¹ Paulo, mupositori mubodzi--hasi mupositori mubodzi wakundu lawanhu, ne namunhu mubodzi zvatche, apo na Djeso Krisitu na Mulungu, Baba, kuti Adamumusa pakati pawaanyakufa--, ² na wense wabale wanaine, wamagereja iyaku Galacia: ³ Ntsisi na Mutendere wanu, pakundu la Mulungu Baba na Tchangamire Djeso Kristo, ⁴ kuti adazvipereka naunyangazi wathu kuti alekerere kuna izvi zvakunyangala zviripo, ninga kuda Kwa Mulungu na Baba. ⁵ Kuna Iye kukuza kwakwenda nakwenda ese kwenda nakwenda. Amen. ⁶ Ndiri wakupatisiwa kuti imwe mulikutchinjia nakutchimbiza kuna Vangeri lakusiana, mutchifundukira Kwalenerire kuti lidakudaidzani nantsisi za Kristu. ⁷ Hakulibe linago vangeri, apo walipo wanhu wenangokuti walikukuswagirani mirandu, ese walikuda kufudza Vangeri la Kristu. ⁸ Apo, ife wabodzibodzi, kana ngirozi ibodzi itchiuya kubuda kudzaulu itchikuparidzilani vangerilibodzi lidasiana nalenelire kuti tidaparidza kuna imwe, ngalitukwe. ⁹ Ninga tidalanga kumasure, tchintchino ine ndirikulanga paswa: angati unango atchikupalidzirani nangeri lidasiana nalenelire kuti mudatenda, ngalitukwe". ¹⁰ Penango, ine tchintchino ndirikuda kuesera kwawanhu kana kw Mulungu? Kana ndirikuda kufntsisa wanhu? Ndingati ndirikuesera kufantsisa wanhu, ine handisi nyamubasa wa Kristu. ¹¹ Thangwe ine ndirikuda kuti mudziwe, wabale, kuti Vangeri langu ndaparidzali halisi kubuda kuna munhu. ¹² Ine handina kulitambira kuna munhu, awalibe kundipfunzisa, apo kunza kwaizvi, iro ndidalipangiziwa napamusana pa Djeso Kristu. ¹³ Mudabva kulanga pamusana wakulalama kwangu kwakalekale mudjuda, ninga ine ndikatewerera kuphwaza Gereja iya Mulungu, futi nditchirifudza. ¹⁴ Ine ndiatewerera udjuda kupinda wenango madjuda wamusinko wangu, nditchitewerera mukho watchinyakale wangu. ¹⁵ Apo,patche Mulungu, Adafantsisa kuna ine kundisankula kubudira mumimba mwamai wangu, adandidaidza nantsisi Zatche kuti ¹⁶ apangize Mwana Watche kuna Ine, kuti ndimuparidze pakati pawa Hedeni, ine andiribe kubvunzisa nyama kana gazi, ¹⁷ hawalibe kwenda Djerusalema wenewale kuti wakalipo kumasure kwangu, apo, kunza kwa izvi, ndidaenda kuArabia ese napenepo handiribe kuhirira ku Damasiko. ¹⁸ Napenepo, pakupera kwa magole matatu, ndikwira ku Djerusalema kuti ndiwone Kefasi, ese ndidagala naiye ntsiku kumi nazichanu. ¹⁹ Apo ine andiribe kuwon unango mupositori, kunza kwa Tiago, mubale waTchangamire. ²⁰ Pazvangu ndakunemberani, ndikuzvibata, pamberi pa Mulungu, kuti ine handisiri kuphwata. ²¹ Kubuda penepo, ine ndidaenda kumitunhu iya Siria na Cilicia. ²² Ine nanga handasati ndadziwika patchaangu mumagereja iya Djudea kuti iyakali muna Kristu ²³ Apo iwo basi wakabva: "Weneule kuti kumasure wakatitewera tchintchino walikuparidza kutenda kuti iye akaswaga kufudza". ²⁴ Ese iwo wadakuza kuna Mulungu nakuda kwangu.