¹ Elihu yo kwaamba nji, ² ''Mwendi kame upuluka nji kame ku kufanene, abo wimana ba niti yowe kasa iyino Mulimu? ³ Mane kame waamba nji, ''Tuso kwa meene ni ibi? kame okwatenda sibi sike ni wana bo? ⁴ Yngeso nitamba kukutambula weene ni alikani owe. ⁵ Wi imunene amiyo kuwilu, walikete, umone e liwilu likalile beulu kubita weene. ⁶ Simba utenda oyi, sike u mu sotisa? kame tifoso towe simba tiikale takupula ni saambo sibi kwa yonyene? ⁷ Simba wiikalile mununo kuwaba, esi uta ku muba ni sikene? Etuso iwaniwa kwa weene nibi? ⁸ Kwiiba kowe kame kuta ku sinyeza o munu no kufeka weene, kame kuwaba kowe kame kuta kutusa mwana no munu feela. ⁹ Anu kama alila libakano manyando no kupula, kame akumbela kulamwena mu likaa eli lya kona. ¹⁰ Kono aba kwiikalile o munu wiibanguta nji, ''Okwaali Mulimu mubumbi wange, yonyene yotuba kwiimba tindimo no kuwabelwa mukaci no usiku. ¹¹ Yonyene yotu talifisa kubita omwa talifiseza iyamana no muliyungu, yonakutuba unungu ubita owuno iyunyi no muliwilu? ¹² Aa okame, kama alila, kama akuwanga, kono Mulimu katambula libakano wikumuso wa ano kwiiba. ¹³ Luli Mulimu kaata kuyupa eyino maya, oyuno-maata-oshe kaata kuitokomela. ¹⁴ Kame simba waamba nji kau mumono, saambo kame sili balubala lwae, u mwalikete! ¹⁵ Kono he, kakuli ka silenga ni kutweba, Jobo kama puluka nji Mulimu ka tokomela, munu simba akukumusa. ¹⁶ Kame ayaamisa a kanwa kae kwaamba eyi yakwite tuso, kama apulisa kwaamba a maywi no kupula nakwa yupahala.