¹ Ine ndidafungisisa pamusana zvense izvi, nditchiesera kubvisisa wanhu wakutendeka na wakutchenjera, namabasa yawo. Iwo wentse wali munja mwa Mulungu. Hapana anadziwa kuti kuda na tchizondi zvinadzauya kuna unago. ² Wentse wana mhera ibodziyo. Mhera ibodziyo yinaemera wakutendeka kana wakudzengenuka, wamuche nawa kunyangala [yenango malangirhe yatchintchino yalikutowezera kalangirhe kakale. Nakahaindi yeneyi, phindi lineri linandendemera. Muthumbudzuli anapasisa kutowezera], wakutchena nawa kuswipa, wanabonerera nawa nyakuleka kubonerera. Nadyali ninga wanhu wamuche wanadzafa, nadyali basi wanyangazi wanadzafawo. Nadyali ninga wenewale kuti wanadumbira wanadzafawo, wanadzawo basi wanhu kuti wanartcha kudumbira. ³ Pana mhera yakunyangala kuna zventse zvinaitika pantsi padzuwa, mhera ibodzibodziyo kuna wentse. Moyo yawanhu yidadzala na tchizondi, futi uphwephwa uli mumoyo mwawo uku iwo watchidalalama. Ese pakupeza zvenste, iwo wanafa. ⁴ Thangwe, kana mubodzi anawonekayo kuti analambirira pakati pawapenyu, ana kuemerera, nadyali ninga katchinja kakupenya kalimuche kupinda nkhalamu yakufa. [Yenango malangirhe yatchintchino yanalanga: "Ntchipi tchinaita? Kuna wentse walalami, izvi ndizvo: katchinja kakupenya kalimuche kupinda nkhalamu yakufa"]. ⁵ Thangwe wentse watchiri kulalama walikudziwa kuti wanadzafa, apo wanyakufa hawadziwi zvinhu zvinago. Iwo hawatchina mubairo, thangwe nzeru zawo zaehiwa. ⁶ Kuda, tchizondi, na bibvu lawo zvidazambazika nguwa yakale. Iwo tchipo wanadza gali nambai yazvinhu zvinaitika pantsi padzuwa. ⁷ Yenda njira yako, irja pawu yako namufantso, futi imwa vinyu yako na moyo wakufantsa, thangwe Mulungu anaphasisa kusekerera mabasa yamuche. ⁸ Nguwo zako ngazigale zakutchena futi tsisi lako ngaligale nafuta. ⁹ Lalama udafantsa namukadzi wako unada, zentse ntsiku zirikukusenzera pakulalama kwako, ntsiku kuti zidakupasa Mulungu pantsi padzuwa, yizi ntsiku kuti zinasenza. Uyu ndiwo mubaibai wako pawuupenyu uhu, nabasa lako iwe udaita pantsi padzuwa. ¹⁰ Zvense zvinawona manja yako kuti uyite, senza nantsimba zako, thangwe hapana basa kana kupanganidza ludziwo kana kutchenjera pakumusiwa, kwako unaeda. ¹¹ Ine ndikhawona zvinango zvinhu tchidalemerera pantsi padzuwa: anathamanga ntsiye anakunda; nkondo haisi iyawa nyantsimba; Pawu aisi yawa nyakutchenjera; upfu hausi yawa kutchena; kukumbira hakugali kwa wanyakubvisisa. ¹² Thangwe hapana anadziwa patche anadzafa, nadyali ninga ntsomba iriperezo mumambule yalifu, kana ninga mbalame zidabatiwa pawuzande. Dyali ninga zvinyama, wanhu wakusungiwa panguwa yakunyangala, kuti zidagwa tchiripo ripotcho kuna iwo. ¹³ Ine basi ndinakhawona kutchenjera pantsi padzuwa, khaindi iadandiwira ikulu. ¹⁴ Pakhana luwani lidoko mukhana wanhu padoko mwenemo, ese mukulu mukulu mubodzi mukulu adawuya sososo nalo; adalizengulira, ese adalonza nfuti zikulu mwenemo. ¹⁵ Apo, muluwanimo mukhana mwamuna mubodzi mulombo ese wakutchenjera, kuti kutchenjera kudaponesa luwani. Napenepo, kumasure, hapana adatsalakana mwamuna weneule mulombo. ¹⁶ Napenepo, ndapezesa: kutchenjera nkwamuche kupinda ntsimba, apo kutchenjera kwa munhu mulombo kudanyozeka, ese masoko yatche hayatetekiwi. ¹⁷ Masoko yakulangiwa na mutchenjeri nanhereka yanatetekiwa zvamuche kupinda anawonekayo mukulu mukulu pakati pa maphwephwa. ¹⁸ Kutchenjera ndiko kwamuche kupinda npfuti zankhondo, apo munyangazi mubodzi anakwanisa kunyangaza zvinhu zvizinji zvamuche.