¹ Koma mafala yachipolofita ambalewadi kuti pa nthawe yaku sogolo, anango azagwe pa chisimikizo, ndawa yakutetekela mafala ya chipolofita, amweyawo niwakutaikisa, apo manje nivifhunziso vaviwanda. ² Vimweivi vizachitikepomwe basi ndawa chautsotsi wa wanthu wakulewa vakunama, pomwe chikhumbu n'tima chawoicho chili ninga chitswanga chakuchokela pakutswa na chisimbi chapamoto. ³ Wanthu amweyawo azalambize wanthu kuloolewa, manje azapeleke n'temo kuna wanthu kuti a leke kudiya vakudiya vinango vimwe Mulungu anavisika kuti wanthu awo ali na chisimikizo na wakudziwa chadidi mwakutoweza ambadiye kulewa mwaphata basa. ⁴ Nikuti so ndawa yakuti chilichense chakusikiwa na Mulungu ni chabwino, manje apo palibe chimwe chifunika kulambiwa chikakhala kuti chatambiliwa kulewa mwaphata basa, ⁵ ndawa yakuti chimbachenesewa na mafala ya Mulungu naku pemphela. ⁶ Ndawa yaku peleka mitemo iyi kwa chibale, uzakhale m'nthumiki yabwino ya Kristu Yesu, apo ukule bwino na mafala a chisimikizo manje chinfwunziso chabwino nichimweichi wachitoweza mwakuchi chengeta. ⁷ Manje apo umbapatukapo pa nkhani zamagu'nkha zimwe zimbaipisa vinthu vakuchena vimwe azimayi wakukalamba vambalewa, pambuto pavimweivi, ukhale na kujailila chakuita vinthu vakukuthandiza kuti ukhalebasi wakuzipeleka kuna Mulungu. ⁸ Pakuti kuita masenzeka wakulimbisa thupi nikwaku phindilisa padiki, manje kukhala wakuzipeleka kuna Mulungu kuna phindi mu vense, ndawa kumbaguma chipangano cha moyo uno, na moyo ukubwela uyo. ⁹ Mafala amweyawa ni wachadidi, ni wakufunikila kuwa tambila na n'tima wense. ¹⁰ Na ndawa yavimweivi, tikuphata basa mwaku limbikila namphanvu, ndawa kuyembekeza kwaise kuli muna Mulungu ana moyo, omwe ndiye mpulumusi wa wanthu na khaindi iliyense, makamaka wakudalilika. ¹¹ Pitiliza kuwa fwunzisa na kuwa tonga kuti ambaita vimweivi. ¹² Osa lekelela kuti munthu aliwense aku akudelele pakuona kuti ndiwe m'diki, m'malo mwavimweivi khala ezempulo kwa wakudalilika, mukalewelewedwe, pakakhalidwe, mukufunana, na muchisimikizo, naka khalidwe kamuche. ¹³ Pomwe ukunidikhilila yendelela kukhala wakuzipeleka paku welenga pakati pa wanthu, pakuwa dandaulila na pakuwa fwunzisa. ¹⁴ Osa nyozela daliso iyo yuulinayo, imwe iunapasiwa nandawa yachi polofita, pomwe gulu ya akulu akulu inakuikha manja pa iwepo. ¹⁵ Fungafunga vinthu vimweivi mwakubisika, zipeleke pa vinthu vimweivi kuti wanthu wense aone kuti ukuyenda pasogolo. ¹⁶ Nthawe zense umbazichengeta na vimweivo viumbachita, apo na vimwe viumba fwunzisa, yendelela kuita vimweivi, ndawa ukaitaso uzazipulumuse wekha, na wale wanthu akukutetekela.