¹ Ndirikulanga kuti nyanhaka, angati ndimwana, azviribe kusiyana nanyamubasa, kana agale mwenekatchiro wazvinhu. ² Napenepo, iye alipantsi ubvinyiriri na walapi kuswikira nguwa idapasiwa na baba watche. ³ Ifewo basi nadyali, pathu tikali wana, tikabvinyirirha namitemo iya padziko. ⁴ Apo, payo idaswika nguwa tchaiyo, Mulungu adatuma Mwana Watche, wakubaliwa namukadzi, adabaliwa pamusana pa Mutemo. ⁵ Iye adaita izvi kuitira kuti abudise wenewale walipantsi pa Mutemo, kuitira kuti titambire kutenda ninga wana. ⁶ Ese thangwe imwe ndimwe wana, Mulungu atuma Muzimu wa Mwana Watche mumoyo mwathu, kuti anakhuwa "Aba, Baba!". ⁷ Pazvense imwe hamutchasi wanyamubasa, apo mwana mubodzi. Ungati ndiwe mwana mubodzi, napenepo ndiwe basi nyanhaka pamusana pa Mulungu. ⁸ Apo, panguwa yeneyo, panu imwe mukadziwalini Mulungu, mudaitiwa kuti mugale wanyamubasa watchibalirhe hamukasi wamulungu napadokopo. ⁹ Apo, tchintchino kuti mulikudziwa Mulungu, kana zvamuche, tchintchino kuti muliwakudziwika na Mulungu, thangweranyi imwe mulikuhirira kuna wakuneta ese futi walombo wakulu wamiko? Mulikuda kugalazve paswa wanyamudasa? ¹⁰ Imwe munakoya ntsiku na mwezi uswa, ngani zamagole! ¹¹ Ine ndinazvo nuka imwe kuti, napadokopo, ine ndinakasenza mahala kuna imwe. ¹² Ine ndirikukumbirani, wabale, itani ninga ine, thangwe ine basi ndaitawo ninga imwe. Imwe amulibe kundiita zvakunyangala. ¹³ Apo imwe kulikudziwa kuti ndidakonziwa patchimiro kuti ine ndidakuparidzirani vangeri pakutanga. ¹⁴ Kana tchimiro tchangu tchakigani pakuesera, imwe hamulibe kundinyozera kana kundiramba. Kunza kwa izvi, mudanditambira ine ninga ngirozi iya Mulungu, nigna ine ndiri tchaiye Kristu Djeso. ¹⁵ Ulikupi, napenepo, mufantso wanu? Nazvinezvi ine ndakudairirani kuti, zvingakwanisika, imwe mungadabudisa matso iyanu tchaiyo kuti mupase ine. ¹⁶ Napenepo, ndagala nyamarha wanu nakukubvunzani tchadiko? ¹⁷ Iwo nantsisi wadakuswagani, apo ntsina zvamuche. Iwo waikuda kukumwazanisani naine kuti muwatewerere. ¹⁸ Zvamuche mugale wantsisi nazviito zvamuche ese nkabe basi pangu ine ndiripo pakati panu. ¹⁹ Wana wangu, ndirikubonera kukonziwa kwakubala na imwe paswa, kuswikira Kristu alonziwa kuna imwe. ²⁰ Ine ndirikuda kugala pabodzi na imwe tchintchino ese nditchitchinja pfala langu, thangwe ine ndirikuchamisika pamusana panu. ²¹ Ndibvunzeni imwe, kuti mulikuda kugala pantsi pa Mutemo: hamulibe kubva zvilikulanga Mutemo? ²² Thangwe zvidanembiwa kuti Abrahamba akana wana wairi, mubodzi wamukadzi nyamubasa ese unango wamutendere. ²³ Pazvense mwana wanyamubasa adabaliwa panyama, apo mwana waunango adabaliwa pamberi pakuthembesa. ²⁴ Zvinyu izvi zvinakwanisika kuthumbudzulika dyali, nazvinezvi aya wakadzi wairiwa ndiwo ninga lubatano huwiri. Ubodziwatche ndiye waBango la Sinai. Iro linabala wana kuti mbanyamubasa. Uyu ndi Agari. ²⁵ Napenepo, Agari anapangiza Bango la Sinai kuArabia. Ese iye anadzindikira Djerusalema lanyamuntsi, thangwe iye alipawunyamubasa na wana watche. ²⁶ Apo Djerusalema kuti alipadzaulu alimuutendere, ese iye ndiye mai wathu. ²⁷ Thangwe zvidanembiwa: "Dekerha, oh nswenje, kuti aubali. Kuwa futi dekerha pakufantsa iwe, kuti auboneri nakukonza kwakubala. thangwe wana wamukadzi wakulambiwa wadawanda kupinda wana wamukadzi anamwamuna". ²⁸ Tchintchino imwe, wabale, dyali ninga Izaki, ndimwe wana wakuthembesa. ²⁹ Panguwa yeneyo, adabaliwa zvinapindirana na nyama adatewerera wadabaliwa zvinapindirana na Muzimu. Nadyali basi ndizvo natchintchino. ³⁰ Zvinembwa zvinalanga tani?" Thusa kunza nyamubasa namwana watche. Thangwe mwana wanyamubasa hawagawani nhaka nawana wamukadzi wamutendere". ³¹ Nadyali ndizvo, wabale, ife hatisi wana wamukadzi nyamubasa, apo wamukadzi wamutendere.