¹ Kwaamba kuna kutambula Zofari no ku Naama nji, ² ''Muyaambo eyo, e kalabo kame ana kwiwana mu mayambuto ano mu mucima wange, kame ni palelwa okule kame ni leluba ku kwaamba,'' ³ Sina kuyupa e tikalimelo no kwenisa, kono tingana ni kuyupisisa kwange ni yonyene iniba e kalabo. ⁴ Kakuli kana silemuba kale kutunda munu abana bekiwa mu litunga. ⁵ Nji o kula kwa oyuno kwiiba kame kubwa nawangu, ni nji kuwabelwa kwa oyu wa cili Mulimu ni kwa nako inyonyo feela? ⁶ Kuneneba kwae simba kubita ku liwilu, o mutwi wae kame ukabita ku makumbi. ⁷ Simbangeso kame ata kubwa omo kuna kubwela eyae, ama ku mumonanga kame ata kwaamba nji, ''Okwaali?'' ⁸ Kame ata kutukela kule kwanyi e tolo, kame kaata ku monwa ee, kame ata kulikelela kwanyi e pono no usiku nokutulo. ⁹ A miyo ana ku mumonanga kaata ku mumona kame, ni sibaka sae kasita ku mumona, kuta kutelela. ¹⁰ Anae kame ata kukomiwa kwa fuzana, makaa ae alite oubufumu wana kuwana. ¹¹ Ifuba yae nai kuongola ni maata ano undumbana, kono kame ata kulangana nae mu likungu. ¹² Kwiiba kame kuna kumamata mu kanwa kae, kame ana ku ushweka kushi no lulimi lwae. ¹³ Naku ukatwa na kukana kwiisha mukaci ni onyene, mane na kuuteula mu mitahali yae. ¹⁴ Kone he, eilya eyo mu mila yae kame sita kubiluka sifamu no tinyoka kwa yonyene. ¹⁵ Oufumu ama kumina, kame ata ku ulusa; Mulimu kame ata utundisa mu lipumo lyae. ¹⁶ Yonyene kame ata kuyamwa e sifanu no tinyoka, elilimi no sibibi li mwibae. ¹⁷ A miyo ae kaata kumona maeti kame, milapo ni tweetinyana omo kuma kukuka uki ni mawe. ¹⁸ Kakuli esi ana okukataleza kusiwana kame ata kusiusa, alese kusiteula, kame ata kuusa eyi ana okuuyela yoshe, alese o kukola yo. ¹⁹ Kakuli na kukoma anjebwa kwa aala nji kasasinu, na kulondela e tindoo ta si yaka. ²⁰ Kakuli katwesa kupumena kwa esi ana kulema, kame ata kupalelwa kuteula esana kusaela. ²¹ Kame kakuli kasiya sinu kwainu ana kumina, wiketo wae kauta kuongola. ²² Simba ana kutwaelwa ni maluo, kame ata kwiikala mu unjebwe, makaa a ano kuyanda oshe kame ata kumulema. ²³ Munako ana kusaela kwiiyata e lipumo lyae, Mulimu kame ata ku mulenga ni kutweba kunene kwae, amu lenge kwanyi mbula yolemine kulya. ²⁴ Kama ata kucila kwa uyo alemine eyi lwiso no sipi; kono oyuno buta bwa kopa kame ata kumuyaa kumupuluteza. ²⁵ A comole e lisho mu mwiili wae; mane e liyulu lyayo i mwaka li tuunde mu nyoko yae, o luwewe kame lumulemine. ²⁶ Lififi linene kame lilukesezwe eyae no utokwa, o mulilo wasi tumbulwa kwa munu, kame uta ku mucina, u cinelele niesi sina kusiyala soshe mu tende yae. ²⁷ Liwilu kame lita kupatulula o kwiiba kwae, elitunga limane ku mu munjula. ²⁸ Oufuma no mundoo yae kame uta ku hasanyiwa, etutu yae ibwelele, mu liywao no kutweba kwa Mulimu. ²⁹ Nisonyene e sanda no munu no kwiiba esi kame situnda kwa Mulimu, ni saanda ana kuwiba kwa Mulimu.