¹ Dié otô nkênu tanga Jizu vira ané galileu, ma sangi Pilatu ta zuntaru ku popi lêndê ané. ² Jizu fa ané: Sê ka kunda ma ané galilêu é sa ma masi pekarô ku sa turu otô galilêu punda kuai ma ané parisê mora é! ³ Nga fa sê ma ynga. Mazi si sê na lependê wha, turu sê ka muê mora é mé. ⁴ Ô ané kuini nké ku ulukua Silué sô mata, ané sê kunda ma ané sa masi kuraru rokê otô nkênu Jeruzalê! ⁵ Nga fa sê ma ynga. Mazi si sê na lêpendê wha turu sê ka muê. ⁶ Jizu fa turu vêzi é: Whã omé ta ku whã figu kunaru lêtu mevia rê. Sô ê biri ngolo mé rê ê na bê wha. ⁷ Anto ê fa omé ku ka taba mevia é: Pia ma têsi anu za ma mbi ngolo mé pó figu é na bê wha. Koté ta! Ra kuay ma ka desé rana mavu! ⁸ Ê kundjié: Desé anu é anda, pan vina boro rê sô adubé! ⁹ Si ê ra mé anu kabi sa buaru. Si ê na ra wha a ka simbé! ¹⁰ Sô Jizu ta ka sina lêtu whã ngêza whã sabru. ¹¹ Sô ané bê whã mengay ku ta kuini naké anu ku ta ku whã supitu ry doêtxi, ê ta ka nda bazaru, ê na ka pô lata ndja wha. ¹² Ma ê bê Jizu, ê samé fa: mengai bô sa livi doêtxi ô. ¹³ Ê pê mon riba rê, ta sô ê lata ndja da goia ra Dêsu. ¹⁴ Mazi, chefi ngêza fika ku leva ra Jizu ma ê kula ni ria sabaru. Anto chefi fa ané nkênu ku ta nha: Samanó ria ma Ê tê dêtu taba. Bi punda Bô ka yôgo ané ria é mazi sabaru wha. ¹⁵ Sun kundjié fa: Findjiru! Kuali sê ku na ka biri ubua mburu ô buê sô bé kuê ba bêbê aua ny sabaru wha! ¹⁶ Antó ná Abron é ma demono pê pezu na kuini naké anu, ma a na pô soté ria sabaru wha! ¹⁷ Ola Ê fa ané kua é, turu ané ku ta ka kôntê fika ku vegonha, mazi turu nkênu fika ku ngoso ku turu kua buaru ma Ê zi. ¹⁸ Anto Jizu fa ané: kuay ku sa mora lênu Dêsu! ¹⁹ Ê sa mora whã unkuê lôsô ma whã omé zuga pê mevia: sô ê kula bila whã pó ngairu, sô situ osé zi zombe pê tago rê. ²⁰ Jizu tô fa: kua ma ka poi mindji ku lênu Dêsu! ²¹ Ê sa mora fumentu ma whã mengai tua zunta ku têsi ndjira fanha atê ma turê fomenta. ²² Jizu ta ka vizita tô sina kara posó ku vila modja Jêruzalê. ²³ Nkênu puté: Sun txo sô ku ka sava! Anto Jizu fa ané: ²⁴ Zi whê dizu pa sê letxa poto mangu punda nga fa sê yô nkênu ka ngolo letxa né mazi ê na ka poi wha. ²⁵ Whã vê ma dono kay ka lata fisa poto, anto sê ka fika lua ka batê poto ka fa: Sun, Sun desa non letxa! Ê ka fa sê: na ta sê wha né na ta nga ma sê by né wha! ²⁶ Anto sê ka fa! Non ka mé bêbê ku ô sô Bô ka sina non lua! ²⁷ Mazi Ê ka kundji fa: nga fa sê ma na ta andji ma sê sa wha. Siê fô kota un, sê ku ka zi mali! ²⁸ Sô ê ka bi tê sua ku mé dêtxi ola sê ka bê Abron, Zaki ku Jako ku turu pofeta ni Lênu Dêsu, mazi a ka zuga sê ta. ²⁹ Ané ka bi fô notxi ku sulu lesti ku oeti sô tasó meza ni Lênu Dêsu. ³⁰ Punda utimu ka sa pumbêlu sô pumbêlu ka sa utimu. ³¹ Sô pouko tempu whã whã farizeu bi kota Rê sô faré: Beô fô ingé punda, Lori sêka ngolo Ô pê mata. ³² Jizu fa: ba fa lagaia é: Ma nga kolê ku demono tô kula ozé ku mungu sô ri têsi ria nga loké. ³³ Punda sela un mbé ozé, mungu ku otô ria, punda ê na toka pa whã pofeta ka muê londji Jêruzalê wha. ³⁴ Jêruzalê Jeruzalê ku ka mata ane pofeta tô ra ku buru nkênu si ma manda. Kuantu vê ma ãn mêsê zunta na ô asié mora whã nganha ka zunta na rê kosi aza rê, mazi bô na mêsê wha. ³⁵ Ma kay sê sa bandonaru. Nga fa sê ma sê na ka bê un atê ola ma sê ka fa: Buaru sa nkênu ku ka bi nomi Sun.