¹ Banini balingisi bami, njengobe nami ngilingisa Khristu. ² Ngiyanidvumisa ngoba ningikhumbula kuko konkhe. Ngiyanidvumisa ngoba nibambisisa sifundziso njengoba ngasetfula kini. ³ Nyalo ngifuna nincondzisise kutsi Khristu uyinhloko yawo onkhe emadvodza, nendvodza iyinhloko yemfati, Nkulunkulu uyinhloko yaKhristu. ⁴ Uma noma nganguyiphi indvodza lekhuleka imbonye inhloko ayihloniphi inhloko yayo. ⁵ Kepha uma kunemfati lothantaza noma aphrofethe angakavali inhloko yakhe wedzelela inhloko yakhe. ⁶ Ngoba umfati nangayimbonyi inhloko yakhe, kufanele ajube tinwele takhe tibe timfisha. Uma kulihlazo kumfati kujuba tinwele takhe noma kutihhula, akadukele. ⁷ Indvodza akufanele yembonye inhloko yayo ngoba ungumfanekiso nenkhatimulo yaNkulunkulu. Kepha umfati yena uyinkhatimulo yendvodza. ⁸ Kepha, umfati watsatfwa endvodzeni. ⁹ Ngoba indvodza ayidalelwanga umfati. Kunaloko, umfati wadalelwa indvodza. ¹⁰ Kungako umfati kufanele abe neluphawu lwekuhlonipha enhloko yakhe ngenca yetingelosi. ¹¹ Noma kunjalo, Enkhosini, umfati akasiye longayidzingi indvodza, futsi nendvodza ayisiye lemdzingi umfati. ¹² Ngoba umfati wachamuka endvodzeni, kanjalo nendvodza ichamuka emfatini. Bese kutsi yonkhe intfo ivela kuNkulunkulu. ¹³ Tiboneleni ngekwenu: Kutsi kufanele yini kutsi umfati athantaze kuNkulunkulu angakembonyi inhloko? ¹⁴ Imvelo imbala ayinifundzisi yini kutsi uma indvodza iba netinwele letindze, kulihlazo kuyo? ¹⁵ Imvelo ayinifundzisi yini kutsi uma wesifazane anetinwele letindze kuligcabho lakhe? Ngoba tinwele takhe uniketwa njengesembhonyo. ¹⁶ Uma kukhona lofuna kuphikisana naloku, site lenye indela lesiyentako nemabandla aNkulunkulu ate lenye. ¹⁷ Kepha kulemiyalo lelandzelako, anginidvumisi. Ngoba uma nihlangene ndzawonye, akusiko lokuhle kepha lokubi. ¹⁸ Ngoba kokucala nje, ngiyeva kutsi uma nihlangene ebandleni, kunemikhatsi kini, incenye yaloku ngiyayikholelwa. ¹⁹ Ngoba kufanele kube nemacembucembu emkhatsisini wenu, kute kutsi labo labakahle batawubonakala emkhatsisini wenu. ²⁰ Ngoba uma nihlangene kanye kanye, akusiso Sidlo seNkhosi lenisidlako nine. ²¹ Uma nidla, loyo naloyo udla kwakhe kudla ngaphambi kwekutsi nalabanye badle kwabo. Lomunye ulambile, lomunye udzakiwe. ²² Nite yini tindlu tekudlela tekunatsela? Ngabe nilibukela phansi libandla laNkulunkulu futsi nichaphata labo labangena lutfo? Kufanele ngitsini kini? Kufanele nginidvumise? Angeke nginidvumisele loku! ²³ Ngoba mine ngakwemukela eNkhosini loku lengakwedlulisela kini, lokutsi iNkhosi Jesu, ngebusuku latsengiswa ngabo, watsatsa sinkhwa. ²⁴ Emvakwekubonga, wasihlephula watsi, " Lona ngumtimba wami. lengiwunikela nine. Yentani loku kute ningikhumbule." ²⁵ Ngalokufananako watsatsa inkomishi emva kwesidlo sakusihlwa, wase utsi," lesi sivumelwano lesisha engatini yami. Yentani loku emahlandla niyinatsa, kute nitongikhumbula." ²⁶ Ngoba ngaso sonkhe sikhatsi nidla lesinkhwa futsi ninatsa kulenkomishi, nimemetela kufa kweNkhosi ize ibuye. ²⁸ Ngako-ke, noma ngubani, lodla lesinkhwa noma anatse lenkomishi yeNkhosi ngendlela lengasiyo utawuba nelicala lemtimba nengati yeNkhosi. ²⁷ Umuntfu akatihlolisise kucala, ngaleyondlela ke sangadla sinkhwa futsi anatse kulenkomishi. ²⁹ Ngoba loyo lodla futsi anatse ngaphandle kwekwehlukanisa umtimba utidlela futsi utinatsela kwehlulelwa matfupha. ³⁰ Kungako labanyenti beenu babutsakatsaka futsi bayagula, bese labanye benu sebalala. ³¹ Kepha uma sitihlolisisa tsine, ngeke sehlulelwe. ³² Kepha uma sihlulelwa Yinkhosi, siya khalinywa kute natsi singetukwehlulelwa kanye nelive. ³³ Ngako-ke, bazalwane, uma nihlangana kutowudla, melanani. ³⁴ Uma kukhona lolambile akadle ekhaya, kute nanihlangana kungabi ngekwehlulela. Tonkhe leletinye tintfo lenitibhalile, ngitawunicondzisa ngato nangifika.