¹ Dzina lamuche lidadeka kupinda fafuta yakununtchira yakudura, ese ntsiku yakufa irimuche kupinda ntsiku yakubarha. ² Zvirimuche kwenda kumuyi wawenango ntsiku yathaha kupinda kwenda ntsiku yaphwando, thangwe thaha linaswika kuna wentse wanhu pakupera kwa nkhoza; nazvinezvi, watchirikulalama wanadikana kutola izvi mumoyo mwawo. ³ Kutsurukwala nkwamuche kupinda kuseka, thangwe pakupera kwa kutsurukwara kwa nkope unauya ndi mufantso wa moyo. ⁴ Moyo wa mutchenjeri uli pamuyi wathaha, apo moyo wa phwephwa uli pamuyi waphwando. ⁵ Muli kubva kutsumulurkha kwa mutchenjeri kupinda nyimbo iyama phwephwa. ⁶ Thangwe ndizvo ninga kuphoka kwa mibva yitchiswa pantsi pa mhendekali, nadyali ndizvo ninga kuseka kwa maphwephwa. Izvi ndizvo ninga kutoloka. ⁷ Kubvinyirirha, tchadiko, zvinaitisa munhu wakutchenjera aite phwephwa, mubvinyiriri anakonza moyo. ⁸ Zvakudekha nkhupera kwa zvinhu kupinda kutanga kwazvo; ese wanhu wantsisi pa muzimu walimuche kupinda wanazvikuza. ⁹ Hausatchimbizi kuzvigumbura pa muzimu, thangwe kugumbuka kunagala mu moyo iya maphwephwa. ¹⁰ Hausalangi: "Thangweranyi ntsiku zapindazi zikali zamuche kupinda zino?" Thangwe hausi wakutchenjera kuti uyite muchobo uneyi wa mubvunzo. ¹¹ Kutchenjera kunasenza kuna zvinhu zvinapinda ife nhaka iyawa sekuru wathu. Iyo inaperekeza upfumi kuna wenewale kuti atchiri kuwona dzuwa. ¹² Nazvinezvi kutchenjera kuna perekeza kukhotcherera pa mare, apo phindu la ludziwo ndiko kutchenjera kunapasa kulalama kuna iye anako. ¹³ Khodza zvidaitiwa na Mulungu. Mbani anakwanisa kuthamula tchinhu kuti Iye adaita tchakubenda? ¹⁴ Payo nguwa iri muche, lalama udafansa mwenemo; apo payo nguwa iri yakunyangala, khodza izvi: Mulungu adatendera kuti zvense zviwoneke khundu na khundu. Na lazawu iyi, apalibe anadzakwanisa kuwona tchinauya kumberi kwatche. ¹⁵ Ndinakawona zvinhu zvizinji hapana tsalukano muntsiku zangu. Kuna wanhu wakuthemera kuti walikutsaika, kana nakuthemera kwatche, ese walipo wanhu wakunyangala kuti wanalalama upeny ukulu, kana naunyangazi wtche. ¹⁶ Hausagali muphazi, wakutchenjera mumatso iyako tchaiyo. Thangweranyi ukuda kuzvifudza wegawega? ¹⁷ Hausagali munyangazi wakupindirira kana kuti phwephwa. Thangweranyi haudikani kuti ufe nguwa yako haisati yakwana? ¹⁸ Zvirimuche kuti utole kutchenjera uku ese kuti hausasiyi kutendeka. Thangwe munhu anartcha Mulungu anadzateweza zvense zvinadikana. [Kunza kwa "kudzateweza zvense zvinadikana" yenango malangirhe yatchintchino yakupangiza kuphimbidzula zvakusiyana phindi iri lakuchupha]. ¹⁹ Kutchenjera ndiko kuna ntsimba kuna munhu wakutchenjera, kupinda khumi wakulu wakulu muluwani libodzi. ²⁰ Hapana pantsi munhu wakutendeka kuti anaita zvamuche ese tchipo ananyangaza. ²¹ Hausateteki yentse masoko kuti unazvunziwa, thangwe zvinakwanisika nyamubasa wako atchikutuka. ²² Zvidatsazana, iwe mubodzi bodzi unadziwa kuti mumoyo mwako tchayimwo, kazinjikene, unakatuka wenango. ²³ Zvanse izvi ndazviphasisa nakutchenjera. Ndidalanga ine: "Ndinadzagala mutchenjeri"; apo izvi zvikali kuti ine ndingadakwanisa kugala. ²⁴ Kutchenjera kuli kutali ese kudazika maningi. Mbani angakuwone? ²⁵ Ndidahirinza moyo wangu kuti ndipfunzire, nditchilingisisa na kutola kutchenjera na kupanganidza tchakwadi, kuti tibvisise kuti kunyangala nkuphwaza ese kuti ese kuti uphwephwa ndi uswiru. ²⁶ Ndawonazve tchinakonza kupinda kufa ndiye anawonekayo mukadzi kuti moyo udadzala na maliwa futi na mambule, ese manja ndi matcheni. Weneule anada kuti kufantsise Mulungu anadzapukunyuka kuna iye, apo munyangazi anadzabatiwa naye. ²⁷ "Khodza zvangu ndawona", alikulanga mutchenjeri. Ndinakha thimizira zvakuwona kuna zvinango kuti ndiwone kupanganidza kwatchadiko. ²⁸ Izvi nddizvo zvangu nditchiri kuswaga, apo andinakuzviwona: "Ndawona munhu mubodzi wakutendeka pakati pa zana libodzi, apo mukadzi mubodzi pakati pawentse wenewale andilibe kumuwona". ²⁹ Ndidawona izvi zvoga: Mulungu adasika wanhu wakutendeka; apo iye adafundukira, atchiswaga nhukwala zakuwanda.