¹ Ngesikhatsi Jesu abona leticuku, wenyukela etulu entsabeni. Wefika wahlala phasi, bafundzi bakhe beta kuye. ² Wavula umlomo wakhe wabafundzisa, watsi, ³ ''Babusisiwe labamphofu emoyeni, ngoba umbuso welizulu ngewabo. ⁴ Babusisiwe labakhalako, ngoba bayawudvudvutwa. ⁵ Babusisiwe labamnene, ngoba bayawudla lifa lemhlaba. ⁶ Babusiswe labo labalambile bomele kulunga, ngoba bayawusutsiswa. ⁷ Babusisiwe labanesihawu, ngoba batawuhawukelwa. ⁸ Babusisiwe labahlantekile enhlitiweni, ngoba bayawumbona Nkulunkulu. ⁹ Babusisiwe labalamulako, ngoba batobitwa emadvodzana aNkulunkulu. ¹⁰ Babusisiwe labo labatingelwa ngenca yekulunga', ngoba umbuso welizulu ngewabo. ¹¹ ''Nibusisiwe uma bantfu banetfuka banitingele basho lonkhe luhlobo lwetintfo letimbi ngani banicalela emanga ngenca yami. ¹² Jabulani nitfokote, ngoba umvuzo wenu mkhulu ezulwini. Ngobe baphrofethi labaphila ngaphambi kwenu bantfu babatingela ngalendlela lena. ¹³ ''Niluswayi lwemhlaba. Kepha uma loluswayi selulahlekelwe bunandzi balo, bungabuyiselwa njani lobunandzi futsi? Alusenamsebenti walutfo ngaphandle kwekutsi lulahlwe ngaphandle lunyatselwe ngaphasi kwetinyawo tebantfu. ¹⁴ Nikukhanya kwemhlaba. Lidolobha lelakhiwe entsabeni lingeke lifihleke. ¹⁵ Angeke bantfu balayide sibane basibeke ngaphasi kwebhasikidi, kepha ngamane sibe kulokwekumisa sibane, bese sikhanyisela wonkhe umuntfu losendlini. ¹⁶ Kukhanya kwakho akukhanye embikwebantfu ngendlela yekutsi babone tento takho letilungile bese udvumisa Babe wakho losezulwini. ¹⁷ ''Ningacabangi kutsi ngitele kutobulala umtsetfo noma baphrofethi. Angiketeli kutobabulala bona, kepha kutogcwalisa bona. ¹⁸ Ngoba ngicinisile ngitsi kini kutawuze kwendlule lizulu nemhlaba, kute ngisho licashata linye noma sihloko sinye lesitawususwa emtsetfweni, kuze tonkhe tintfo tagcwaliseka. ¹⁹ Ngako ke loyo lophula munye walemitsetfo futsi afundzise labanye kutsi bente njalo utawubitwa ngalomncane embusweni wasezulwini. Kepha loyo loyigcinako yona futsi ayifundzise utawubitwa mkhulu embusweni wasezulwini. ²⁰ Ngoba ngitsi kini ngaphandle kutsi kulunga kwenu kwendlule lokulunga kwetati nebaFarisi, ningeke noma nganguyiphi indlela ningene embusweni welizulu. ²¹ ''Nivile kutsi kwashiwo kubo ngetikhatsi takadzeni, 'Ungabulali,' futsi, 'Loyo lobulalako utawuba sengotini ekwehlulelweni.' ²² Kepha ngitsi kuwe wonkhe lotfukutselela umnakabo utawuba sengotini yekwehlulelwa; futsi loyo lotsi kumnakabo, 'Wena silima semutfu! utawuba sengotini emtsetfweni; futsi loyo lotsi, 'Wena silima!' utawuba sengotini yemlilo wesihogo. ²³ Ngaloko ke uma utawunikela sipho sakho elatini bese lapho khumbula kutsi umnakenu unemavundvo nawe, ²⁴ shiya sipho sakho lapho embikwe lilati, bese uhamba endleleni yakho. Kwekucala buyisanani nemnakeni, bese uyeta unikele sipho sakho. ²⁵ Vumelana masinyane nalowo lenimangalelane naye usesenaye nisaya enkantolo, noma ummangaleli wakho angakunikela kubehluleli, behluleli bakunikele emaphoyiseni, futsi uphoswe ejele. ²⁶ Ngicinisile ngitsi kuwe, angeke uphume lapho uze ubhadale imali yakho yekugcina loyikweletako. ²⁷ ''Uvile kutsi kwatsiwa, 'Ungaphingi,' ²⁸ Kepha ngitsi kuwe loyo lobuka lomsikati amkhanuke sewuvele uphingile naye enhlitiyweni yakhe. ²⁹ Uma liso lakho langesekudla likubangela kutsi wone, likhokhe kuwe ulilahle. Ngoba kuncono kutsi incenye yemtimba wakho ibhubhe kunekutsi umtimba wakho wonkhe ufakwe esihogweni. ³⁰ Uma sandla sakho sangasekudla sikubangela kutsi wone, sijube kuwe usilahle. Ngoba kuncono kuwe kutsi kunye kwaletincenye temtimba wakho kulahleke kunekutsi umtimba wakho wonkhe uye esihogweni. ³¹ Futsi kwashiwo, 'Lowo lolahla umkakhe, akamunike incwadzi yesehlukaniso.' ³² Kepha ngitsi kini wonkhe muntfu lolahla umkakhe, ngaphandle kwekubangwa bugwadla, kumenta umphingi. Lowo lomshadako emva kwekuba alahliwe uyaphinga. ³³ ''Futsi, nivile kutsi kwashiwo kulabo betikhatsi takadzeni, 'Ungafungi sifungo lesingemanga, kepha feza sifungo sakho eNkhosini.' ³⁴ Kepha ngitsi kini, ungafungi kwasanhlobo, nome ngelizulu, ngoba sihlalo sebukhosi saNkulunkulu; ³⁵ hhayi nangemhlaba, ngoba usenabelo setinyawo takhe; hhayi ngeJerusalema, ngoba lidolobha leNkhosi enkhulu. ³⁶ Ungafungi ngisho nangenhloko yakho, ngoba angeke wente ngisho lunye lunwele kutsi lube mhlophe nome lube mnyama. ³⁷ Kepha tinkhulumo tenu atibe ngu 'Yebo, yebo,' noma 'Cha, cha.' Noma yini lokungetulu kwaloku kuchamuka kulomubi. ³⁸ ''Nivile kutsi kwashiwo, 'Liso ngeliso, nelitinyo ngelitinyo.' ³⁹ Kepha ngitsi kini, ningamelani namunye lomubi. Esikhundleni, lowo lokushaya esihlatsini sangesekudla, mnikete lelesinye futsi. ⁴⁰ Nangabe nomangabe ngubani afisa kuya nawe enkantolo atsatse lihembe lakho, mvumele lomuntfu kutsi atsatse lijazi lakho. ⁴¹ Lowo lokucindzetela kutsi uhambe likhilomitha linye, hamba naye lamabili. ⁴² Muphe noma ngabe ngubani lokucelako, ungamfulatseli noma ngubani lofisa kuboleka kuwe. ⁴³ ''Nivile kutsi kwatsiwa, 'Kumele utsandze makhelwane wakho bese uzonda sitsa sakho.' ⁴⁴ Kepha ngitsi kini, tsandza sitsa sakho bese uthandazela labo labakonako wena, ⁴⁵ khona nitoba madvodzana aBabe wenu losezulwini. Ngoba wente lilanga lakhe liphume kulababi nalabahle, atfumele imvula kulabalungile nalabangakalungi. ⁴⁶ Ngoba uma utsandza labo labakutsandzako, mvuzo muni lowutfolako? Abenti loko yini ngisho nebatselisi? ⁴⁷ Uma ubingelela bazalwane bakho, nenta buncono buni kunalabanye? Abenti loko yini ngisho nebetive? ⁴⁸ Ngako ke kumele nibe ngulabaphelele, njengoba naBabe wenu losezulwini aphelele.