¹ Ninga ntchentche ibodzi yakufa yinamununtchi wakunyangala, nadyali, uphwephwa ukodo unakwanisa kupinda kutchenjera ese na kukuza. ² Moyo wamunhu wakutchenjera unatseamira kumarjo, apo moyo waphwephwa unatseamira kubvere. ³ Palo phwephwa linafamba munjira, nzeru zatche zidasiyana, litchipangiza kuna wentse kuti iye ndi phwephwa. ⁴ Kungati kuchatirha kwa mukulu mukulu kwamuka sososo na iwe, hausasiyi basa lako. Kuwatama kunawatamiza mulandu ukulu. ⁵ Pana tchakunyangala tchibodzi kuti ndinakhawona pantsi padzuwa, muchobo ubodzi wakuponya kuti kunauya na mukulu mukulu: ⁶ kuna maphwephwa wanapasiwa mupando wakutonga, napo wamuna wakutendeka, wana mipando idoko. ⁷ Ndinakwaona wanyamubasa watchikwira hachi ese wamuna wakuthembeka watchifamba namilenje, ninga wanyamubasa. ⁸ Weneule kuti anatchera djenje anamugwa mwenemo, ese kuti weneule anafudza tsose, nyoka yinakwanisa kumuluma. ⁹ Weneule kuti anapuntsa mawuwe anakonziwa nayo, futi munhu kuti anawadza nkuni anakonzeka nazo. ¹⁰ Yingati lezi yibodzi haina kuthwa, ese munhu mubodzi nkabe kuyinoza, napenepo iye anadikana kusenzesa ntsimba izinji; apo kutchenjera kuna mubaibai pabasa. ¹¹ Yingati nyoka iyaluma uku aisati kubudisiwa madzino, hakulibe mubaibai kuna nyakulapa. ¹² Masoko iya pamulomo wamunhu wakutchenjera iyanatonhoza, apo mulomo waphwephwa unamufudzisa. ¹³ Nadyali masoko iyanatanga kudzala pamulomo waphwephwa, uphwephwa unauya ese, pakupezesera, mulomo watche unadzala nauswiru wakunyangala. ¹⁴ Phwephwa anathimizira masoko, apo hapana anadziwa zvirikuda kuuya. Mbani anadziwa zvinadzaitika kuna iye? ¹⁵ Basa lantsimba la maphwephwa linawanetesa, kuitira kuti iwo hawadziwi njira iya muluwani. ¹⁶ Ona iwe, dziko, angati mukulu mukulu ndiye muphale, ese wanyakwawa wako watanga phwando tchakumatchibese! ¹⁷ Apo, idakombolerha ndiro, dziko, lingati mukulu mukulu walo ndi mwana adafuma, ese wanyakwaw watche wanarja nguwa tchayo, kuti waite ntsimba, ese nkabe kuti wamwe! ¹⁸ Nakuda kwa ubwa, ntsoyi inagwa, nakuda kwa kuthondonera manja, nyumba inagwa. ¹⁹ Wanhu wanalongedzera zvakurja kuti wafantse; vinyu inawisa tchido kulalama, ese mare inanswanswira zventse zvinadikana. ²⁰ Hausatuki mukulu mukulu, kana tchayimwo mumoyo mwako, futi hausatuki wapfumi munyumba mwako, thangwe mbalame iyakudzaulu inatola masoko iyako. Zventse zvina matenga zvinakwanisa kumwaza masoko.