¹ Kodvwa wena, khuluma lokufanele imiyalo yeliciniso. ² Fundzisa emadvodza lamadzala kutsi ahlonipheke, azitse, asanguluke, aphile ekukholweni, elutsandvweni, nasekubeketeleni. ³ Kanjalo ufundzise bomake labadzala kutsi bahlonipheke ngesimilo, bangabi tinhlebi nome tigcili tekudzakwa, kepha babe bafundzisi balokulungile, ⁴ futsi fundzisani bomake labancane kutsandza emadvodza abo nekutsandza bantfwababo, ⁵ babe ngulabacondzile, labahlantekile, babe ngulabaphetse kahle tindlu tabo, futsi bahloniphe emadvodza abo, khona livi laNkulunkulu ngeke lihlanjalatwe. ⁶ Ngalokufanako, khutsatani labadvuna labasebancane kutsi batitsibe. ⁷ Kuko konkhe nitivete nisibonelo semisebenti lelungile. Ekufundziseni kwenu, khombisani bucotfo, nekuhlonipheka, ⁸ nemlayeto loliciniso longagcekeki, khona ke noma ngubani lomelana nani ahlazeke ngoba kute lokubi labangakusho ngatsi. ⁹ Tigcila kyfanele kutsi tilalele baphatsi bato kuko konkhe, tingaphikisani nabo kepha nibajabulise, ¹⁰ tingabebeli, kodvwa esikhundleni saloko, tibonakalise lonkhe lukholo lolungile, kuze kutsi etintfweni tonkhe bente sihlonipheke lesifundziso ngaNkulunkulu uMsindzisi wetfu. ¹¹ Phela umusa waNkulunkulu wensindziso yabo bonkhe bantfu sewubonakalisiwe. ¹² Uyasicecesha kutsi sikudzele kungakholwa netinkhanuko telive, bese siphila ngekuzitsa, sime sicondze, nekumesaba Nkulunkulu kulesikhatsi, ¹³ sisabuke phambili kwemukela litsemba lelibusisekile letfu, kubonakala kwenkhatimulo yaNkulunkulu wetfu lomkhulu neMsindzisi Jesu Khristu. ¹⁴ Jesu watinikelela tsine kuze asihlenge ebubini nekutsi atentele bantfu labahlantekile ngalokukhetsekile labanenshisekelo yekwenta imisebenti lelungile. ¹⁵ Khuluma ngaletinfo leti, khutsata bantfu kutsi batente, futsi ubacondzise ngawo onkhe emandla. Akungabikho lokubukela phasi.