¹ Nazvinezvo, wabale, ndinacumbira zviculuzvonse cuna imwe, na nsisi, za Mulungu, cuti mupereke muiri wanu ninga chibairo champenyu, chacuchena futi chacudekedza Mulungu cuti ndico cunamata kwanu kwamuzimu. ² Lecani culamba muchitsazanissiwe na cuchinguiwa nzeru zanuzo pacuti mereze futi nacudziwa cuti cuda kwa Mulungu, ndicoponi, cuda kwache cudadeca, futi cuda kwana. ³ Nathangwe, na nsisi cuti zangu ndidapassiwa, ine ndina cuvunzan cuti bodzi na bodzi wanu lecani cutsalacana padzaulu pa zvaco iwepo maningue maningue nacutsalacana, kwacachemgera, zviehenderana nacutenda cuti Mulungu apassa mubhodzi na mubhodzi. ⁴ Nacuti ifepano tina muiri ubodzi una mitezo idawanda, apo nkabe mitezo yense inabassa libodzirene. ⁵ Natenepo panho ifepano, cuti tidawanda, unabatana cukala muiri ubodzi cuna Kristu futi, bodzi na bodzi ndife wabodziwene. ⁶ Ifepano tina zvipo zvacusianassiana zvichienderana na nsisi zidapassiwa ife. Cana chipo, chawenango chacuprofita, cuti zvichienderana na cutenda. ⁷ Cana chipo chacussowenza ngassoenze. Cana chipo chacufhunsiwa ngafhunsisse. Cana chipo chacussimbissa, ngassimbisse. ⁸ Cana chipo chacupassa wanagomba, ngapereke na moyo wense. Cana chipo chacutsogorera, ngatsogorere na nsimba. Cana chipo chacuvira nsisi wenango ngaite nacufhansa. ⁹ Cudana ngacukale kwachadi chadi. Zondani zvacunyangala; namatani cuna zvacudeca. ¹⁰ Kalani mucudana cuculukwense bodzi cuna bodzi ninga mudcani. Bodzi na bodzi ngayakodze mwanzache cupinda cizwicudza cuna zvita iye. ¹¹ Lecani culeca cushingaira, apo pitsani muzimu mchissowenzera changamire. ¹² Fhansani nacuthemba cuto zvacumbeli. Tsungairani pacupomera. Namatani nsicu zense. ¹³ Pambulirani nawanhu wa Mulungu wale wanagomba futi tirani walendo mucudana. ¹⁴ Comborerani wale wanacushuphani; Combolerani futi lecani cutuca. ¹⁵ Fhansani nawale wanafhansa; lirani nawale wanalira. ¹⁶ Kalani zvacudeca bodzi na bodzi. Lecani cuzvicudza, apo mukale na chido chacufambirana nawanhu wapansi paha lacani cuita ninga munadziwa maningue mumatsoyamundo, chaiwo. ¹⁷ Lecani cutsiwa munhu chacunyangala na chacunyangala. Chengerani cuti muite zvacudeca pamberi pawanhu. ¹⁸ Cana zvaivira napanu munakwanissa napo, kalani na mutendere mawanhu wense. ¹⁹ Lacani cutsiwa wanadiwa wangu, apo siyani mbuto cunyangarirwa kwa Mulungu. Nhatangwe zvidanembiwa: "Zvichivi: Cutsiwa kwaine; ine ndichalipira. Zvenezvo ndizvo zvinalanga Changamire". ²⁰ Apo cana muzondi waco ana nzara, passe chacuya. Cana ana nyota mpasse madzi yacumwa. Nhatangwe ungaita zvinezvi, uchamanica macara ha moto pamussolo wachepo". ²¹ Leca cucundiwa na zvacunyangala, apo cunda zvacunyangala na zvacudeca.