¹ Patche Djabimi, mambo waHazori, adabva izvi, iye adatunira masoko kuna Jobabe, mambo waMadomi, kuna mambo waSiniromi na mambo waAkisafi. ² Iye adatuirawo basi masoko kuna mambo kuti akhali kudzaulu kwa mutunhu wabango, mukhulo lamukulo waDjorodani, kunyantsi kwaKinereti, muthambe ese mutunhu wamabango laDhori kwenda kumabudiradzuwa. ³ Iye adatumirawo basi masoko kuna wakeneni, wakumabudira na wakumadokera dzuwa, wa amorrewu, wahetewu, waperizewu, wajebuzewu, na mutunhu wamabango, ese kuna hevewu, paduze nabango laHermomi, padziko laMisipa. ⁴ Yentse masodja yatche yadabuda naiye, kuerengwa kukulu kwamasodja, kuerengwa kubodzi ninga matsetcha yamubala. Iwo wakhana ntsama ikulu yamabiza nakalela zankhondo. ⁵ Wamambo wenewale wentse wadasangana nguwa yakukwanira ese wadagala paduze pamadzi yaMeromi, kuti wapoke naIziraeli. ⁶ Yahweh adalanga kuna Djochuwa: "Hausartchi pamberi pawo, thangwe mangwana, nguwa ningazino, ndinadzawapereka iwo wentse kuna Iziraeli ninga wanhu wakufa. Iwe unadzakuwaza mabiza yako futi unadzapitsa motika zawo zankhondo". ⁷ Djochuwa na wentse wanhu wankhondo wadauya. Iwo wadaswika, tchiriporipotcho, madzi yaMeromi, ese wadaphaya wanyamarha. ⁸ Yahweh adapereka wanyamarha mumanja mwa Iziraeli, ese iwowadawakuwaza futi wadawatewera kuswikira kuSidomi, Misrefote-Maimi, ese kuswikira mukhulo mwa Misipa kwenda kumabudiradzuwa. Iwo adawakuwaza kuswikira hawalibe kusara mubodzi wawo wakupenya. ⁹ Djochuwa adaita kuna iwo ninga Yahweh akhadalanga. Iye adakuwaza mabiza futi adapitsa motika zankhondo. ¹⁰ Djochuwa adahirira panguwa yeneyo futi adatora Hazor. Iye adakuwaza mambo nabemha. (Hazor likhali khuli laentse madziko aya). ¹¹ Iwo wadaphaya zventse zvisikwa kuti zvikhalipo pambuto yeneyo, ese wadazvifudza. Nadyali, hapalibe tchisikwa tchibodzi tchidasala tchidapenya. Napenepo, iye adapitsa Hazor. ¹² Djochuwa adatora yentse maluwani yawamambo wenewo. Iye adabata wentse wamambo wenewale futi adawakuwaza nabemha. Adawafudza wentse, dyali ninga Mozisi, nyamubasa waYahweh, akhadalanga. ¹³ Iziraeli halibe kupitsa luwani lakulonziwa mubango, kunza kwaHazor, kuti Djochuwa adapitsa. ¹⁴ Masodja yaIziraeli yadatonga zventse zvinhu zvaluwani iri, pabodzi nan'gombe zawo. Iwo wadaulaya wentse wanhu namabemha, kuswikira wentse wafa. Iwo hawalibe kusiya tchilalame tchisikwa tchinafema. ¹⁵ Dyali ninga Yahweh akhadalanga kuna Mozisi nyamubasa watche, zvibodzibodzizvo, Mozisi adabvunza Djochuwa, futi djochuwa adaita dyali. Iye halibe kusiya kuita zvenezvire kuti Yahweh akhadalanga kuna Mozisi. ¹⁶ Djochuwa adatora dziko renerire, mutunhu wamabango, wense Neguebe, lentse dzoko laGozen, mumherera mwamabango, mukhulo mwaludzi laDjorodani, mutunhu wamabango yaIziraeli, na muthambe. ¹⁷ Kubudira bango Halake, paduze naSeiri, futi kwenda kudzaulu kuswikira Baali-Gade mukhulo paduze na Libano, munyantsi mwabango laHermomi, iye adabata wentse wamambo watche ese adawaulaya. ¹⁸ Djochuwa adaemesa nkhondo panguwa ikulu na wentse wamambo awa. ¹⁹ Hapalibe luwani lidaita mutendere na masodja yaIziraeli, kunza kwa hevewu kuti wakhalalama muGibeoni. Iziraeli adatora yentse maluwani yakhadasara pankhondo. ²⁰ Thangwe ndi Yahweh kuti akhadawomesa moyo yawo kuti wabude pankhondo sososo naIziraeli, kuitira kuti wafudziwe wentse, nkhabe ntsisi, dyali ninga Iye akhadalanga kuna Mozisi. ²¹ Djochuwa adauya panguwa eneyo ese adafudza wa anakewu, wamutunhu wabango laHebromi, waDebir, wa Anabe, wawentse mutunhu wabango laDjuda, futi nawentse mutunhu wabango laIziraeli. Djochuwa adawafudza namaluwani iyawo. ²² Hapalibe mubodzi waanakewu adaiyiwa padziko laIziraeli, kunza kwa Gaza, kuGate na kuAsidode. ²³ Nadyali, Djochuwa adatola lentse dziko iri, ninga Yahweh adalanga kuna Mozisi. Djochuwa adapasa ninga nhaka kuna Iziraeli, atchirigawa zvitchipindirana na mitupo mubodzi na mubodzi. Napenepo, dziko lidapuma pankhondo.