¹ Ndi yakufa kurenkita vinukita vikare nalidumba dona mposhi muvaya wamudidi kuvura apangere ukotoki ntani lifumadeko. ² Mutjima wamuntu wakukotoka kupirukira kurulyo, ene ngoli mutjima wa muntu walivaya kupirukira kurumontjo. ³ Pakuyenda livaya aghurumuke shitaura rughayalito rwendi mwato vimwe vyavisheshu, kunegheda kwanavantje shi ghuye livaya. ⁴ Ntjene ukaro wamupangeli aghuyeruka koye, kapishi kushuva virughana vyoye. Likuturo kuyita limweneno lyaugara waunene. ⁵ Mpouli ukaro dona namona kuntji yaliyuva, rudi rwamapuko oro rwatundango kwamupangeli: ⁶ Mavaya vaghapa umpititi wamavega, shirugho vantu vavantungi vavapa mavango ghapalivhu. ⁷ Namonine vapika kuna kurambita tukambe, ntani vana va hompa kuna kuyenda palivhu yira vapika. ⁸ Ogho atimango likwina lyaudami ngawereramo, ntani kehe uno ngatjoro likuma liyoka ngalimushuma. ⁹ Kehe uno ngateto mawe ngaghamuremeka kwagho, ntani muntu wakutovaura vikuni ngakara udito kwavyo. ¹⁰ Ntjeneshi shikanguro shakavemba shinatupa, ntani muntu kapi ana kushirora, makura nkwandi ana kona kuruhanita nkondo dadingi, ene ngoli ukotoki kuyitapo uwa waliwaneko. ¹¹ Ntjene liyoka alishumu kumeho yakutipa ushungu, makura kwato uwa wakaropo waushungu. ¹² Nkango damukanwa kamuntu wakukotoka dakara nkedi nalifumadeko, ene ngoli dimurungu dalivaya dado kulya. ¹³ Omo dinakutameka nkango kupupa mukanwa kamuntu, uvaya wawo kutundamo dirupuke, ntani kuuhura kanwa kendi kupupa naukaro dona waupurumuke. ¹⁴ Livaya kuwederera nkango, ene ngoli kwato ogho ayivo ovyo vinakuyo. Are ayivo ovyo vinakuyo kunyima yendi. ¹⁵ Virughana vyavavaya kuvarororkita vavene,mposhi kapishi vayive nampili shitaura shakudoropa. ¹⁶ Ligugho lyalinene koye, shirongo, ntjene hompa wenu mwanuke wa mumati, ntani ntjene vampititi venu kutameka kulya ndya ngurangura! ¹⁷ Ene ngoli matungiko ghenu, shirongo, ntjene hompa wenu mona wamumati wavayeruki, ntani vampititi venu ntjene kulya paruvede rwaushili, dankondo, ntani kapishi paunkorwi! ¹⁸ Mukonda yaudwa shihokwa-hokwa kudama munda, ntani mukonda yakudira kurughana vintu kutapa lishingonono kundjugho. ¹⁹ Vantu kuwapayika ndya dakushepaghana, vinyu kuyita lidjobwano kuliparu, ntani vimaliva kuywida vyakupapara kehe vino. ²⁰ Kapishi kukugha Hompa uyamurughane vyavidona, kapishi nampili ndi mundunge doye, ntani kapishi kukugha vantu vavangagho mundjugho yoye yakurara. Kuvidira vyamuwiru kuvura kushimba nkango doye; kehe vino vyakaro namavava kuhanita vyamulyo.