Karunga atameke kuvagarapera. ³⁴ Olyo livango kwakalire Koboroti Hatava, mukondashi kwaholikirepo vantu ovo vashinino nyama. ³⁵ Kutunda Koboroti Hatava mbunga ayi yendi kuHazeroti, oko nko vakakalire.