^{1 2 3} Kwatsi Davide sekagugile nemphilo yakhe seyingasekugcineni, wabeka indvodzana yakhe Solomoni kutsi abeyinkhosi yaka-Izrayeli. Davide wahlanganisa bonkhe baholi baka-Izrayeli, nebapristi nemaLevi. EmaLevi laneminyaka lengemashumi lamatsatfu nalawo eminyaka lengetulu abalwa, kwaba bantfu labatinkhulungwane letingemashumi lamatsatfu nesiphohlongo. ^{4 5 6} Kulabo, tinkhulungwane letingemashumi lamabili nakune tibuke umsebenti wekwakha indlu yaSimakadze nalabatinkhulungwane letisitfupha bekubagcini bemtsetfo nebahluleni. Labatinkhungwane letine kubagcini bemasango, nalabatinkhulungwane letine bekukutsi badvumise Simakadze badlale imisindvo leyakhelwe kudvumisa,'' Davide washo. Davide wabahlukanisa babaticheme temadvodzana aLevi: Gershon, naKohath,.kanye naMerari. ^{7 8 9} Besibongo saGershon, bekuboLadan kanye naShimei. Bekunalamatsatfu emadvodzana aLadan: Jehiel lokunguye lomdzala, naZetham, kanye naJoel. Bekunalamatsatfu emadvodzana aShimei: Shelomoth, naHaziel, kanye naHran. Laba bekubaholi besibongo saLadan. ^{10 11} Bekunalamane emadvodzana aShimei: Jahath, naZiza, naJeush, kanye naBeriah. Jahath bekunguye lomdzala, Ziza awesibili, kodvwa Jeush naBeriah ababanga nemadvodzana lamanyenti, ngakoke babalwa njengemndeni munye banikwa umsebenti munye. ^{12 13 14} Bekunalamane emadvodzana aKohath: kungu-Amram, na-Izhar, naHebron, kanye na-Uzziel. Lawa bekungemadvodzana a-Aroni naMose. Aroni wakhetfwa kutsi ahlukanise tintfo letingcwelengcwele, kutsi yena nentalelwane yakhe batoshisa imphepho embikwaSimakadze, bamkhonte phindze basho netibusiso egameni laSimakadze phakade naphakadze. kwaMose inceku yaNkulunkulu, intalelwane yakhe yabalwa kanye kanye nesive semaLevi. ¹⁵ Emadvodzana aMose bekuboGershom na-Eliezer. ¹⁶ Intalelwane yaGershom bekuboShubael wekucala. ¹⁷ Intalelwane ya-Eliezer bekungeRehabiah. Eliezer bekete nalamanye emadvodzana, kepha situkulwane sakhe sabasinyenti. ¹⁸ Indvodzana ya-Izhar kwakunguShelomith labekangumumholi. ¹⁹ Intalelwane yaHebron bekuboJeriah, lebekawekucala, na-Amariah wesibili, naJahaziel lebekawesitsatfu, kanye naJekameam awesine. ²⁰ Emadvodzana a-Uzziel bekuboMicah awekucala, kanye na-Ishiah awesibili. ²¹ Emadvodzana aMerari bekuboMahli naMushi. Emadvodzana aMahli bekubo-Eleazer naKish. ²² Eleazer wafa ete indvodzana. Bekanemadvodzakati kuphela. Ngakoke banakabo, emadvodzana aKish, abenta bafati. ²³ Emadvodzana lamatsatfu aMushi bekuboMahli, na-Eder, kanye naJerimoth. ²⁴ Lena-ke bekuyintalelwane yaLevi ngemindeni yayo. Bekutihloko temindeni, babalwa babhaliswa ngemabito elubalweni, emndenini lebeyisebenta imisebenti yasendlini yaSimakadze, kusukela kulabaneminyaka lengemashumi lamabili nakune kuya etulu. ²⁵ Ngoba Davide bekatse, ''Simakadze, Nkulunkulu wa-Izrayeli, sobaphumutile bantfu bakhe. Watentela likhaya lakhe eJerusalema kutsi libe phakadze. ²⁶ EmaLevi ngeke asatfwala lithende lekuhlanganyela nakokonkhe lokwakusentjentiswa nakukhontwa.'' ²⁷ Ngekwemagama ekugcina aDavide emaLevi abalwa, kusukela kulabaneminyaka lengemashumi lamabili nakune kuya etulu. ²⁸ Umsebenti wabo bekukulekelela situkulwane sa-Aroni emisebentini yasendlini yaSimakadze. Bekukutsi banakekele libala langemuva lendlu yaSimakadze, nemakamelo, nemisimeto yekuhlambulula tonkhe tintfo taSimakadze, nalomunye umsebenti wasendlini yaNkulunkulu. ²⁹ Bebanakekela sinkhwa lesibekwa embikwaSimakadze, nafulaha longumnikelo wenhlavu, nemacebelengwane langenambiliso, nemnikelo lobhakiwe, nemnikelo lobhicwe nemafutsa, .kanye nakokonkhe kukalwa kwemanani netisindvo tetintfo. ³⁰ Bebema njalo ekuseni babonge phindze badvumise Simakadze. Bebema nasentsambama ³¹ nanobe kunini nakunikelwa iminikelo leshisiwe kuSimakadze, nangeSabbath nangemikhosi yekwetfwasa kwenyanga nangemikhosi yekudla. Linani lelingashintji, lelitfunywe ngumtsetfo, bekufanele lihlale likhona embikwaSimakadze. ³² EmaLevi bekabekw kutsi abuke lithende lekuhlanganyela, indzawo lengcwele, nekusita banakabo situkulwane sa-Aaron ngemisebenti yasendlini yaSimakadze.