¹ Mbani munhu mubodzi wakutchenjera? Mbani anadziwa kuthumbudzula zvinaitika muupenyu?Kutchenjera kuna munhu kunaitisa kuti nkope iyatche iyi etikire, ese kuwoma kwa nkope yatche kugale kwakutchinjika. ² Ine ndirikukupungulani kuti tewererani mutemo wa mukulu mukulu, nakuda kwa kutoga kwako udaita pamberi pa Mulungu kwa kukukhotcherera. ³ Hausatchimbizi kubuda pamberi pako ese ausabatsiri tchinhu tchakunyangala, thangwe mukulu mukulu anaita zvatche anada. ⁴ Masoko ya mukulu mukulu yali pawutongi; napenepo, mbani anamubvunza: "Nswanyi zvanu mukuita?". ⁵ Weneule kuti anakoya mutemo wa mukulu mukulu anantchenkha kufudziwa. Moyo wamunhu wakutchenjera unadziwa khundu tchairo futi nanguwa inatewera yakuda kulanga. ⁶ Kwa wentse mubvunzo kuna mhindulo futi nanguwa tchaiyo yakudaira , thangwe nhukwa za wanhu ntsikulu. ⁷ Hapana anadziwa tchinadzaitika kumberi. Mbani anadzakuerengera zvirikuuya kumberi? ⁸ Hapana anawonerera kufema kwatche kuswikira pakukuemesa, [Yenango malangirhe yalikulanga: "Hapana anawonerera mhepo, kuitia kuti angai yemese"] ese hapalibe anantsimba pantsiku yakufa. Hapalibe anaphadzanisiwa na masodja pakati pankhondo, futi marha aiponesi wenewale kuti mba nyamubasa wako. ⁹ Ine ndidawona zventse, esendasenzesa moyo wangu pa wentse muchobo wabasa kuti likuitika pantsi padzuwa. Pana nguwa inango munhu anabzvinyirira nyawuyatche atchiswaga kuzvi bzvinyirira patchatche. [Yenango malangirhe yatchintchino yalikulanga: "kuzvi bzvinyirira kwatche" (kwa munhu alikubonera kubzvinyiriri.] ¹⁰ Napenepo, ndidawona kumusiwa pamhene kwa wanya kunyangala. Iwo wadabudisiwa pambuto iyakutchena, wadamusiwa ese watchisekererha na wanhu wamuluwani kwawo wakaita mabasa iyawo iyakunyangala. Izvi ndizvo hazvisenzi. Yenango malangirhe iyatchintchino iyalikulanga na phindi iri lakuchupha: "Ndawona wanhu wakunyangala watchiyenda ese watchiuya ku mbuto yakutchena. Iwo nakuzvikuza wadanga pamusana pazvinhu kuti wanyangazi wadaita muluwani. Izvi ndizvo hazvisenzi." Yenango malangirhe yalikulanga: "Ndawona wanyakunyangala watchiyenda ese watchuya pambuto yakutchena. Iwo wadakuziwa muluwani nazvinhu zvawo wadaita. Izvi basi azvisenzi."] ¹¹ Kutongiwa kulisososo nawunyangazi hakuitiwi nakutchimbiza, izvi zvinakwewa moyo iya wanhu waite zvakunyangala. ¹² Kana munyangazi aite zvakunyangala kazana, ese atchilalama nguwa ikulu, ndirikudziwa kuti zvinhu zvinadzaenda muche kuna wenewale kuti wakhodza Mulungu, kuti anakuza pamberi Patche na iwo. ¹³ Apo hazvisi kuna wanhu wakunyangala; kulalama kwawo hakudzaendereri. Ntsiku zawo ndizo ninga mubvuli unapinda thangwe iye hakuzi Mulungu, ¹⁴ Pana tchinango tchinhu apana tsalukano kuti tchirikuitika pantsi. Zvirikuitika kuna wanhu wakutendeka zvirikuitiwa basi kuna awana kutendeka, ese zvirikuitika kuna wanhu awana kutendeka zvirikuitikawo basi kuna wadatendeka. Ndirikulanga kuti izvi azvilibe tsalukano. ¹⁵ Nazvinezvi, nditchirjazve mufantso, napenepo hapalibe zvinhu zvamuche kuna munhu pantsi padzuwa kupinda kurja, kumwa nakukhala udafantsa. Ndiwo mufantso kuti unaperekeza basa lako pazentse nstiku zako zakulalama, kuti Mulungu adakupasa pantsi padzuwa. ¹⁶ Pangu ndidasenzesa moyo wangu kuti ndidziwe kutchenjera na kubvisisa basa lidaitiwa pantsi, lakuti kazinjikene ndiro hapana kupuma kuna matso tchausiku na masikati, ¹⁷ ine ndidakhodza zventse zvidaitiwa na Mulungu, ese kuti munhu hakwanisi kuteteka basa kuti linaitika pantsi padzuwa. Hazvina basa kuna munhu asendze kuti awone mhindulo, iye nkabe kudzaziwona. Kunza kwa kuti munhu mubodzi wakutchenjera atende kuti anadziwa, iye tchayizvo hadziwi.