¹ Shimpe nka, nkango yaKarunga ayiya kwande, nakughamba, ² ''Monande, porofete mukatji kavaporofete ovo vanakuporofetango muIsraeli, nakughamba kovo vanakupumbango shitetu, 'Teghererenu nkango da Hompa. ³ Hompa Karunga kuna kughamba vino: Vaporofete vamampepa ovo vakwanango mpepo dona panaumwavo, ngoli kapi vamonanga pa mpepo! ⁴ Israeli, muporofete wenu akara yira vambandje ovo vakaro mundombo da marunda gha mushitata. ⁵ Kapi mwayenda mumavango gha makuma mudingonoko wa ndjugho da Israeli mposhi mudidikurure, mposhi kapishi ngadiyunguruke muliyuva lya Hompa. ⁶ Vantu vakara namamoneko gha mampempa nakughamba mapumbo gha maghoko-ghoko, ovo vaghambango, ''Navino nevino mbyo viturwapo vya Hompa.'' Karunga kapi anavatumu, ngoli vikare vyavisheshu vantu vakare nalihuguvaro ashi mbudi yavo ngayiya paushiri. ⁷ Kapi mwakara na ndjodi da vimpempa na mapumbo gha vimpempa, ove waghambo, ''navino navino mbyo viturapo vya Hompa'' Ame naumwande kapi navighamba?' ⁸ Mpo ngoli Hompa Karunga anakughamba vino, 'Mukonda kapi mwakalire na mamenekero gha ushiri ntani mwaghambire vimpempa - mpo ngoli shi evino vitulitapo vya Hompa kwenu: ⁹ Lighoko lyande ngalikulimba na vaporofete ovo vanakaro na mamoneko gha mampempa novo vanakukurongito mamoneko gha mampempa. Kapi ngavakara mumbunga yavantu vande, ndi nivashingonone mundjugho ya Israeli; kapi ngavayenda mushirongo sha Israeli. Anwe ngamuyiva ashi ame Hompa Karunga! ¹⁰ Mukonda yavino, ntani mukonda yakupititira vantu vande kumeho nakughamba nakughamba ashi, ''Mpora!'' shirugho sho yayo mpora pato, kunakudika ndjugho yalikuma oyo ngavapeyinda naukenu.' ¹¹ Ghamba kovo vanakukusho likuma, 'Ngaliwera palivhu; ngakukara kuwa kwa ruhepo rwa mvhura, ntani nganituma mvhura yamawe mukuyalirenka ngaliyawe, na likundungu ngaliya vidjonaurepo. ¹² Kenga, likuma ngaliwera palivhu. Vaunyoye kapi vanakutantere shi, ''Kuni peyinde yayikenu oyo mwatulireko?'' ¹³ Mposhi Hompa ngaghamba vino: Nganiyita likundungu muugara wande, ntani ngakukara ruhandjo rwa mvhura muugara wande! Mvhura yamawe muugara wande ngayividjonaurapo navintje. ¹⁴ Nganibomaura makuma ogho mwafika napeyinde yayikenu, ntani nganivipita navintje palivhu nakuwa mulivango lyavyo. Ngaviwa, ntani ngavidjonauka mukatji kanavantje. Ntani ngamuyiva ashi ame Hompa. ¹⁵ Nganigarapa ugara wa unene kundjugho na kuvantu ovo vayipeyindeyire shinaukenu. Nganighamba koye, ''Likuma mpolili po ndipo vantu ovo valipeyindiro shinaukenu - ¹⁶ vaporofete vaIsraeli ovo vaporofetire kuhamena Jerusalemu nogho akaliro nalimoneko lya mpora. Ngoli mpora kundereko! - vino mbyo vitulitapo vya Hompa Karunga.''' ¹⁷ Mpo ngoli shi ve, monande, tura mantjo ghoye mukukananitapo vantu ovo vaporofetango vyakutunda mudimutwe davo, ntani vaporofete mukuvakananitapo. ¹⁸ Ghamba, 'Hompa Karunga kunakughamba vino: Nkenda kuvakamali ovo vakuno maparu ghavo gha vimpempa kukehe ruha rwa maghoko nakukutura vyakukukwita kushipara vaviruwanite kumaghoko ghavo, varuwaniteko mukushana vantu. Ngavhura kushana vantu nakupopera liparu lyoye? ¹⁹ Kapi wakalire nalifumadeko kwande kumeho ya vantu mumaudito gha marughodi na ufefere wa mboroto, kudipagha vantu ovo vapiro kuwapera kufa, nakupopera maparu gha vantu ovo ngavadiro kutwikira muliparu, mukonda ya mampempa ghenu ku vantu ovo vamuyuviro. ²⁰ Mpo ngoli Hompa Karunga ana kughamba vino: Kapi nakwatitako kuhafera ovyo mwarughanita mukukwata maparu gha vantu yira vidira, yira moomo vya shoroka, nganivaghupa mumaghoko ghoye; ntani vantu ovo wakwata yira vidira - nganivamangurura vayende. ²¹ Nganishutura ngodi doye nakupopera vantu vayende vatunde mumaghoko ghoye, mposhi ngavadire kukombana mumaghoko ghoye. Ngauyiva ashi ame Hompa. ²² Mukondashi mwaghupa mukumo mumutjima wa muntu waushiri kuvimpempa, nampili ngoli nadira kuhora kuhuguvalita, ntani mukondashi mwankondopeka maghoko gha vantu va vadona mposhi kapishi ngavavyuke mundjira yakuwapera ya liparu lyendi, ²³ mpo ngoli shi kapi ngamukara nka mamoneko gha mampempa, ndi vitwikire na mampempa, nganivaghupa vantu vande mumaghoko ghoye. Ngamuyiva shi ame Hompa.'''