¹ Nkango ya Hompa shimpe ayiya kwande, yinakughambo, ² ''Vinke mwatamba, anwe mwarughanitango vishewe kuhamena shirongo sha Israeli na kutanta, 'Vashenu kulya mandjembere gha ushatu, ntani mayegho gha vanuke kukara ghuhe'? ³ Moomu nakuparuka - yino ndjo nkango ya ghumbangi wa Hompa - kapi ngapakara nka rufugho opo ngamuruwanita shishewe shino mu Israeli. ⁴ Kenga! Kehe lino liparu lya muntu kukwande lya hamena - liparu lya sha kumwe nka na liparu lya mona wa mumati, gha hamena kukwande! Mwenyo wa undjoni ngo ngo ufo. ⁵ Vinke vyakughamba vya kuhamena kwa muntu wa muhungami ntani wa kughupa ushirina uhungami - ⁶ ntjeneshi ghuye kapi alyatanga pa ndundu ndi walye akunkure mantjo ghendi kuntjantjwe ya mundjugho ya Israeli, ntani anyataekanga mukamali wa maparambo gheni, kapi agwanekeranga na mukamali muruvede rwa mayuva ghendi gha kumwedi, ntjene mukafumu wa muhungami ndi? ⁷ Vinke vyakughamba kuhamena mukafumu wakupira kehepeka kehe uno, ntani ghuye kufuta vakamakongo ogho vatura paveta pa unamakongo, ntani ghuye kapi avakanga ene ngoli kutapa ndya kuvantu vandjara ntani kufika marutu gha shintjentja na vyuma, ghuye ne mukafumu wa muhungami ndi? ⁸ Vnke vyakuvura kughamba kwa mukafumu wakutura unene kumaliva gha kukorotita, ntani kapi aghupanga unene viwanamo kovyo aghulitanga? Kwavighamba ashi ghuye kuyitapo mpora ntani nakutulitapi lihuguvaro mukatji kavantu. ⁹ Ntjeneshi ogho mukafumu atikite mumarongo ghande ntani nakutikitamo veta akare nalipuro, makura ame namuhuguvalita ovino ashi uno mukafumu muhungami: Mushiri ghuye ngaparuka! - oyino ndjo nkango ya ghumbangi wa Hompa. ¹⁰ Ene ngoli turenk ashi ghuye akara na mona wa murume wa mukorokoshi ogho akwatango honde ntani kuruwana shimwe sha vininke ovyo vanatwenyaura, ¹¹ (mpiri ngoli vashe kapi varuwananga shimwe sha vininke ovyo). Ghuye kulyera pandundu ntani kunyateka mukamali wa mukamaparambo ghendi, vinke vyakuvhura kughamba kuhamena kwendi? ¹² Uno mukafumu ghuye kushana vahepwe, kuvaka, ntani kapi avyutanga mumahuguvalito, ntani kukanura mantjo ghendi kuntjantjwe na kuruwana viruwana vya kuyuvita nyengo, ¹³ ntani kuwederera unene maliva gha kuwederekumaliva gha makongo ntani kuwana unene viwanamo kuvininke ovyo aghulitanga, kuvhura kuparuka ndi? Muushiri kapi ngaparuka! Ghuye anakona kufa ntani honde yendi ngayimuvyuka mwene mukonda ghuye aruwana viruwana vya vidona. ¹⁴ Ene ngoli kengenu! Turenke ashi mukafumu ayita mwanuke wa mumati makura monendi ogho kukenga ndjo odo varuwananga vashe, ntani nampiri agha kenganga, ghuye kapi aviruwananga vininke ovyo. ¹⁵ Mona wa mukafumu ogho ghuye kapi alyeranga pa ndundu, kapi gha kankuranga mantjo ghendi kuntjantjwe ya mundjugho ya Israeli, kapi anyatekanga mukamali wa maparambo ghendi, vininke vyakuvura kughambako kuhamena kendi? ¹⁶ Mona ogho kapi ashakara kehe uno, kuvyuta makongo, ndi kuvyutako vininke vyakuvaka, ene ngoli ghuye kutapa ndya dendi kuvantu vandjarantani kufita marutu gha shintjenntja na vyuma. ¹⁷ Mona wa mukafumu kapi ashakaranga kehe uno ndipo kutapa makongo gha ntjontjo yakuwedererako ndipo viwanamo vyavingi kumakongo, ene ngoli ghuye kukwama veta ntani kuyenda kukwama mumashongo ghande; mona wa mukafumu ogho kapi ngafa mukonda ya ndjo da vashe: Ghuye ngaparuka! ¹⁸ Vashe, mukurenka ashi gha djonena vaunyendi ntani avakire mukurwendi wa mukafumu, ntani aruwanine vyakupira kuhungama mukatji kavantu - kengerenu, ghuye ngafa muudona wendi. ¹⁹ Ene ngoli muna ghamba shi, 'Vinke apira mona kughupa ndjo da vashe?' Mukondashi mona ghuye kutikitamo mpora ntani uhungami ntani kukwama marongo ghande; kuvitikitamo. Ghuye ngaparuka! ²⁰ Ogho wakudjonaura, ghuye ndje ngafo. Mona kapi ngaupa udona wa vashe, ntani vashe kapia ngava ghupa udona wa monavo. Uhungami wogho wakuruwana uhungami ngaukara panaumwendi, ntani maudona gha vadona ngaghakara pa pavo naumwavo. ²¹ Ene ngoli ntjeneshi muntu wa mudona atunde kuviruwana vyendi vya vidona ovyo aruwana, ntani nakutikitamo mashongo ghande nakuruwana vya ushiri na uhungami, makura ghuye kapi angafa. ²² Ndjo dendi nadintje ngavadimughupirapo. Ghuye ngaparuka muuhungami ogho anakuruwana. ²³ Nahafanga unene pakumona vantu vakufa muudona ndi - oyino ndjo nkango ya ghumbangi wa Hompa - ntani nakupira kukushiura kundjira davo da didona mposhi vaparuke ndi? ²⁴ Ene ngoli ntjeneshi muntu wa uhungami apiruka kuuhungami wendi na kuruwara udona ntani nakuruwana vya lishwau yira mashwau naghantjeya ogho varuwananga vantu va vadona, makura ghuye ngaparuka ndi? Kuviruwana vya viwa navintje aruwana kapi ngavavivuruka ntjene ghuye anapiruka muundjoni wendi. Ghuye ngafa mukonda ya ndjo odo anaruwana. ²⁵ Ene ngoli anwe kughamba shi, 'Ndjira ya Hompa yakara naufeke!' Teghererenu, ndjugho ya Israeli! Ndjira dande ufeke ndi? Kapishi ndjira denu ndo daufeke? Kapishi denu ndo daufeke? ²⁶ Ntjene muntu wamuhungami apiruka kundjira dendi dauhungami na kuruwana udona ntani nakufa munkonda yavyo, makura ghuye ngafera mundjo odo anaruwana. ²⁷ Ene ngoli ntjene muntu wa mudona apiruka kuudona wendi ogho aruwana nakukwama mpora na uhungami, makura ghuye ngapopera liparu lyendi . ²⁸ Mukondashi ghuye ana kenge nakupiruka kundjo nadintje odo aruwana. Ghuye ngaparuka, ntani kapi ngafa. ²⁹ Ene ngoli ndjugho ya Israeli nakughamba shi, 'Ndjira ya Karunga kapi yahungama!' Weni omo yakara ndjira yande naufeke, ndjugho ya Israeli? Ndodo ndjira denu ndo dapiro kuhungama. ³⁰ Mpo ngoli ashi ame ngani pangura kehe muntu mukatji kenu kutwara kundjira denu, ndjugho ya Israeli! - oyino ndjo nkango ya Hompa ya ghumbangi wa Hompa. Kushughurenu na kupiruka kundjira denu da undjoni mposhi kapishi ngavikare vikupunduro vyenu. ³¹ Vhukumenu naumwenu ndjo denu nadintje odo mwaddjona; kuruwanenu naumwenu mutjima na mpepo ya yipe. Vinke ngamukafera mundjugho ya Israeli? ³² Kapi nahoro kehe umwe wapakatji ngafe - oyino ndjo nkango ya ghumbangi wa Hompa - mpo ngoli kushughurenu muparuke.