¹ Incwadzi lelengakubhalela yona,Thiyofelasi, yalandzisa ngako konkhe Jesu lacala kukwenta nekukufundzisa, ² kwaze kwaba lilanga lapho enyuswa khona, emvakwekuba anikete bafundzi labebakhetsile imilayeto ngaMoya Longcwele. ³ Emvakwekuhlushwa kwakhe, wativeta angulophilile kubo ngebufakazi lobunyenti ngalokusebaleni. Emalanga langemashumi lamane wativeta kubo, wakhuluma kubo ngembuso waNkulunkulu. ⁴ Ngalesikhatsi ahlangana ndzawonye nabo, wabayala kutsi bangesuki eJerusalema, kodvwa bamele setsembiso saBabe, lasho ngaso watsi, "nivile ngami kutsi ⁵ ngempela Johane wabhabhatisa ngemanti, kodvwa kudze madvutane nitawubhajatiswa ngaMoya Longcwele." ⁶ Ngesikhatsi sebahlangene kanyekanye bambuta batsi,"Nkhosi, sengiso lesikhatsi lotawubuyisela ngaso umbuso ku Israyeli? ⁷ Watsi kubo, "akusiko kwenu kwati tikhatsi letimiswe ngu Babe ngemagunya akhe. ⁸ Kodvwa nine nitawemukeliswa emandla Moya Longcwele makehlela kini, nitaba boFakazi bami eJerusalema nakulo lonkhe leJudiya, neSamariya, nasemkhawulweni wemhlaba jikelele." ⁹ Ngesikhatsi Inkhosi Jesu seyicedzile kukhuluma tonkhe letintfo, basa buka etulu, wenyuswa embikwabo, lifu lamusitsa emehlweni abo . ¹⁰ Basebhekise emehlo abo ezuluwini asahamba, ngekuphatima kweliso, emadvodza lamabili labembetse tembatfo letimhlophe ema phambi kwabo. ¹¹ Atsi, "madvodza aseGalile, nimeleni lapha nibuka ezulwini? Lo Jesu lona lenimubone enyuswelwa ezulwini asuswa kini, utawubuya njengalendlela lenimubone ahamba ngayo kuya ezulwini." ¹² Babese sebabuyela eJerusalema besuka enstabeni yemincumo, ledvute neJerusalema, lengaba lilanga leliSabatha budze. ¹³ Batsi Nabefika , benyukela ekamelweni lelingenhla, lapho bebahlala khona. Bekubo Phetro, Johane, Jakobe, Andreya, Filiphi,Tomase, Batholomewu, Matewu,Jakobe umsa waAliyfosu, Simiyoni umZelothi, na Judas umsa waJakobe. ¹⁴ Bebatinikele nemgomo munye wekukhuleka, kanye nebesifazane, kanye naMariya make waJesu, kanye nabanakabo. ¹⁵ Kulawo malanga Phetro wasukuma embi kwebazalwane labekubantfu labebangema 120, watsi, ¹⁶ "Bazalwane, bekuswelekile kutsi umbhalo ufezeke, loko lokwakhulunywa nguMoya Longcwele ngemlomo wa Davide, mayelana naJudas lobekahola labo lababopha Jesu. ¹⁷ Ngobe angulomunye wetfu futsi wemukela incenye yalenkonzo." ¹⁸ (Leyo ndvodza yatsenga sivandzi ngaleyo nzuzo layitfola ngesento sayo lesibi, ngenca yaloko wawa ngenhloko, umtimba wakhe wavuleka emkhatsini, ematfumbu akhe onkhe acitseka asabalala. ¹⁹ Bonkhe labahlala eJerusalema beva ngaloko, babese babita leso sivandzi ngeligama ngelulwimi lwabo batsi yi "Akeldama", lokusho kutsi , sivandzi sengati.") ²⁰ Ngoba loku kubhaliwe encwadzini yeTihlabelelo, 'sivandzi sakhe asentiwe sibe yindzawo lengenamuntfu ; 'Akube nalomunye lotsatsa indzawo yakhe yebuholi.' ²¹ Ngako ke, kuswelekile, kutsi yinye yalamadvodza beyisolo ihamba natsi sonkhe sikhatsi Inkhosi Jesu ingena iphuma emkhatsini wetfu, ²² kusukela esikhatsini sembhabatiso wa Johane kuyewufika esikhatsini lapho atsatfwa emkhatsini wetfu khona, abe ngufakazi kanye natsi ngekuvuka kwakhe kulabafile." ²³ Kwabekwa emadvodza lamabili embikwabo, Josefa lobekutsiwa ngu Bhasabasi, lobephindze kutsiwe ngu Justusi, na Mathiyasi. ²⁴ Bathantaza batsi, "Wena, Nkhosi, wati tinhlitiyo tabo bonkhe bantfu, ngako ke yembula kutsi kulamadvodza lamabili nguyiphi loyikhetsile ²⁵ kutsi itsatse indzawo kulenkonzo nebuPhostoli leJudasi ayifulatsela waya endzaweni yakhe." ²⁶ Kwentiwa inkatho, yawela ku Mathiyasi, wabalelwa kulabaPhostoli labalishumi nakunye.