¹ Uusalanganya aleninika ukwisa kuli webo. Linda ilinga lya musumba, lolekesha inshila, kakisha imishipi yobe, longanika amaka yobe yonse. ² Pantu Yawe alebwesha ubupulami bwakwa Yakobo, ngo bupulami bwakwa Israeli, nangu abakukufya balibakufishe nokubowila imisambo ya myangashi. ³ Inkwela sha baume bakwe ababulamba nashika shika, kabili abashilika ba nkondo nabafwala ifyakashika ce; amaceleta yalebyata ne fyela fyayako pa bushiku bulya yali ayapekanishiwa kubulwi kabili imifwi yakosa ilelelemfiwa mu mwela. ⁴ Amaceleta yalebutukisha mu misebo; nayabilingana ukuya nokubwela mu musebo iya pabuka. Yalemoneka nge myenge yamulilo, yalebutuka nge nkuba. ⁵ Uukakuposa mufipimfya aita bacilolo bakwe; baya baleimpunkaula mukwenda kwabo. Icakucingamamo capekanishiwa kukucingilila abalesansa. ⁶ Impongolo pa mimana shaisulwa kumaka, na kwisano kwabongoloka. ⁷ Hussabu afuulwa nokusendwa; nababomfi bakwe abanakashi balelosha nge nkundo, baleumaula napa mabele yabo. ⁸ Ninife ali kwaticishiba cilesumya amenshi nabantu bakwe balefulumuka nga menshi aya pongololwa. Bambi balepunda abati, ''Iminineni, iminineni,'' leelo tapali nangu umo uulebweluluka. ⁹ Batapeni Silifere, batapeni golide, pantu takuli impela ku fyuma, kufyabukata ifyawamisha fyonse ifya kwa Ninife. ¹⁰ Ninife takwate kantu. Watapwa nokuba amapopa umutima onse wasunguluka, namakufi ya muntu onse yapompontenka, nokushikitika kuli mumisansa yonse; ifinso fyabo na fiwa. ¹¹ Nikwi nomba ukuti ninga ya nkalamo incende uko abana ba nkalamo ishilume ne shikota shaleendauka notwana twashiko, uko tashaletina akali konse? ¹² Inkalamo yasantawile ifyo yakumenye mufipimfya mukupekanishisha utwana twaiko; ifyo yakumenye yaikatile iyikota yaiko nokwisusha umwimba, ininga yaiko yaiswilemo imipusa yanama. ¹³ "Mona, ine ninkwalukila--ubu bukombe bwakwa Yawe wa milalo. Nkoca amaceleta yenu mu cushi, no lupanga lukalya utwana twankalamo tobe. Nkaputulako icakulya cena mwatapile nkacifumyapo mu calo cenu, na mashiwi yankombe shenu tayakomfwike nakabili.''