¹ Opo tupu nakengire kushihokwa-hokwa osho sha kushelikunya ya mutwe da vaengeli; mposhiri shamonikiro pawiru yavo yira kawe kakuvembera kamarudi na marudi na limoneko yira shipuna sha unankondo. ² Makura Hompa aghamba kwamukafumu ogho adwatiro makeshe nakughamba ashi, ''Yenda pakatji kamakosho munda ya shipuna sha vaengeli, nakuyuda maghoko ghoye mukatji kavaengeli nakughahanawira munkurumbara.'' Makura mukafumu angene mo ngoli ame kuna kumukengera. ³ Vaengeli kwayimanine kuruha rwa rulyo rwa ndjugho opo angenine ogho mukafumu, liremo aliyuda lipata lyamunda. ⁴ Untungi wa Hmpa aghuyeruka kutundilira muvaengeli nakuyimana pawiru ya shilyatero sha livero lya ndjugho. Aghuyuda ndjugho na maremo, ntani lipata aliyura maremo, nakuyura ukenu wa unene wa Karunga. ⁵ Mushagharo wamavava wa vaengeli aghuyuviki dogoro nange kumunkandjo wa pandje, yira liywi lya Karunga munankondo nadintje opo aghambanga. ⁶ Mpo vyakayire shi, opo arwilire Karunga mukafumu ogho adwatiro mumakeshe na kughamba shi, ''Ghupa mundiro kutunda mukatji kamakosho gha mukatji kavaengeli,'' mukafumu ogho angenemo akayimana kulikosho. ⁷ Muengeli umwe amuraverere nalighoko mukatji kambunga ya vaengeli mumundiro ogho wakaliro mumbunga ya vaengeli, na kughuyerura muwiru na kughutura mumaghoko ghowo adwatiro mumakeshe. Mukafumu ashapuka nakuvyuka arupukemo. ⁸ Namonine mumbunga ya vaengeli shininke shimwe yira lighoko lya mukafumu munda ya mavava ghavo. ⁹ Anikenge, nikuharukeko! makosho mane kuruha rwa mbunga ya vaengeli - likosho limwe kuruha rwa kehe muengeli - makura limoneko lya makosho kwamonikire yira liwe lya kupayima. ¹⁰ Vipara vyavo kwamonikire vyakukufana navantje muune wavo,yira makosho ana kukupita-pito. ¹¹ Opo vayendire, vavo kwayendire mukehe maruha ghavo mane, vahana kupiruka, mukuyenda kwavo; ene ngoli kehe ruha vapire shipara, nko vayendire vahana kutetukako opo vayendire. ¹² Marutu ghavo naghantje - rambangako na dimughongo davo, na mavava ghavo - kwakalire mantjo nakuntje, rambangako na kumakosho mane kukundurukida nako. ¹³ Ame kuna kutegherera, makosho avaghayita, ''Makunyungango.'' ¹⁴ Vakalire na vipara vine kukehe uno; shipara shakuhova shipara sha muuengeli, shipara shauviri shipara sha mukafumu, shipara shautatu shaunyime, na shipara shaune sha likuvi. ¹⁵ Makura mbunga ya vaengeli - ovyo mbyo vinamwenyo nakengire kuruha rwa Kebari Canali - kuna kushapuka. ¹⁶ Kehe shirugho yakugumaulire mbunga ya vaengeli, makosho nagho kuvakwama, na kehe pano ghayerukire mavava ghavo gha tunde palivhu, makosho kapi ghapirukire. Ene ngoli ghakalire shimpe kuntere yavo. ¹⁷ Opo yayimanine mbunga ya vaengeli teghete, makosho nagho aghayimana teghete, opo vashapukire, makosho nagho aghashapuka kumwe navo, mukondashi mprpo ya unamwenyo mumakosho yakalire. ¹⁸ Makura untungi wa Hompa aghurupuka mo mushilyatero shalivero lya ndjugho na kuyimana mumbunga ya vaengeli. ¹⁹ Mbunga ya vaengeli ayiyerura mavava ghavo nakushapuka palivhu ame kuna kuvakenga opo varupukire, na makosho nagho gharuwanine vyakukufana ghagho kuntere yavo. Vayimanine kumangeneno gha kuupumeyuva ya ndjugho ya Hompa, na untungi wa Karunga wa Israeli aghuya papavo kutunda kuwiru. ²⁰ Vino mbyo vinamwenyo ovyo nakengire munda ya Karunga wa Israeli kuviha vya Kebari Canali, naviyivire ashi ava vaengeli! ²¹ Vakalire kehe uno navipara vine na mavava mane, na shifanikito na maghoko gha vantu munda ya mavava ghavo, ²² ntani nka shifanikito sha vipsrs vyavo kwakalire Kebari Canali, na kehe uno wavo atwikiri kuyenda kumeho.