¹ Nkango ya Hompa ayiya kwande, nakughamba, ² ''Monande, pumbwa na kughamba shi, 'Hompa Karunga kuna kughamba vino: Mapukururo, ''Liyuva lya udito kuna kuya.'' ³ Liyuva pepi pepi linakara. Liyuva lya Hompa pepi linakara. Ngalikara liyuva lya maremo, shirugho sha udito kumuhoko. ⁴ Ntani rufuro ngaruya rutambe Egipute, ntani ngakukara ruhepo muKush opo vafe ngavawera muEgipute - apa ngava ghupa untungi wendi, napa ngagha djonauka matateko ghendi. ⁵ Kush na Puti, Lidiya na Arabiya nayintje, na Libiya, kumwe na vantu ovo vakuhamitiro kumughano - ngavawa kurufuro. ⁶ Karunga akuna kughamba vino: Kehe uno ngavatero Egipute ngawa, na lifumano lya unankondo wendi ngalighurumuka. Kutundilira ku Migidoli dogoro ku Shiyeni vakavita vavo ngavawa kurufuro - oghuno ngo umbangi wa Hompa Karunga. ⁷ Ngava vakokakokera mukatji kavirongo vya mapiyagano, na mbara davo ngadikara mukatji ka mbara nadintje da madjonauko. ⁸ Mpo ngavayivira ashi ame Karunga, apa ngani vankeda mundiro mu Egipute, ntani apa vapopeli vendi ngava djonaukapo. ⁹ Muliyuva olyo vapumbwa ngavatunda kumeho yande muvikepa mukukatjilita Kush, ntani ngamukara muliyuva lya udito wa Egipute. Kovyo koneka! Vinatiki. ¹⁰ Hompa Karunga kuna kughamba vino: Ngani hulitapo mbunga da Egipute nalighoko lya Nebuchadnezzar, hompa wa Babiloni. ¹¹ Naye na vakavita vendi, mutjiliti dimuhoko, ngani muyita mukuyadjonaura shirongo; ngava pweya marufuro ghavo mukudivyuka Egipute na kuyuda shirongo vimpu ovyo ngavadipagha. ¹² Ame nganiruwana mukuro mulivhu mulivhu lya kukukuta, ntani ngani ghulita shirongo kuvantu va vadona. Ngani renka shirongo shikare mapuko kulighoko lyava dipaghi - Ame, Hompa, nakuvitanto. ¹³ Hompa Karunga akuna kughamba vino: Ngani djonaura vintjantjwe, na kushayikitapo vintjantjwe vya hana dumba vya Memphis. Kapi ngakara mo nka hompa kadi mushirongo sha Egipute, ntani ngani tura matjilito mushirongo sha Egipute. ¹⁴ Ntani nganitura mapuko na kutura mundiro mu Zoyani, na kunkondopeka veta da mpanguro pa Tebeshi. ¹⁵ Ame ngani hanita ugara wande pa Perusimu, upungwiro nkondo wa Egipute, nakuteta ko mbunga ya Tebeshi. ¹⁶ Ntani ngani tura mundiro muEgipute; Perushimu ngakara mutjutju ya yinene, Tebeshi ngatjokapo, ntani Memphis nga gwanekera na vanankore kehe liyuva. ¹⁷ Vamati ghona muHeliyopolishi na Bubashitish ngavawa kurufuro, ntani mbara davo ngadi yenda mughunkwati. ¹⁸ MuTapeniheshi, liyuva ngalivyuta shite shalyo na kushighunga apa ngani tjora djoko ya Egipute kwi, na likutangaukiro lya unankondo wendi ngaupwapo. ngakukara ndau oyo ngayimufikiliro, makura vana kadona vendi ngava yenda mughunkwati. ¹⁹ Ame ngani tura mushiruwana veta ya mpanguro mu Egipute, mpo ngavayiva ashi ame Karunga.''' ²⁰ Ano vino kwayire kuviha vya mwaka ogho wakaliro shi wa umurongo naumwe, mukwedi kakutanga, muliyuva lya untambiri mukwedi, apa yayire nka ya Karunga kwande, yina kughambo shi, ²¹ ''Monande, ame kwamokora lighoko lya Farawo, hompa wa Egipute. Keneka! Kwato wa kuvhura kulimanga, ndipo aliverure na mapameko ashi ngalikare lina nkondoperere mukukwata rufuro. ²² Konda yavyo Hompa Karunga kuna kughamba vino, 'Koneka, ame kuna dikuvyuka na Farawo, hompa wa Egipute. Mpo ngoli ame ngani mokora lighoko lyendi, muuviri wagho lya nkondo po neli lya mokoko, ano ame ngani renka rufuro rumwe mulighoko lyendi. ²³ Ntani ngani haraganita Egipute mukatji kadimuhoko na kuvatavaghanita mukatji kavirongo. ²⁴ Ame ngani nkondopeka maghoko gha hompa wa Babilono na kutapa rufuro rwande mulighoko lyendi mposhi ame ngani djonauliteko maghoko gha Farawo. Ghuye ngavhumbama kumeho ya hompa wa Babiloni kumwe na mbira da vafe ovo ngavadipagha. ²⁵ Opo ame ngani pameka maghoko gha hompa wa Babiloni, ruvede ndoro maghoko gha Farawo ngagha wa. Ntani ngavayiva ashi ame Karunga, apa nganitura rufuro rwande mulighoko lya hompa wa Babiloni, mpo ngavhura kuhomona shirongo sha Egipute naro. ²⁶ Mpo ngoli ame nganiharaganita Egipute mukatji kamuhoko na kuvataghanita mwayendo virongo. Ntani ngavakoneka ashi ame Karunga.'''