¹ Jobo kwaamba ana kwaamba nji, ² ''Ngaibi una kutusa oyu wakwite a maata? ngibi una kutusa e likaa nambulwa maata! ³ Naukweteza nawino onene o munu nambulwa unungu! Kame ngaibi una kumonisa o mwikalelo no kuyupisisa, ni kutalifa kunene kowe. ⁴ Yaambo yowe, anyine una kuyambela? kame e mebo ina kwaambisa a kanwa kowe oko itunda ni kubi? ⁵ A no kufa kama angangama, mushino meyi ni mushimo eyi iyoya mo. ⁶ Sibaka sa ano kufa kame simanahalelela balubala lwae, kame kakwisa esi si musindela ku ngulwa. ⁷ Kama alolela mutulo ba sibaka no mukungulu, kame kama atuleka e litunga beulu no kwaasa sinu. ⁸ Kama wameka a meyi mu makumbi ae no mukita; kono a makumbi kakayulwa ni kulema kwa meyi. ⁹ Kame ashweka o lubala no lubona lwae, kame kama lifuka ni likumbi lyae. ¹⁰ Kame ana kupolosa sibaka no meyi ni ndinda, kusiyende kamiinji, oko ku kuwanene liseli ni lififi. ¹¹ Misumo no liwilu kame inganganya, kame itilimuka, Mulimu aba ikalimela. ¹² Mu maata ae kame atuleka a mandinda no liwate, kame mu kutweba kwae kama akwisa kutulekwa no mandinda ni onyene. ¹³ Kuyoyaela kwae kame kukenisa e liwilu, e likaa lyae kame liyaa Drakone no situnu. ¹⁴ Simba mumona ngeso eyi ni inu ikalile kunyonga no tindila tae, mu matwi etu kame tuyupa mulimo no kucaniba feela wayo; kono nji ko mushika no maata ae, oyu so ta kuiyupisisa ni anyine?