¹ Wana wangu, ine ndikukunemberani zvinnhu izvi kuitira kuti muleke kuita zvakunyangala. Apo angati nyawuianu anyangaza, tina mubodzi nyakutidairira alipabodzi naBaba, Djeso Kristu, Watchadi. ² Iye ndiye nsembe waunyangazi wathu, futi nkabe basi kuna zvakunyangala zvathu, apo basi kuna pense pantsi. ³ Ife tikudziwa kuti Tinamudziwa, tinga koiya mitemo Iyatche. ⁴ Weneulu kuti anati: "Ine ndinamudziwa Mulungu", apo atchileka kukoiya mitemo Iyatche, ndinyakuphwata, futi tchadiko akulibe kuna iye. ⁵ Apo weneule anakoiya Masoko Iyatche, tchadi tchadi kuda kwa Mulungu kunadzazisiwa kuna munhu weneyi. Nakuda kwaizvi, tinadziwa kuti tirimuna Iye. ⁶ Weneule kuti anati lambirira muna Mulungu, anadikana basi afambe ninga Djeso Kristu adafamba. ⁷ Wadikani, handikunemberini mutemo uswa, apo mutemo wakale kuti mukanawo kubudira pakutanga. Mutemo wakale ndi Masoko kuti mudabva. ⁸ Napenepo, ndikuku nemberani mutemo uswa, kuti ndi watchadi muna Kristu na muna imwe, thangwe mudima tchirikupinda, ese tchiyezera tchatchadiko tchiri kubvenekera. ⁹ Weneule kuti anati ndiri mutchiezera ese anazonda mubale watche, atchiri mumudima. ¹⁰ Weneule kuti anada mubale watche analambirira mutchiezera, futi kuna iye hakuna tchinhu tchingamutsause. ¹¹ Apo weneule kuti anazonda mubale watche ali mumudima futi munaiwo anafamba; iye adziwi kwatche alikwenda, thangwe mudima wavala matso iyatche. ¹² Wana, ine ndiri kukunemberani thangwe unyangazi wanu unalekererha nakuda kwa dzina Latche. ¹³ Wababa, ine ndirikuku nemberani thangwe munadziwa Weneule kuti ndiye kubudira pakutanga. Madjaha, ine ndirikuku nemberani nathangwe munakunda zvakunyangala. Wana, ine ndidaku nemberani thangwe munadziwa Baba. ¹⁴ Wababa, ine ndidaku nemberani thangwe munadziwa Weneule kuti ndiye kubuda pakutanga. Madjaha, ine ndidaku nemberani thangwe ndimwe wantsimba, futi masoko iya Mulungu iyanalambirira muna imwe, ese munaka kunda zvakunyangala. ¹⁵ Lekani kuda dziko, kana zvinhu zviri munaiyo. Kuna weneulu anada dziko, kuda kwa Baba akusi kunaiye. ¹⁶ Thangwe zvense zviri mudziko, tchido tcha nyama, tchido tcha matso, futi kudziwa kwa kulalama, hakusi kwa Baba apo ndi kwapa dziko. ¹⁷ Dziko nazvido zvatche zvinapera. Apo weneule kuti anaita kuda kwa Mulungu kunalambirira kugala nakugala. ¹⁸ Wana, iyi ndiyo nguwa iyakupezesera. Ninga mudabva kuti mahedeni iyali kuuiya, tchintchino letu mazinji mahedeni iyali kuwoneka, ninga tirikudziwa kuti iyi ndiyo nguwa iyakupezesera. ¹⁹ Iwo wadabuda pakati pathu, apo awakasi wathu, wangadalambirira naife, apo iwo wabuda, ndizvo zvinapangiza kuti hawasi wathu. ²⁰ Apo muna muzimu kuti udabuda kuna Wakutchena, futi mwense munadziwa tchadi. ²¹ Ndidaku nemberani ne nathangwe laphwaza tchadi, apo nathangwe munatchidziwa futi apalibe kuphwata kunabaliwa natchadi. ²² Mbani muphwati kunza kwa weneule kuti analamba kuti Djeso ndiye Kristu? Ndiye muhedeni, weneule kuti analamba Baba na Mwana. ²³ Wense weneule kuti analamba Mwana, halibe Baba. Weneule kuti anadzindikira Mwana anaewo basi Baba. ²⁴ Apo kuna imwe, zvikoeni kuitira kuti zvilambirire muna imwe zvanu mudabva kubudira pakutanga. Zvingalambirira munaimwe zvenezvire kuti mudabva kubudira pakutanga, basi munalambirira muna Baba futi muna Mwana. ²⁵ Ese itchi nditcho tchitembeso kuti Iye adatiitira: kulalama kwaku gala nakugala. ²⁶ Zvinhu izvi ndidaku nemberani nathangwe la wenewale kuti walikuda kukutsausani pa tchaditchi. ²⁷ Apo, kuna imwe, muzimu kuti kuna Iye mudatambira ulambirire kuna imwe, kuti muleke kuchoterha na munhu kuti angadzaku pfunziseni. Apo, ninga muzimu Watche unakupfunzisani pamusana pazvinhu zvense, ese nditchadi ese akusi kuphwata, dyali ninga iwo udakupfunzisani, lambirirani muna Iye. ²⁸ Futi tchintchino, wana, lambirirani muna Iye kuitira kuti, patche Iye angadzatidzaza ntsimba, tigale nakutemba kudakwana futi tireke kunyazisiwa pamberi pa Iye pakuuya Kwatche. ²⁹ Mungati mulikudziwa kuti Iye ndi Wakutendeka, dziwani kuti wense weneule kuti anaita zvamuche ndiye mubarha Watche.