¹ Inepo Paulo, nthumiki ya Kristu Yesu mwakulamuliliwa na Mulungu Mpulumusi wa wathu, na Kristu Yesu omwe ndiye kuyembekeza kwathu, ² nikulembela iwepo Timotiyo, mwana wangu chaiyechaiye pa chisimikizo: so kukoma ntima kumweuku, na nsinsi, na kusangalala, kuchokela kwa Mulungu ababa kwa Kristu Yesu Ambuye wathu zikhale naimwe. ³ Pale manje ninasala pang'ono kuyenda ku Makedoniya, ninakulimbikisa kuti ukhale basi ku Efeso.nikukulimbikisa pomwe kuti ukhale basi kumweuko, uwalambize wanthu wanango awo kuti aleke kuphunzisa chiphunziso chakusiyana na chathu, ⁴ manje so kuti asatetekele nkhani zakunama, na kusokonezana mumadzinza ya makholo, vimweivi viphindulisalini, koma vingoyambisa mivunzo, manje viphindulisalini wanthu muchilichense chakuchokela kwa Mulungu chakulewa za chisimikizo. ⁵ Manje, chakufuna kutonga vimweivi vakuti tikhale na chikondi chakuchokela muntima wakuchena, makumbukidwe yabwino, manje so nachisimikizo chakusaya kunama. ⁶ Wanthu anango alamba kutowelela vimweivi manje ataikisidwa ayamba kutowelela nkhani zakusaya basa. ⁷ Amweyawa ambafuna kukhala aphunzisi a chilamulo manje akukumbukilalini vomwe alikulewa kabanga nfundo zomwe akuzilimbikila. ⁸ Tidziwa kuti chilamulo ni chabwino ngati munthu achiphatisa basa mwakufunikila. ⁹ Viliso pakudziwa nfundo iyi yakutiso, ntemo imbaikhiwalini ndawa ya munthu wabwino, imbaikhiwa ndawa ya wanthu wakusaya kunva mitemo, wakulamba kutogewa, wakuleka kugopa Mulungu, wakutaza, alibe n'tima wabwino, akunyoza vinthu vakusankhuliwa, wakuphaya azipayiwawo na azimayiwawo, wakuphaya wanthu. ¹⁰ Akusamwa, azimuna kuita chiwelewele na azimuna anzawo, wakuba wanthu, wamagunkha, kulumbila njanzi yakunama, ndipo manje wakuita chinthu chilichense chakuleka kunvelana na chifunziso pa kuchiteweza. ¹¹ Chifunziso chimweichi chakunvelana na mafala yamuche akulemelela omwe anawaikha manja mwangu, wakuchokela kuna Mulungu wakukondwa. ¹² Ine nikuti mwaphata basa Kristu Yesu Ambuye wathu awo ananipasa mphanvu pakuona kuti ndine wakuthembeka manje ananipasa basa. ¹³ Anaita vimweivi ningakhale kuti kalekale nikali wakunyoza Mulungu, wakubonelesa wanthu wake, wazungo pomwe, manje ananiitila nsinsi ndawa yakuti nikadziwalini ndawa yakusaya kusimikiza. ¹⁴ Manje ninatambila n'tima wabwino kwenekwene, kwa Ambuye waise, ninatambila pomwe chisimikizo na chikondi chakuchokela mwa Kristu Yesu. ¹⁵ Mafala wakulewa kuti Kristu Yesu anabwela mudziko kuzapulumusa wakuchimwa, ni mafala wachadidi ni wakufunika kuvumila na n'tima wense, na wakuchimwa amweyawa, ine ndine wakuchimwa kwenekwene. ¹⁶ Apo manje ananichitila nsinsi kuti Kristu Yesu awonese kubweza m'tima kwaiye kwense kuchokela mwa ine wakutaza kwenekwene, kuti ikhale yezempulo kwa wale azamudalile chakufuna chakuti akapeze umoyo wakusayakumala. ¹⁷ Kwa Mfumu yakuyendelela, yomwe ikufalini, iwonekalini, ndiye hekhauyo ali Mulungu, kwa umweuyo apasiwe ulemo na ukulu wakuyendelela. Ameni. ¹⁸ Mwana wangu Timotio, nikukutonga kuita ivi ndawa yachipolofita omwe analewelatu zaiwepo, kuti mwakunvelana na chipolofitaicho upitilize kumenya nkhondo yamuche. ¹⁹ Ukhale na chisimikizo kukumbuka kwabwino chimwe anango akuchifutusila kumbali, poti chisimikizo chawo chaphwanyika ninga bote. ²⁰ Anango mwamweyawa ni Hemenayo na Alekizanda, manje napeleka kwa sathana kuti akalangiwe, anfwunzile kuti afunikalini kulewa mwakunyoza Mulungu.