¹ Minya-upilo kwaamba ana kutambula Jobo aikalile mu linungwa nji, ² ''Anyine oyu na kulita e lififi mu mayambuto ange, ni maywi ae nambulwa tingana?'' ³ Ukununge mu mbunda kwanyi mulume, ni kwibangute; wene unishambwekise. ⁴ Oku una kwiikala aba sina kusuma o mutomo no litunga? waambe nji ulimikile. ⁵ Oyu nakupuluka ku litenda mu titikanya talyo, nji umulimukile? kamba oyu aha kulilikanyeza ni muhala no tikanyo? ⁶ Abo ku ongotitwe mitomo lyayo, ni ba siike? kame u mulimukile oyu ana kubeka e liwe no sikutwana salyo. ⁷ Tinungweti no malungasiku aba tina kuta no imba bamweya, kame ana no Mulimu oshe naku luluweliswa kwa kuwabelwa? ⁸ Kame ni anyine ana kuyatilela e liwate e saandi, enako lina kutoyola, nali kubana kwanyi mwana aba tunda mu lipumo. ⁹ Kame bilu ni tenda e likumbi nji likale sikumango salyo, kame e lififi no kwilola nji likale sito salyo. ¹⁰ Mane sina kulisumena e ndinda, kame sina kuyongota ni saandi ni ipakiso. ¹¹ Bilu naamba nji, ''Naukubiwa aba, kono kuuso kauta kubita, bata o kaukela a mandinda owe no mu ikumuhuso? ¹² Simba waelekiwa kama naukusumena o usiku e naka uta kubwa? kamba nauku monisa e liywa sibaka abo sali kapela? ¹³ Mane lileme e litunga kumauneku alyo, kame ano kwiiba a tutulelwe baudee? ¹⁴ Litunga nalikubiluka omo kubilukela lizupa elyo liswaiwa, kame inu yoshe i mena, kame li ifuka kwanyi sikumango. ¹⁵ Ano kwiiba kwaamba ana kuyumenwa e sibaka sao, kame e likaa lyowo lina kwinuka kame lina kucoka. ¹⁶ Mweendi nu kakeela ku liweluwelu no liwate? kamba mweendi nauku pota-pota mu mandunga no ba litako lya liwate? ¹⁷ Ni myelo no lifu, mweendi nauku yatulelwa e yaandi yayo? kamba nauku mona e myelo no mwiinda no lifu? ¹⁸ Kame nu kulimukelela owunene no litunga abo ukuma? waambe nji kame wilimukile eyo yoshe. ¹⁹ E ndila ita oko kuyakile liseli oko ili? kame e lififi sibaka salyo oko simonahala ni kubi? ²⁰ Kikuli kame utwesa ku lilema mutindinda talyo, oko likabwela, ni kulimuka kusaela e ndila ita ku ndoo yalyo? ²¹ Eyo kame utaa kwiilimuka kakuli abo, naukwelekiwa kale, kokaa, kame wiikalile ni maywaa akupula. ²² Kikuli na ukwiingena abo kwiikalile mateulelo no litwa? kamba na ukumona amateulelo no simbwewewe? ²³ Ni onyene sina kuteulela a maywaa no maswenyeho, ee, a maywaa no mifilifili ni ano tindwa. ²⁴ Liseli aba lihasana ni mundila ibi? kame ni mundila ibi kame o mebo no ku upa aba ufuka mu mabaka oshe no mulitunga? ²⁵ Anyine ana kutendela o mbula e ndila mu mbyumbyulu, ni ndila no lumonyi lwa mbula i luma? ²⁶ Nji i loke mu naha kwaasa anu, mu lihalaupa omo kwayaka anu. ²⁷ Ikolobeze o mumbu na kwa limwa mu matota, itwese kumenisa o moopu mubya? ²⁸ Ombula, kikuli kame akwite sitae? kamba kwaali oyu na kweleka puka? ²⁹ Ni mulipumo lya anyine omo kuma kutunda a meyi no makaza? ³⁰ Nji a meyi ashwekiwe abiluke liwe, kame beulu no liwate ni bonyene ku kangele ku ongole. ³¹ Mweendi ni weene ana kununga e tinungweti no silimela banweya? kamba ni weene u kwite a maata no kunungutula tindambo no likulube? ³² Mweendi ni weene u monahalisa titopa no timungweti mutinako tayo, kamba oyu a endisa e koloi no tinungweti no Bere ni ana ayo. ³³ Kikuli kame ulimukile e milao eyi inunga liwilu? kame kame uta kutwesa kusuma epuso yalyo mu litunga? ³⁴ Mba utwese kuinula ku liywi nji mane likayupahale mu makumbi? kamba wisane o mbula, ulokiwe ni mbula no kupula? ³⁵ Mbutwese kumyamyatisa a mamonyi no mbula, nji aiye aipihe kwa weene nji, ''Aci ano?'' ³⁶ Unungu no mu mucima, oyuno ushweka ni anyine? kame oyuno tenda nji tingana tiyupisise yaambo ni anyine? ³⁷ Anyine yo kwite unungu no kubala akumbi aba kuma? kambe oyu atwesa kufuleka tingwano kuwilu. ³⁸ Likungu aba libuluka e ndowa, kame a masinde kama kobeha onene? ³⁹ Mba utwese kusaelela o ndee no mukati e siselo sae? kamba kumana e lishebo no ana andee. ⁴⁰ Simba tina kubuta mu misima yato, kamba kame tikushwekile mu sikwa nji ti shondalele? ⁴¹ Oyu na kutendela linwalala e silya salyo ni anyine? otwana twalyo aba tikulilelela kwa Mulimu, kame tuta okunoku kusaela eyino kulya.