¹ Karunga a ghamba kwa Mosesa ntani kwa Aroni, ashi, ² ''Ghambenu kuvantu vamuIsraeli, nakughamba kukwavo, 'Ntjene mukafumu ana kara nauvera wamashu wakudira kutunda mughurume wendi mashu ghakufana ngoli ghanyata. ³ Ghuye kapi akushuka kughuvera wamashu. Ndipo rutu rwendi omo rwayendanga namashu ndi kwarushayikita, kapi akushuka. ⁴ Kehe mbete ana kugheyamena ngayinyata ntani kehe vino ovyo ngashingira ngavi nyata. ⁵ Kehe uno nga gumo mbete yendi ana kona kukusha vyuma vyendi ntani ngayowane mumema, ntani nganyata dogoro ngurova. ⁶ Kehe ghuno ngashungiro opo ashungira mukafumu wakuvera lishushiro, muntu ogho ana hepa kukusha vyuma vyendi ntani ayoghane mwene mumema, ntani ngakara muntu wakudira kukushuka dogoro ngurova. ⁷ Kehe uno nga gumo rutu rwa muntu unya wakuvera ghuye ana kona kukusha vyuma vyendi ntani namwene a kukushe, mukondashi ghuye kwanyata ngoli dogoro ngurova. ⁸ Ogho ana nyato, ntjene afiyiri ogho ana kushuko pampo, muntu ogho akushe vikovererovyendi, namwene akukushe. Ghuye kwanyata ngoli dogoro ngurova. ⁹ Kehe shifara ndi shipundi, apa ana shingiri muntu wauvera oghu, navyo vina nyata. ¹⁰ Kehe uno ana kugumo kehe shi ogho muntu nga nyata dogoro ngurova. Kehe ghuno nga shimbo osho ana shingiri muntu wakuvera, ndje kukusha vyuma vyendi namwene akukushe; ghuye nganyata ngoli dogoro ngurova. ¹¹ Mukafumu ogho ana kuvero uvera ogho, ntjene agumu mukanguki, ghuye a hana kukusha maghoko ghendi pamuhovo, muntu wakufana ngoli ndje tupu kukusha vyuma vyendi, namwene akukushe, ghuye nga nyata ngoli dogoro ngurova. ¹² Kehe lirova eli ana kuguma mukafumu wauvera, vaghabamaure po, ano kehe shisha, eshi ana kuguma, vakukushe mumema ntani. ¹³ Muntu ntjene ana veruka kughuvera owo, a taterere mayuva ntambiri, ntani ana kona kukusha vyuma vyendi namwene akukushe mumema ghamakenu ghamurunone, makura akushuruke pampo. ¹⁴ Muliyuva lyauntantatu atware maputukuwa maviri ndipo vankuti vaviri kulivero lya nkongoro ndjugho yaKarunga kundjugho ghona yamakugwanekero: Oko nko ngoli ngakatapa vidira kwamuruti. ¹⁵ Muruti nga djambe ngoli shimwe, shikare ndjambo yandjo, ano eyi kwavo yandjambo yakushwakerera. Pankedi yaweno a rughanene ngoli ogho mukafumu ukareli wakahuro ko wapampo. ¹⁶ Ntjene mukafumu atundu honde mughukafumu wendi, ghuye kukusha rutu rwendi naruntje. Ghuye kunyata ngoli dogoro kungurova. ¹⁷ Kehe shino varughana nalikeshe ndi nashipapa, ntjene pakuhanena honde vayikushepo. Ngavi nyata dogoro ngurova. ¹⁸ Ntjene mukafumu ana rara namukamali, navantje mbo kukukusha ntani. Vavo kunyata ngoli dogoro kungurova. ¹⁹ Mukamali ntjene akara kukwedi, ghuye kunyata ngoli dogoro mayuva ntambiri, Kehe ghuno wakumuguma kunyata dogoro ngurova. ²⁰ Kehe shino ashungira ndi ararepo paruvede rwendi rwashidira nasho kunyata. ²¹ Kehe ghuna wakuguma mbete yendi ana kona kukusha vyuma vyendi namwene a yowane mumema. Ogho muntu kapi nga kushuka dogoro ngurova. ²² Kehe ghuno ngagumo ovyo ngashungira ana kona kukusha vyuma vyendi nakuyoghana mwene mumema, muntu ogho nganyata dogoro ngurova. ²³ Ngavikareshi vyavyo pambete ndi kehe kuno opo ngashungira, ntjene tupu ngayi guma, muntu ogho nganyata ngoli dogoro ngurova. ²⁴ Mukafumu ogho ana kararo namukamali ogho ana karo kushidira, makura honde yendi yimu gume nga nyata mumayuva ntambiri. Ano kehe yino mbete vana rara kunyata. ²⁵ Ntjeneshi mukamali atundu honde mayuva ghamangi ogho ana karoshi ndi kapishi ngo mayuva ghendi ghakushidira, ntjene ayi twikiri ngoli kumutunda, yikapitakane paruvede rwendi, oro akaranga kushidira, nganyata ngoli shirugho nashintje osho yina kumutunda honde, yira momu anyatire opo akalire kumwedi. ²⁶ Ano ntjene mbete eyi ana rara nakehe shino ana shungiri paruvede oro, nasho kunyata. ²⁷ Kehe ghuno nga gumu kuvininke ovyo, naye nganyata. Ghuye ndje tupu kukusha vyuma vyendi, ntani namwene akukushe. Ghuye kunyata ngoli dogoro ngurova. ²⁸ Mayuva gha kutunda kulidiko nange ghana pu, ghuye kutaterera mayuva ntambiri, makura kukushuruka ngoli pampo. ²⁹ Mumayuva ntantatu atware maputukuwa maviri ndipo vankuti vaviri kwamuruti palivero. ³⁰ Muruti ghuye nga djamba shidira shimwe, shikare ndjambo yandjo, ano eshi shidira shimwe sha ndjambo yakushwakerera. Pankedi yira ndjeyi a rughanene ngoli ogho mukamali ukareli kumeho yaKarunga yakupita honde. ³¹ Weno mo mwakuhangura vantu vavaIsraeli kunyata yavo, mposhi kapishi ngavafe kunyata yavo, mukudira kunyateka nkongoro ndjugho, omo nakatunga navo. ³² Oyino ndjo veta yakehe mukamali ogho ana karo kushidira, ntani nakehe mukafumu ogho ana teto honde yendi kutunda mughukafumu wendi nakumurenkita anyate, ³³ kehe mukamali ogho ana karo kumwedi ndi kehe mukafumu ana kuraro namukamali wakudira kukushuka pampo.''