Muparidzi Kunza 12
1
Tsalakana zvako Musiki wako pantsiku za udjaha wako, azisti kuti ziswike ntsiku za nhukwara, futi yayasati kuswika magole kuti utchadzalanga: "Hapana tchido nazvo";
2
izvi yita hazvisati kuti tchiezera tcha dzuwa, tcha mwezi na tcha nyenyezi tchithime, ese makuti maswipa yahirire pakupera kwa madzi.
3
Itchadzaswika nguwa mulundi wanyumba atchadzatetema, ese wamuna wantsimba watchadzakotama, futi wakadzi watchadzasiya kugayisa, nakuda kwa kutchepa, futi weneule kuti wanalingisa kunza wamajanera hawadzawoni muche.
4
Inadzaswika nguwa kuti misuwo yamisewu inadzavaliwa, ese inadzawatamiza dhungu tchigayo; wanhu wanadzagala wakupatika na kunangula kwambalame, na kuyemba kwa mapfala iyawatsikana kunadzazambazika.
5
Inadzaswika nguwa kuti wamuna wanadzagala naurtchi ukulu na zvakunyangala mumisewu, pawo mudzinduyi unaita maluwa, payo makhumbidzi yananenepa, futi pazvo zvido zvidasikwa zvitchichota. Napenepo,mwamuna anadzaenda kunyumba wakwenda na kwenda ese wanyakulemerha wanadzatchitha na misewu.
6
Tsalakana zvako Musiki wako nzoi iyasiriva ayisati kuti yigwandike, kana kuti mbiya yagolide asati yaskika, kana kuti nkali, haisati yaskika pamainza, kana kuti viri alisati ragwa mumutchera;
7
pfumbi alisati kuti lihirire pantsi, kwalo lidabuda, futi muzimu uhirire kuna Mulungu watche adamupa.
8
"Makuti yakutoka", mutchenjeri alikulanga, "zvense ndi kutoloka kuti kunapinda".
9
Mutchenjeri akhadakula futi akapfunzisa wanhu ludziwo. Iye adapfunza ese adapeza, futi adalongedza zvamuche masoko.
10
Mutchenjeri anaswaga kunemba atchisenzesa masoko yakuwona na yatchadiko.
11
Masoko yawatchenjeri ndiwo ninga njema. Ninga perego kakukhomerha muche ndiwo masoko yamupfunzisi pakukonka masoko iyatche, kuti yanaparidziwa na mupastori.
12
Mwana wangu, funga muche kuna izvi: kunemba mabukhu mazinji hakulibe malire ese kupfunza maningi kuna netesa mwuwiri.
13
Mhera yazventse weneule anamakutu ndiye ngartche Mulungu, futi ngakoye mitemo iyatche, thangwe izvi ndizvo zvinadikana kuna wentse munhu.
14
Thangwe Mulungu atchadzauysa lentse basa lakutonga, pabodzi na zvensezvinhu zvakuswika, kana izvo zvigale zvamuche na zvakunyngala.