¹ Josiah bekaneminyaka lesiphohlongo nakacala umbuso wakhe; wabusa iminyaka lengemashumi lamatsatfu kakunye aseJerusalema. Libito lenina kwakunguJedidah(bekayindvodzana ya-Adaiah waseBozkath. ² Josiah wenta lokuhle emehlweni aSimakadze. Wahamba ngato tonkhe tindlela taDavide khokho wakhe, phindze wangajiki ngisho kuya ngesekudla nobe kuya ngesencele. ³ Kwenteka ngesikhatsi semnyaka welishumi nesiphohlongo wembuso wenkhosi Josiah kutsi watfumela Shaphan umbhali indvodzana ya-Azaliah loyindvodzana yaMeshullam, kutsi iye endlini yaSimakadze, itsi, ⁴ ''Hamba uye kuHilkiah umpristi lomkhulu umtjele abale imali leletfwe endlini yaSimakadze lebutsiswe bogadzi belithempeli laSimakadze esiveni. ⁵ Ayiniketwe esandleni setisebenti letibuke indlu yaSimakadze, bayinike tisebenti letingekhatsi endlini yaSimakadze kutsi bavusetele imonakalo ethempelini. ⁶ Bakhiphe imali kubabati, nebakhi, nebacoti bematje, nekutsi batsenge tingodvo nematje labatiwe batovusetela lithempeli.'' ⁷ Kodvwa kute kubalwa kwemali labanikwa yona lokwadzingeka ngoba bayiphatsa ngekutsembeka. ⁸ Hilkiah umpristi lomkhulu watsi kuShaphan umbali, '' Ngitfole incwadzi yemtsetfo endlini yaSimakadze.'' Ngakoke Hilkiah waniketa Shaphan lencwadzi wayifudza. ⁹ Shaphan wahamba wamikisa lencwadzi enkhosi, wabika kuyo watsi, ''Tisebenti takho tiyisebentisile lemali letfolakele ethempelini tayiniketa esandleni setisebenti letibuke kuphatseka kahle kwendlu yaSimakadze.'' ¹⁰ Wase Shaphan umbhali utsi enkhosi, ''Hilkiah umpristi unginike incwadzi.'' Shaphan wase uyifundzela inkhosi. ¹¹ Kwatsi ngesikhatsi inkhosi seyiwevile emavi alencwadzi yemitsetfo yadzabula tembatfo tayo. ¹² Inkhosi yayala Hilkiah umpristi, na-Ahikam indvodzana yaShaphan, na-Akbor indvodzana yaMicaiah, naShaphan umbhali kanye na-Asaiah sisebenti sakhe, watsi, ¹³ ''Hambani ningitsatsisele kanye nesive naJuda wonkhe kuSimakadze, ngenca yemavi anayi incwadzi letfolakele. Ngoba imatima intfukutselo yaSimakadze leyakhelwe tsine ngenca yabokhokho betfu labangayilalelanga emavi alencwadzi ngekutsi sihlonophe konkhe lokwabhalwa ngatsi.'' ¹⁴ Ngakoke Hilkiah umpristi , na-Ahikam, na-Akbor, naShaphan, kanye na-Asaiah baya kuHuldah umprofethikazi, lobekangumfati waShallum indvodzana yaTikvah indvodzana yaHarhas lobekabuke tembatfo tebapristi(bekahlala eJerusalema encenyeni lensha yelidolobha), bakhuluma naye. ¹⁵ Huldah watsi kubo, ''Naku lokushiwo nguSimakadze longuNkulunkulu wema-Israyeli, utsi: 'Tjelani lendvodza lenitfume kimi kutsi, ¹⁶ ''Naku lokushiwo nguSimakadze: Ngitoletsa sehlakalo kulendzawo nakulabahlala kuyo, ngekusho kwako konkhe lokubhalwe encwadzini inkhosi yakaJuda leyifundzile. ¹⁷ Ngoba ningilahlile phindze nashisa nemphepho kulabanye bonkulunkulu kuze bangitfuke ngize ngigcine ngitfukutsele ngatotonkhe tento labatentile-ngakoke intfukutselo yami ingetekile ngalendzawo, ngeke isasindza.''' ¹⁸ Kodvwa kulenkhosi yakaJuda lenitfume kutsi nitobuta intsandvo yaSimakadze, naku lenitokusho kuye: ''Simakadze, Nkulunkulu wema-Israyeli usho naku: 'Ngalamavi lowevile, ¹⁹ ngoba inhlitiyo yakho ilula, nekutsi utitfobile embikwaSimakadze ngesikhatsi uva lengikushito ngalendzawo nalabantfu labahlala kuyo, kutsi itoba sicalekiso, nangekutsi wena sodzabule tembatfo takho walila embikwami, nami ngikulalele-lesi simemetelo saSimakadze. ²⁰ Lalela, ngitokugcogcela kubokhokho bakho, utogcogcelwa ethuneni lakho ngekuthula. Emehlo akho ngeke atibone tonkhe letehlakalo lengitotehlisa kulendzawo.'''' Ngakoke lamadvodza abuyisela lomlayeto lona enkhosini.