¹ Lidina lyaliwa hasha kupitakana vinukita vyandiro, ntani liyuva lya mfa hashako kupitakana liyuva lyalishampuruko. ² Hashako kuyenda kundjugho ya ruguvo kupitakana ndjogho yayinene yakulyera, ruguvo kuya kuvantu navantje kuruhulilira rwaliparu, mposhi vantu ovovana kuparuko vana kona kuntura kumutjima. ³ Rugugho rwarunene hashako kupitakana kushepaghana, mposhi muruku rwa rugugho rwa shipara kuyamo ruhafo rwa kumutjima. ⁴ Mutjima wamukotoki kwakara mundjugho yarugugho, ene ngoli mutjima walivaya kwakara mundjugho yakulyera yayinene. ⁵ Mposhi hashako kutegherera kwa muntu ogho ana rughano lipuko wamukotoki kupitakana kutegherera kuntjumo da livaya. ⁶ Yira shipapa sha migha shina kupyo mupoto, shimpe nka evino vishepa vya mavaya. Ovino navyo kapi vyakutanta vintu. ⁷ Lighupiro kunkondo kehe pano kurenkita muntu wakukotoka akare livaya, ntani navitapa vya vimaliva mukufukira mutjima. ⁸ Hashako uhura wavininke kupitakana litamekero, ntani litamekero lya vantu mumpepo. ⁹ Kapishi kukwangulita kugarapa mumpepo doye dakupongoka, ugara kwatunga mumutjima walivaya. ¹⁰ Kapishi ughambe, ''Nke vyakalilire mayuva ghakare hasha ghano gha ntantani?'' Mposhi kapishi mukonda yaukotoki ghunapura lino lipuro. ¹¹ Ukotoki, yira vya kupinga, viwa. Kuvatera ovo vamonango liyuva. ¹² Muukotoki kuyititamo likungo vimaliva kuyititapo likungo, ene ngoli uwa wa unandunge shi ukotoki kutapa liparu kwa kehe uno akaro nagho. ¹³ Kwama virughana vya Karunga: Are wakuvyukita kehe vino ana rughana vyakupetama? ¹⁴ Pakukara maruvede gha mawa, kuparuka muruhafo muuwa, ene ngoli ntjene maruvede gha madona, kwama vino: Karunga apulitira navintje mukumoneka ruha na ruha. Mukonda yino, kwato ogho ngaviyivo ovyo ngaviyo kunyima yendi. ¹⁵ Muliparu lyande lyakudira kutanta vintu namono navintje. Mpili muntu waushili ogho afeliliro mukukolita ushili wendi, ntani mpwali muntu waukaro waudona ogho atungo liparu lyalire mukukolita virughana dona vyendi. ¹⁶ Kapishi ukare ushili wa naumoye, kotoka mumantjo ghanaumoye. Nke ukudjonawira naumoye? ¹⁷ Kapishi ukare naukaro wa udona ndi wa uvaya. Nke vyo ufera kumeho ya ruvede roye? ¹⁸ Uwa kughupashi ukwaterere ukotoki uno, ntani kapishi kapishi upulitire uyende utundeko kuushiri. Mposhi kwa muntu wakutjira Karunga kugwanekera navintje navirughana vyendi ovyo ngotikitamo. ¹⁹ Ukotoki nkondo unenene mumuntu wakukotoka, kupitakana vapangeli murongo munkurumbara. ²⁰ Mpwali muntu waushiri pantunda yalivhu ogho arughanango uwa ntani kapi atura rumwe ndjo. ²¹ Kapishi kutegherera ku nkango nadindje odo vaghamba mukondashi, kuvhura ngo yuve varughana voye kuna kuku garapita. ²² Kumaruvede gha mangi, mutjima woye shi, nampiri ghuna garapita vantu vapeke. ²³ Navintje vino nina kunegheda mughukotoki. Ani ghamba ''ngani kotoka.'' ²⁴ Ene ngoli vina kara vina pitakana omo ghambara vikare. Ghukotoki ghurere lidami. Are wakuwana? ²⁵ Anipirura mutjima wande mukukushonga ntani nakukengurura ntani nakupapara ukotoki ntani nalishingonono lyaushili, ntani nakuyivashi ukaro waudona ne uwvaya ntani uvaya ne upurumuke. ²⁶ Aniwanashi kutjujtupita kwakungi kupitakana mfa ne kehe uno mukamali ogho mutjima wendi wayura kumoneka nawa naukuruku ntani likwe, ntani magho ogho ghakaro yira mauketanga. Kehe uno wakupapara Karunga ngashenduka kwendi, ene ngoli munandjo ngavamukwata kwendi. ²⁷ "Kwama ovyo ninavuru kuwana," a ghamba mushongi, "Kwa wedereranga rumwe kulighano lyapeke mundjira yakuwana lishingonono lya ushiri. Evino mbyo nakupapara, ene ngoli kapi naviwana. ²⁸ Kapi nawana muntu ghumwe wa ushiri mukantji komayovi, ene ngoli mukamali mukatji ka navantje kapi nawana mo. ²⁹ Nina yawana mbyevino tupu, Karunga gha tendire muntu ghayimane akenge muwiru, ene ngoli vayenda kwapeke muku papara maudito ghamangi.''