¹ Karunga atantere Mosesa. Aghamba, ² ''Rughana marumbendo maviri ghashiliveli. Shambura shiliveli mukugharughana. Ghuna hepa kuruwanita marumbendo mukuyita mbunga nayintje nakuyiyira mbunga yidirwite ntanda davo. ³ Varuti vana hepa kufuda marumbendo mukuyita mbunga nayintje pamwe kumeho yoye mumangeneno gha tende yavigongi. ⁴ Ntjeneshi varuti ava fudu marumbendo rumwe tupu, makura vampititi, matimbi gha lira lyaIsraeli, vana hepa kuponga kukoye. ⁵ Ntjeneshi kuna kufuda unene, dimuhoko dakarero ruha rwaupumeyuva vana hepa kutameka ruyendo. ⁶ Ntjeneshi ava fudu unene rukando rwauviri, dimuhoko dakuruha rwaucuma vana hepa kutameka ruyendo. Vana hepa kufuda unene kumaruyendo ghavo. ⁷ Ntjeneshi mbunga yinayapongo pamwe, kufuda rumbendo, ngoli kapishi unene-nene. ⁸ Vana va vakafumu vaArona, wamuruti, vana hepa kufuda marumbendo. Oyino ndjo ngayikaro ndjenditito kehepa kukwenu kuvantu vamuhoko ogho ngaghukaroko. ⁹ Ntjeneshi kuna kuyenda kuvita mushirongo shenu kuvanankore ovo vanamuvyuko vanakumurwito, makura muna hepa kufuda shiyivito namarumbendo. Ame Hompa Karunga wenu, ngani muyita mukumuvhurukita nakumupopera kuvanankore venu. ¹⁰ Shimpenka, paruvede rwaruhafo, kuturako vipito vyenu vya kehe pano na kumavarekero gha mwedi, ghuna hepa kufuda marumbendo kundjambo yakushwakerera nakundjambo yenu yambili. Ovino ngavikara momo vyashwa livhurukito lyenu kukwande, Karunga wenu. Ame Hompa Karunga wenu.'' ¹¹ Mumwaka wauviri, mumwedi wauviri, mumayuva ghadimurongo mbiri mumwedi, liremo ali yeruka po pankongorondjugho yalirawiro lyamakuyuvho. ¹² Mbunga yaIsraeli makura ayi shapuka yiyende muruyendo rwayo kutundilira mumburundu yaSinayi. Liremo ali kayimana mumburundu yaParani. ¹³ Ava tumbu ruyendo rwvo rwakuhova, kukwama mulirawiro lyaKarunga olyo atapire mwaMosesa. ¹⁴ Ntanda munda yaliremba lyavana vaJuda mbo vakuhova kuyenda, mukuyenda nambunga yavo yavakavita. Nahashoni mona-rume waAminadaba apititiri vakavita vaJuda. ¹⁵ Netali mona-rume waZuwara apititiri vamuhoko wavana vaIsasikari. ¹⁶ Eliyaba mona-rume waHeloni apititiri vakavita vamuhoko wavana vaZebuluni. ¹⁷ Vana vaGerishoni navana vaMerari, valikeverero nkongorondjugho, ava yiyungurura nkongorondjugho nakushapuka vayende. ¹⁸ Kukwame, vakavita munda yalirembe lyantanda yavaRubeni mukuyungurura nakuyenda. Elina mona-rume waShedeura apititiri vakavita vaRubeni. ¹⁹ Shelumiyeli mona-rume waZurishadayi apititiri vakavita vamuhoko wavana vaSimiyoni. ²⁰ Eliyasafa mona-rume waDeweli apititiri vakavita vamuhoko wavana vaGada. ²¹ Vakohati ava yungurura. Ava shimbi virughanito vyakupongoka vyakunkongorondjugho. Vamwe vakudika nkongorondjugho kumeho yavaKohati vayatike pantanda yakukwamako. ²² Vakavita munda yalirembe lyavana vaEfrayimu vakwameko kuyungurura. Elishama mona-rume waAmhudi aititiri vakavita vaEfrayimu. ²³ Gamayeli mona-rume waPedahazuri apititiri vakavita vamuhoko wavana vaManase. ²⁴ Abidani mona-rume waGidiyoni apititiri vakavita vamuhoko wavana vaBenjameni. ²⁵ Vakavita ovo vatulirango lirembe munda yatende ya vana vaDana vakuhulilira kuyungurura. Ahiyezera mona-rume waAmishadayi apititiri vakavita vaDana. ²⁶ Pagiyeli mona-rume waOkarani apititiri vakavita varudi rwavana vaAsheri. ²⁷ Ahira mona-rume waEnani apititiri vakavita vamuhoko wavana vaNafitali. ²⁸ Oyino ndjo ndjenditito yavakavita vambunga yavaIsraeli mukuyungurura vayende. ²⁹ Mosesa atantere Hobabu mona-rume waReweli muMidiyani. Reweli kwakalire vashe vamukada Mosesa. Mosesa atantere Hobabu nakughamba, ''Atwe kuna kuyenda kulivango oko ashingwenine Karunga. Karunga kwaghambire, 'Ame nganilimupa' Tuyende kumwe nka atwe ngatukakuruwana mwamuwa. Karunga kwaturekera mukuruwana vaIsraeli mwamuwa. ³⁰ ''Ngoli Hobabu atantere Mosesa, ''Ame kapi niyenda nanwe. Kuniyenda kushirongo shetu kuvantu vande,'' ³¹ Makura Mosesa alimburura, ''Tuna kanderere washatushuva. Ove wayiva mwakuvhura kutura ntanda mumburundu. Ghuna hepa kukara mukungi wetu. ³² Ntjeneshi ghuyende natwe, atwe ngatukakuruwanena maghuwa ghakukufana ogho ngakaturuwanena Karunga.'' ³³ Ruyendo rwavo rwakutunda kundundu yaKarunga kwakalire mayuva matatu. Shikesha sha makugwanekero sha Karunga ashiyendi kumeho yavo mayuva matatu mukukawana livango lyavo lyakupwiyumukira. ³⁴ Liremo lyaKarunga kwakalire pawiru yavo mwi vavo muruyendo. ³⁵ Kehe pano kashidirukanga shikesha, Mosesa kaghambanga, ''Rambuka, Karuga. Tjida vanankore voye. Renka ovo vakunyengo vakuyomape.'' ³⁶ Kehe pano kashiyimananga shikesha, Mosesa kaghambanga, ''Vyuka, Hompa, kughungi wavaIsraeli mayovi murongo.''