1 ''Mutazumizyi myoyo yenu kupengana. Amushome muli Leza, ape mushome muli mebo. 2 Mung'anda yatata muli masena manji. Nikwatalinsi namu, nindamwambila, kambo ndiinka kuyo mubambila busena. 3 Ndainka kuyo mubambila busena, ndiyopiluka ape kuzomutambula, kutegwa kweyoba kwateni anywibo mukabe ko. 4 Muliizi nzila kwebuya.'' 5 Tomasi wakateti kuli Jesu, ''Mwami, tatuzi swe kobuya, ino tulaiziba buti nzila?'' 6 Jesu wakamba kuli nguwe, ''Ndime nzila, masimpe, ape obumi; takwe uza kuli tata ati buyo waindila muli mebo. 7 Nimwalindizi mebo, O tata nimwalimwizi. Kuzwa sunu mwamuziba tata ape mwamubona.'' 8 Filipo wakati kuli Jesu, ''Mwami, tutondezye Tata, ciyoba mbubo kuli swebo.'' 9 Jesu wakateti kuli nguwe, ''Ndili anywibo kwechindi cilamfu tamuna kundiziba Filipo? Kufumbwa wandibona wabona Tata. Ulamba buti kuti, 'Tutondezye Tata'? 10 Tamushomi kuti ndili muli Tata awe Tata uli muli mebo? Majwi nge amba kuli nywebo tandamboli kuzwa munguzu zyangu, pele Tata upona muli mebo ngucita mulimo. 11 Amundishome kuti ndili muli Tata, awe Tata uli muli mebo, na mbobo amushome akambo ke milimo yo kwigama. 12 Kasimpe, kasimpe ndamwambila, oyo ushoma muli mebo uyo cita milimo njecita, okucita milimo mipati kwinda eyi kambo ndinka kuli Tata. 13 Kufumbwa chimukumbila muzina lyangu, ndiyo chicita kutegwa Tata aka lumbaizigwe mu Mwana. 14 Kuti na mwandikumbila kufumbwa muzina lyangu, ndiyo chicita. 15 Kuti na mulandiyanda, muyobamba malaelele angu, 16 Ndiyokomba kuli Tata, ponyina uyomupa umbi mumbulizi kutegwa akabe anywibo kutamani- 17 Muuya wakasimpe. Nyika taikonzi kumu tambula kambo taimuboni O kumuziba. Kono muli mwizi, kambo ukala anywibo ape unoli muli nywebo. 18 Tandiyomusiyi amulike; Ndiyo mupilukila. 19 Mukaindi kanini nyika taicinondiboni, kono muyondibona. kambo ndila pona, anywibo muyopona. 20 Mubuzuba buya muyoziba kuti ndili muli Tata, anywibo kuti muli mulimebo, amibo ndili muli nywebo. 21 Oyo ujesi malaelele angu okwabamba ngonguwe undiyanda, ape oyo undiyanda uyoyandwa O Tata, ape ndiyomuyanda okulitondezya kuli nguwe.'' 22 Judasi (utainsi Sikalioti) wakamba kuli Jesu, ''Mwami, kambo nzi choyolitondezya kuli swebo kuleka kunyika?'' 23 Jesu wakataba okwamba kuli nguwe, ''Kufumbwa undiyanda, uyobamba jwi lyangu. Tata angu uyomuyanda, ponyina tuyoza kuli nguwe okupanga ng'anda yesu anguwe. 24 Oyo utandiyandi tabambi majwi angu. Ijwi ndimumvwa talizwi kuli mebo kono kuli Tata wakandituma. 25 Ndamwambila ezi zintu nechili anywibo, nechikede anywibo. 26 Nikuba namu, mumbulizi-Muuya usalala oyo Tata ngwayotuma muzina lyangu-uyo mwiisya zyoonse ape uyo muyubulusya zyoonse ezyo zindakamwambila. 27 Ndamusila lumuno; Ndamupa lumuno lwangu. Tandipi mbuli nyika mbwipa. Atamuzumizyi myoyo yenu kupengana, ape mutabi nimuyowa. 28 Mwakamvwa ndakamwambila, 'Ndobuya, ape ndiyomupilukila.' Na mwali kundiyanda, nimwanonenwa kambo ndobuya kuli Tata, ino Tata mupati kwiinda mebo. 29 Inawa ndamwambila kachitana kucitika kutegwa, chakucitika muyoshoma. 30 Sichamboli zinji anywibo, kambo mwendelezi we nyika eyi uyobuza. Takwe nguzu alimebo, 31 pele mukuti nyika ikazibe kuti ndilamuyanda Tata, ndilacita mbuli Tata mbwandambila. Atunyamuke twiinke kuzwa kuno.''