¹ Angika khululeki yini? Angisuye yini umphostoli? Angikamboni yini Jesu Inkhosi yetfu? Anisiwo yini umsebenti wami enkhosini? ² Nangabe ngingasuye umphostoli kulabanye, lokungenani nginguye kini. Ngoba niluphawu lebuphostoli bami eNkhosini. ³ Nayi imphendvulo yami yekutimelela kulabo labanemibuto ngami: ⁴ Asinalo yini lilungelo lekudla nekunatsa? ⁵ Ngabe site yini lilungelo lekuhamba nebafati betfu labakholwako, njengabo bonkhe baphostoli, kanye nebanaka benkhosi kanye na Khefasi? ⁶ Noma ngimi na Bhanabasi kuphela yini lesite lilungelo lekungasebenti? ⁷ Ngubani lolisotja lotondla yena? Ngubani lohlanyela sivandze semagelebisi abese akasadli titselo taso? Noma ngubani lolusa umhlambi abese akasanatsi lubisi lwawo? ⁸ Loku ngikusho ngeligunya lemuntfu? Umtsetfo nawo awusho njalo yini? ⁹ Ngoba kubhaliwe emtsetfweni waMose, ''Ungasifaki sifonyo inkhabi uma ibhula.'' Ngabe ecinisweni Nkulunkulu yinkhabi lanendzaba nayo yini? ¹⁰ Ngabe akakhulumi yini ngatsi? Kwabhalelwa tsine, ngoba loyo lohlanyelako kufanele ahlanyele ngekwetsemba, naloyo lobhulako kufanele abhule anekwetsemba kutsi utawuhlephula sivuno sakhe. ¹¹ Uma sihlanyela tintfo taka moya kini, ngabe kuyintfo lenkhulu yini kutsi singavuna tintfo temhlaba kini ? ¹² Nangabe labanye basebentisa lelilungelo lelo kini, ngabe tsite site yini lelingetulu? Noko asikalisebentisi lelo lungelo. Kunaloko sibeketelela nome yini kuze singalivimbeli liVangeli laKhristu. ¹³ Anati yini kutsi labo labenta imisebenti lengwele ethempelini kudla kwabo bakutfola ethempelini? Anati yini kutsi labo labasebentela elathini banesabelo kuloko loku nikelwe elathini? ¹⁴ Ngalokufanako, Inkhosi isiyalele kutsi labo labashumayela livangeli kufanele batfole kwabo kwekuphila evangelini. ¹⁵ Kodvwa mine angiwasebentisanga lawo malungelo. Futsi loko angikubhaleli kutsi kube khona leningentela kona. Ngingamane ngife kunekutsi kube khona umuntfu longangephuca lokutigcabha kwami. ¹⁶ Ngoba ngishumayela livangeli, ngite sizatfu sekutigabatisa, ngoba kufanele ngikwente loku. Maye kimi uma nginga shumayeli livangeli ¹⁷ Ngoba uma loku ngikwenta ngenhlitiyo levumako, nginaso sibongo. Kepha uma ngingakwenti ngenhlitiyo levumako, solo nginemsebenti lowabekwa kimi. ¹⁸ Pho uyini ke umvuzo wami? Lokutsi uma ngishumayela, ngishumayele liVangeli ngaphandle kwekubhadalisa nekutsi nginga sebentisi lonkhe lilungelo lami eVangelini. ¹⁹ Ngobe nome ngikhululekile kubo bonkhe, ngaba sisebenti sabo bonkhe, kute kutsi ngitozuza labanyenti. ²⁰ Kuma Juda, ngiba ngumJuda, kute ngitokhona kuzuza emaJuda. Kulabo laba phansi kwemtsetfo, ngafanana nalabo labaphansi kwemtsetfo kute ngitozuza labo labaphansi kwemtsetfo. Ngakwenta loku naloku nje mine lucobo lwami ngingekho phansi kwemtsetfo. ²¹ Kulabo labangephandle kwemtsetfo, nami ngaba njengaye longephandle kwemtsetfo, naloku mine ngingekho ngaphandle kwemtsetfo waNkulunkulu , kepha ngingaphansi kwemtsetfo waKhristu. Ngangentela kutsi ngitozuza labo labangaphasi kwemtsetfo. ²² Kulababutsakatsaka nami ngibe butsakatsaka kute ngitozuza lababutsakatsaka. Ngibe ngito tonkhe tintfo kubo bonkhe bantfu, kute kutsi ngato tonkhe tindlela ngisindzise labanye. ²³ Ngente tonkhe letintfo ngenca yelivangeli, kute kutsi ngihlanganyele etibusisweni talo. ²⁴ Uyati yini kutsi emncintiswaneni bonkhe bagijimi bayagijima umncintiswane, kepha munye lotawemukela umklomelo? Ngakoke gijimela kuyowina umklomelo. ²⁵ Wonkhe logijimako utetayeta kutitsiba kuto tonkhe tintfo. Bakwentela kwekutsi batfole emacembe laphelako, kepha tsine sikwentela kutfola umklomelo longuna phakadze. ²⁶ Ngakoke ngigijima kanje, hhayi njengalokungenasizatfu, hhayi njengaloshaya umoya. ²⁷ Kepha ngiyawugongonya umtimba wami ngiwente sigcila, kute kutsi sengishumayele labanye, mine lucobo lwami ngingaliwa.