¹ Macondzana naletindzaba lenangibhalela ngato: "Kuhle kutsi indvodza ingamtsintsi wesifazane." ² Kodvwa ngenca yetilingo letinyenti yetento tekugwadla, nguleyo ndvodza ayibe newayo umfati, nemfati akabe neyakhe indvodza. ³ Indvodza kufanele ifeze umsebenti wayo wekunika umfati wayo lilungelo lakhe lekulala, ngalokunjalo nemfati kuyo indvodza yakhe. ⁴ umfati akanawo emandla etukwemtimba wakhe, kodvwa yindvodza lenawo. Ngalokunjalo, nendvodza ayinawo emandla etukwemtimba wayo, kodvwa ngumfati wayo lonawo. ⁵ Ningagodlelani, ngaphandle nangabe nivumelene nakhona kube kwesikhashana nje lesitsite. Kwenteni loko kuze nitotinikela emthandazweni. Emvakwaloko niphindze nibe ndzawonye futsi, ukuze sathane angetunilinga ngenca yekwehluleka kwenu kutibamba. ⁶ Kodvwa ngikhuluma letintfo kini njengaletivumelekile hayi njengemyalo. ⁷ Ngifisa shengatsi wonkhe wonkhe ngabe unjengami. Kodvwa ke nguloyo naloyo unesipho sakhe lasiphiwe nguNkulunkulu. Lomunye unalenhlobo yesipho, lomunye unaleya. ⁸ Kulabangakashadi nakubafelokati ngitsi kubo kuhle kubo nabahlala bangakashadi, njengaloku mine nginjalo. ⁹ Kodvwa nabehluleka kutibamba, abashade. Ngoba kuncono kushada kunekutsi bashiswe yinkhanuko. ¹⁰ Kodvwa kulabashadile ngibanika nangu umyalo-hhayi mine, kodvwa iNkhosi-umfati akangehlukani nendvodza yakhe ¹¹ (kodvwa nakwenteka ehlukana nendvodza yakhe, akahlale angakashadi noma abuyisane nendvodza yakhe), nendvodza ayingehlukani nemfati wayo. ¹² Kodvwa kubo bonkhe ngitsi-mine , hhayi iNkhosi-kutsi uma umzalwane anemfati longakholwa, kantsi lomfati uyeneliseka kuhlala naye, akangehlukani naye. ¹³ Uma umfati anendvodza lengakholwa, yona ke yeneliseka kuhlala naye, akangehlukani nayo. ¹⁴ Ngoba indvodza lengakholwa ingcwelisiwe ngenca yemfati wayo, nemfati longakholwa ungcwelisiwe ngenca yalomzalwane. ngaphandle kwaloko bantfwana babo ngabe bangcolile, kodvwa ngekweliciniso bangcwele. ¹⁵ Kodvwa nangabe lomlingani wakhe amshiya, akahambe. kulesosimo, umzalwane noma umzalwanekati akabopheleki etifungweni tabo. Nkulunkulu usibitele kutsi siphile ngekuthula. ¹⁶ Ngoba wati ngani, mfati, kutsi ungahle uyisindzise indvodza yakho? noma wati ngani, ndvodza, kutsi ungahle umsindzise umkakho? ¹⁷ Kuphela nje, akube nguloyo aphile imphilo layinikwe yiNkhosi, nguloyo njengoba Nkulunkulu ambitile. nguloko lengikufundzisa kuwo onkhe emabandla. ¹⁸ kukhona yini labesokile nakabitelwa ekukholweni? akukafaneli etame kutiveta angakasoki. Kukhona yini labengakasoki nakabitelwa ekukholweni? Akangasoki. ¹⁹ Phela kusoka nekungasoki akusho lutho. Lokung'kona kumcoka kulalela imiyalo yaNkuunkulu. ²⁰ Nguloyo akahlale akulolo bito bekakulo nakabitwa nguNkulunkulu kutsi atewukholwa. ²¹ Wawusigcili nawubitwa nguNkulunkulu kutsi ukholwe? ungakhatsateki ngako. Kodvwa nakungenteka ukhululeke, litsatse lelo tfuba. ²² Phela loyo lobitwe nguNkulunkulu asigcili ungulokhululekile waNkulunkulu. Ngalokunjalo, loyo labekakhululekile nakabitelwa ekukholweni usigcili saJesu. ²³ Natsengwa ngelinani lelikhulu. Ngako ke ningasabi tigcili tamuntfu. ²⁴ Bazalwane, noma ngabe nguyiphi imphilo lesasingiyo nasibitelwa ekukholweni, asihlale sinjalo. ²⁵ Macondzana ke nalabo labangakashadi, anginawo umyalo lovela eNkhosini. Kodvwa ngibeka umbono wami njengaloyo, ngemusa waNkulunkulu, lowetsembekile. ²⁶ Ngako-ke, ngicabanga kutsi ngenca yembhubhiso letako, kuhle kutsi umuntfu ahlale anjengoba anjalo. ²⁷ Kukhona yini umfati loshade naye? Ungafuni sehlukanisa. Uma ngabe ungakashadi, ungamfuni umfati. ²⁸ Kodvwa nawushada , awukoni, Futsi uma umfati longakashadi ashada, akoni. Kodvwa labo labashadako batawuba netinhlobo nhlobo tekuhlupheka kulelive, mine ke ngifisa kuniphephisa kuloko. ²⁹ Kodvwa lengikushoko, bazalwane : Sikhatsi sincane, kusukela manje kuya embili, akutsi labo labanebafati baphile njengalabo labangenabo. ³⁰ Labo labalilako bente shangatsi abalili, nalabatfokotako babe njengalabangatfokoti, nalabo labatsengako babe njengalabangatange babe nelutfo, ³¹ nalabo labasentisa live bente shangatsi abalisebentisi kakhulu kangako. Phela live kulesimo lesikulo manje litawufika ekugcineni. ³² Bengingatsandza kutsi nikhululeke etinkhatsatweni. Umuntfu longakashadi unakelela tintfo letiphatselene neNkhosi, kutsi angayitfokotisa kanjani. ³³ Kodvwa loshadile unakelela tintfo letiphatselene nalelive, kutsi angamtfokotisa kanjani umkakhe- ³⁴ wehlukene ekhatsi. Umfati longakendzi noma intfombi unakelela tintfo letiphatselene neNkhosi, kutsi angatingcwelisa kanjani umtimba nemphefumulo. Kodvwa umfati loshadile unakelela tintfo letiphatselene nalelive, kutsi angayitfokotisa njani indvodza yakhe. ³⁵ Ngikukhuluma loku kute kusitakale nine, hhayi kutsi nginibekela umcabo. Loku ngikusho ngoba kulungile, kute nitotinikela eNkhosini ngaphandle kwekuphatamiseka. ³⁶ Kodvwa nangabe kukhona locabanga kutsi akasiphatsi ngenhlonipho singani sakhe-nangabe sesedlulile esigabeni seminyaka yekushada kumele kwentiwe-akente loko lakufunako. akoni. Abashade. ³⁷ Kodvwa nangabe eme asimile enhlitiyweni yakhe, kungasho kutsi ucindzetelekile kodvwa angayilawula intsandvo yakhe yekukhetsa, nalapho asatincumele yena enhlitiyweni yakhe kukwenta loku, kusigcina singani sakhe siyintfombi wenta kahle, ³⁸ Ngako ke losishadako singani sakhe wenta kahle, naloyo lotikhetsela kungashadi wenta ncono kakhulu. ³⁹ Umfati ubophelekile endvodzeni yakhe yingci nje na isaphila. Kodvwa uma lendvodza yakhe ifa, ukhululekile kushada noma ngubani lamfisako, kodvwa kube seNkhosini. ⁴⁰ Noko ngekubona kwami uyawuba nekujabula uma ahlala anjengoba anjalo. Futsi nami ngicabanga kutsi nginaMoya waNkulunkulu.