¹ Karunga atantere Mosesa, nakughamba ashi, ² ''Tantera vaIsraeli, 'Ntjeneshi muntu a djono ngoli kapishi muwina ana djono, a ruwane kehe vino araghura Karunga ashi ndi nakuviruwanashi, ntjene aruwana vininke ovyo ashweneka, ovino vyakukwamako mbyo vyakuruwana. ³ Ntjeneshi muruti kughona a djono ngoli ana tura ghu ndjoni muvantu, ana hepa kudjambera ndjo yendi oyo naraghura ntwedu ya yanuke yina piro shipo kwa Karunga ya ndjambo ya ndjo. ⁴ Ana hepa kuyita ntwedu pamangeneno gha tende ya shigongi kumeho yaKarunga, akambeke maghoko ghendi pamutwe wayo, nakudipagha ntwedu kumeho ya Karunga. ⁵ Muruti ogho vawaveka nga ghupe honde yimwe ya ntwedu nakuyitwara mutende yavigongi. ⁶ Muruti nga dove nyara muhonde na kuyimwayera rukando rutano narutatukumeho ya Karunga, kumeho yalikeshe lya kulivango lya kupongera. ⁷ Makura muruti ature honde yimwe kumaruvinga gha shidjambero ya kututumikitira vidumba vya viwa kumeho ya Karunga, ovyo vya karo mutende yavigongi, nakutera honde yakuhupako yantwedu palitako lyashidjambero sha ndjambo yakushwakerera, osho shakaro mughungeneno watende yashigongi. ⁸ Ana hepa kughupako maghadi naghantje gha ntwedu gha kare ndjambo ya ndjo, maghadi ogho afiko vininke vya munda, namaghadi naghantje gha karo kuvilyo vya munda, namaghadi naghantje ghakaro kuvilyo vya munda, ⁹ kungera mbiri na maghadi ogho gha karo ko, ogho gha karo kumaghura, maghadi gha kulishuli, na ngera- ghuna kona kuvighupako. ¹⁰ Ghuye ngaviteteko, kuvitetako nakuvighupako ku ntwedu vikare vya kudjamba ndjambo da mbili. Ovino muruti ana hepa kushwakerera vilyo vino pashidjambero sha ndjambo yakushwakerera. ¹¹ Shikova sha ntwedu na nyama yakuhupako, mutwe wako na makondo navilyo vya munda narutoko, ¹² navintje vyakuhupara kuntwedu-ghuna hepa kuvitwara navintje pandje ya kamba kulivango lyakuku kushurura kwa Karunga, oko vakavhukuminaga mutwitwi, vihupe vana hepa kuvishwakerera nkoko pavikuni. Vana hepa kuvishwakerera vihupe nkoko vakateranga mutwitwi, ¹³ Ntjeshi mbunga yavaIsraeli yina djono ndjo yakudira kupanga, na mbunga yidire kuyiva ashi vavo vana djono nakuruwana viruwana kehe vino ovyo araghura Karunga ashi nakuviruwanashi, ntjeneshi vana djono, ¹⁴ makura, oyo ndjo va varawira yinaya yuvikwa, mbunga yina hepa kudjamba na ntwedu ya yanuke morwa ndjambo ya ndjo nakuyi yita kumeho ya tende yavigongi. ¹⁵ Matimbi gha mbunga kuyakambeka maghoko ghavo pamutwe wa ntwedu kumeho ya Karunga, ntwedu ngavayidapaghe kumeho ya Karunga. ¹⁶ Muruti ogho vawaveka ana hepa kughupa honde yimwe ya ntwedu nakuyitwara kutende ya vigongi, ¹⁷ makura muruti ature nyara yendi muhonde nakuyimweyera rukando rutano naruviri kumeho yaKarunga, kumeho ya likeshe. ¹⁸ Ghuye ana hepa kutura honde yimwe kumaruvinga ya shidjambero osho sha karo kumeho ya Karunga, mwamo mo mutende ya shigongi, nakutera nka honde nayintje palitako lya shidjambero yikare ndjambo ya lishwakerero, olyo likaro mumangeneno gha tende ya shigongi. ¹⁹ Ghuna hepa kughupako maghadi nakushwakerera pashidjambero. ²⁰ Ovino ngoli ana hepa kuruwana pantwedu. Yira momo ana ruwana na ntwedu ya ndjambo ya ndjo, ovino ngoli mo ngavikara kuntwedu, ano muruti mo ngoli ngatura likukwatakano na vantu, nakuvaghupira po. ²¹ Ghuye nga shimba ntwedu pandje ya kamba nakuyishwakerera yira lishwakerero lya ntwedu yamuhovo. Oyino ndjambo yandjo kuvantu. ²² Ntjeneshi mupangeli ana djono ngoli kapi ana yiviri oyo ndjo, aruwane kehe vino araghura Karunga ashi nakuvirughanashi, ano makura adjone, ²³ makura oyo ndjo ana djono yi yivikwe kukwendi, ana hepa kukayita ndjambo yendi yashimpendje, shashirume shahana shipo. ²⁴ Ghuye ana hepa kukambeka maghoko ghendi pamutwe wa shimpendje nakushidipaghera mulivango omo vadipagheranga ndjambo yakushwakerera kumeho ya Karunga. Oyino ndjambo ya ndjo. ²⁵ Muruti aghupe honde kundjambo ya ndjo na nyara yendi na kukayitura kumaruvinga ghashidjambero sha ndjambo ya kushwakerera, nakutera honde palitako lya shidjambero kundjambo yakushwakerera. ²⁶ Ghuye nga shwakerera maghadi naghantje pashidjambero, yira momo vadjamberanga maghadi ya mbili. Muruti mo ngoli nga tura likwatakano, ano mupangeli ngava mughupirapo. ^{27 28} Ntjeneshi ghumwe mumwenu ana djono ndjo ana diri kuyivilita, aruwane kehe vino araghura Karunga nakuvimushweneka kuviruwana, ngoli aka dimburure undjoni wendi, makura oyo ndjo ana djono yi yivikwe, ana hepa kuyita shimpendje sha ndjambo yendi, shashikadi shapiro shipo, kundjo oyo ana djono. ²⁹ Ana hepa kukambe maghako ghendi pamutwe morwa ndjambo ya ndjo nakuyi dipaghera mundjambo ya ndjo kulivango lya ndjambo ya kushwakerera. ³⁰ Muruti a ghupe honde yimwe na nyara nakuyitura kumaruvings gha kushidjambero kundjambo yakushwakerera. Ana hepa nka kutera honde nayintje yakuhupako palitako lya shidjambero. ³¹ Ana hepa kugha ghupako maghadi naghantje, yira momo vaghupanga ko maghadi naghantje mukudjamba ndjambo ya mbili. Muruti nga shwakerera pashidjambero mukutura lidumba lya rupekwa kwa Karunga. Muruti mo nga tura likukwatakano namuntu ogho nakumughupira po. ³² Ntjeneshi muntu ayita shindjwi ashi yikare ndjambo ya ndjo, ana hepa kuyita ndjwi yayi kadi yapiro shipo. ³³ Ana hepa kukambeka maghoko ghendi pamutwe wa ndjwi ya ndjambo ya ndjo nakuyidipaghera kundjambo ya ndjo kulivango olyo vadipagheranga vya ndjambo dakushwakerera. ³⁴ Muruti ana hepa honde yimwe ya ndjambo ya ndjo nanyara nakutura kumaruvinga gha shidjambero sha ndjambo yakushwakerera, nakutera honde yakuhupako nayintje kulitako lya shidjambero. ³⁵ Ghuna hepa kughupako maghadi, naghantje yira maghadi gha ndjwi mukugha ghupako mukundjambera ndjambo ya mbili, ano muriti ashwakerere pashidjambero pawiru yakudjambera Karunga ndjambo oyo varuwana namundiro. Muruti makura atulitepo likukwatakano naye kundjo oyo a djona, nakumughupirapo.