¹ Jobo yo kushongela ko ku kwaamba a maywi ae no unungu nji, ² ''Mawe! ko nita kufeka omo sina kwiikalela mu tikweti no samutamunene, ni mu maywa aya, Mulimu abana kunisebeleza. ³ E lambi yae aba ina kubenya beulu no mutwi wange, kame mu tuso no lisele lyae kame nina kutwesa kweenda mu lififi! ⁴ Koni twesa ku uka ku maywaa no maata ange, Mulimu aba ana kwiikala mu tende yange kwanyi mulikani wange. ⁵ Oyuno-maata-oshe aba ana kwiikalanga kwa mene, kame ni anange asi yakile ni maane. ⁶ Aba sina kuyowisa amakondo ange mu mawe, kame mawe na kukukisa maeti no maati yange. ⁷ Aba sina kubanena banda kuta ku mwelo no mundi, kame sina kulukisa e sipula sange. ⁸ Andumbana aba ana kunimona seli akela munyima, ku nisheteta; akulu na kwiinguka ni kwiimana. ⁹ Makwambuyu na kulesela kwaamba, kame ana kulema batunwa ni mataa. ¹⁰ Tingambolo no manduna nati kubwa, a mulimi ao kame ana ku kumalela mu mitahali yao. ¹¹ kutwi aba ina kuyupa eyi sina kwaamba, kame sina kunulubeta. ¹² Kakuli mubotana abana kwiitilelela, kame sina kumulamwena, bamweya ni kuzana nambulwa oyuso mutusa. ¹³ Oyu ana kwikala beebi ni kufa, kama ana kuni nulubeta, kame sina kuwabelisa o mucima no mukati ana kufelwa mbumwae. ¹⁴ Kutenda ni mulao, neli sokame e sito sange sino kufukange, kuluka kwange, kame kunakwiila ikumango yange ni kuwano yange. ¹⁵ Ni meene sina kwiikala liyiyo no sibofu, kame a makondo auyo ana kutoza, ¹⁶ neli meene sitae njebwe, kame e saambo no munu oyu kama umika, kame sina ku ibangutiseza. ¹⁷ Kame sina kucola mitahali no munu oyu wasiluka, kame anakuyangwela esi alemine ni maeo. ¹⁸ Mulibaka elyo kame sina kwaamba nji, ''Kame nita kufela mu siyaleto sange, amaywaa ange no kuyoya akumane ni lipumasheke. ¹⁹ Mubisi wange kame uta kuolokela kunyoya ni meyi, e puka ikale usiku oshe ku mitai yange. ²⁰ Umbumu wange kame uta kuongola, kame buta bwange kame uta kwiikala ni wangu mu likaa lyange. ²¹ Anu kame ana kuteya kuwti kwa meene, a tateele, kame na kuondoka aba ni na kwaamba. ²² Aba sina mana kwaamba, kakwisa esi ana kulundeka bo; a maywi ange nakwa iyela kwanyi o mbula no maseulo. ²³ Kama aha kumi shukwela omo kushukwelwa o mbula, kame naku yaamisa tunwa twao kwanyi a atambula o mbula no maungulo. ²⁴ Aba kuzielaha, kame sina kwa menyeza, kame e liseli no ba lubala lwange kalimona kubwa. ²⁵ Kame sina kweenda e ndila imweya ni onyene, kame e situlo sange kame sina kwiikala esino mukulu, kame sina mwiikala kwanyi mbumu aikalile ni mpi yae, kwanyi munu aongota o mucima waa alila.