¹ Sô di kuê, sô Sun manda ôtô setenta sô dousu sô livu nákulu na tê kua sisikaru é wha, sô manda ane dy dousu ni dousu, ni whê Rê ba turu ane posó ni lugê andji Ê ta vonté bé. ² Ê ta fa ane: suvisu sa ngairu, mazi ane tabarô sa pôkô. sô di kua é ji lason da Sun ra kolheta pa Ê manda tabarô pa ba kolheta Rê. ³ Bé! Aié An nga manda sê mora ombô ni katxi di lobu. ⁴ Na bé ku né whã saku di lêlu wha, né mola di viaji, né sandalha, sõ nafa mantxa da né whã nguê ni mondja wha. ⁵ Ni kualikeru kai ku sê ka letxa, fa pimbêlu: Ni paji ka sa ni kai é! ⁶ Si ingê tê whã di paji, sô paji sê ka sa ni diba ane, mazi si ê na tê wha, ê ka tô bi diba sê. ⁷ Dja sê ni kai é mé, mé sô bêbê kua ma ené sa kuê, punda ené tabarô merésê tua lêlu di ane. Na ka sa fika ka mura di kai ku kai wha. ⁸ Ni kuali kéru posó ku sê ka letxa, ku ka tua sê, mé kua ma ené ka pê ni whê sê, ⁹ sô kula ené duetxi ma nha sa kuê. Fa ene: sô Lenu di Dêssu sa xiga da sê. ¹⁰ Mazi ni kualikeru posó ku sê ka letxa, si na tua sê wha, xiê ba lua sô fa: ¹¹ Atê mora iku di posó sê suza opé non tá, bané kontra ane! Mazi sê ka bi ta di kuê é, ma Lenu Dêssu sa petu. ¹² An nga fa sê ma, ni ria di zugamentu, ê ka tê maxi perôn da Sodôma dô kuê da posó xiza. ¹³ Ai di bô, Korazin! Ai di bô, Bestsaida! punda, si ane milagre ki foi ziru ni sê ka sa ziru ni Tiru ku Sidon, ka tê yô tempu za ma ene ka sa lependiru, ka sa tasoru diba xindja, ni panu saku. ¹⁴ Ni mora é, ka tê maxi peron da Tiru ku Sidon ni zuizu dô ki pa sê. ¹⁵ Bô Kafarnaun, bô axia ma ô kaza lataru atê osé! Di mora é, bô ka sa bêru ba baxó, ni fenu. ¹⁶ Ixi ku kandê sê, ka ndê An, sô ngê ka zeta sê, ka zeta An té, sô ene ixi ku ka zeta un ene té ka zeta ngê ku manda Un. ¹⁷ Ane setenta sô dousu, tô bi ku gostô, fa: Smuê, atê ane demono ka baza punda nomi Ô. ¹⁸ Jizu fa ane: An ta ka bê satanas ka kiê di osé mora miamia. ¹⁹ An nga da sê purê pa piza kiongô ku eskopion, ni diba turu poru di numigu, sô né whã kua ka bi di mora di zi sê mali. ²⁰ Sô ni mora é, na fika gosto di setu di ene supitu sa baza da sê, mazi sê ka sa ki gostô anda mazi punda nomi sê kasa lokêru ni osá. ²¹ Ni ola é, Ê gogo ni Supitu Santu, fa: Nga louva Ô, Pai, Sumu di osé ku tia, punda Bô kondê turu kua é da ene ku sa ku sebê ku konhesimentu, mazi biri ane da enguê ku sa blutu mora anzu thororó. Axe, Pai é, punda axié sa buaru ni whê ô. ²² Suru ane kuê foi kufiaru ra un ni Pai Un, né whã nguê konsê nguê sa Ná xi ê na sa Pai, sô né whã nguê konsê Pai xi ê na sa Ná wha sô nguê ixi ma Na mesê biri. ²³ Ê, bila da ene maiêlu, Ê fa ku ane pataru: gosô sa nguê ku ka pia ane kua ma sê bê. ²⁴ Punda An nga fa sê ki yô pofeta ku alê ta ka ngoló pia ene kua ki sê ka be, amzi ane na poi bê wha, ndê ane kua ma sê ndê, sô na ndê wha. ²⁵ Sô na setu mesê dy Alê zurê lata pa punté, fa: Mesê, kua nga pô zi pan léda Vira longô! ²⁶ Jizu fa dé: kua ku sa sixikaru ni alê! Ma ô ka lê! ²⁷ Antó Ê kundji: Gogo ku Sun Dêssu ô ku turu koso ô, ku turu alima ô, ku turu fosa ô sô turu sintxiru ô, sô ku ane ngê sa zuntu ô mora ô mé. ²⁸ Jizu faré: Bô kundji buaru, zi kuê bô ka vivê ²⁹ Mazi mesê, ta ka mesê justifika, punta da Jizu: sô ngê sa zuntu un! ³⁰ Ni kundji, Jizu fa: whã ome tuka di Jeruzalen pa Jeriko, ê kiê ni mon di ladron ku txié turu kua rê, dé ku kua sô desé kusnada motxi. ³¹ Sô ra kua whã sasedoti ta tuka ni mondja é sô, ola é bê, laré ni otô kiba. ³² Mora é mé whã levita, ola ê ndu ni luguê é sô ê bê, mora ê larê ni otô kiba. ³³ Mazi whã samaritanu ki ta ka bé di viaji ndu petu rê sô bê xialé di pena. ³⁴ Sô saia bi zuntu rê, laba kitó rê, lukua mazi ku vin diba rê. Ê pê diba animali di rê plopi, bekuê pa whã hospedera sô kuida rê. ³⁵ Sô ria ê ba whê, txia dousu lelu da ene hospederu sô fa: trata rê, sô kualikeru dispeza ma sê zi maxi, ola nga bila, an nga paga sê. ³⁶ Kuali di ene tesi, ni opinion ô, foi proximu di nguê isi ki kiê ni mon ladron! ³⁷ sô mesê ale fa: nkênu isi ki sintxi pena rê Jizu fa ré: Bé sô zi mora é mé. ³⁸ Ola Jizu ku ene maiêlu ta viaja, ene letxa whã vila sô whã setu mengai ka sama Mata resebê ene ni kai rê. ³⁹ Ê tava ku whã mana sama Maria, ê ta fika tasoru ni opé Sumu sô ndê lumba rê. ⁴⁰ Marta, ta kiolokiolo kuparu ka zi mé pa xivi. Ê bi atê Jizu, sô fa: Sumuê, Na ta xatiaru ma mana ka lega un zi ku sô wha! Faré, fenfavolô, pê zura un. ⁴¹ Mazi sô Sumu kundji, faré: Marta, Marta, bô sa kiolokiolo diba sô kua, ⁴² maji whã kua sô sa buaru. Maria koiê kua sa ben buaru, sô parte xié na ka sa tuaru wha.