¹ Yawe alandile kuli Mose na Aaroni, atile, ² ''Landa kubana ba Israeli, no kutila kuli bena. Ilyo umwaume nakwata ifileswa ukufuma mu mubili wakwe, aba awakowela. ³ Ukukowela kwakwe nipa mulandu wafileswa. Nangu cakuti umubili wakwe uleswa nangu walileka, ninshi alikowela. ⁴ Ubusanshi bonse ubo uyu muntu alelepo buli ubwakowela, nafyonse ifyo acikalapo fili ifyakowela. ⁵ Uyo onse uwaikata pa busanshi bwakwe afwile ukucapa ifyakufwala na ukuisambika umwine mu menshi, nokuba uushasanguluka mpaka icungulo. ⁶ Uuli onse uwaikala pacili conse ico umuntu uulepompa acikala, ulya muntu afwile ukuwasha ifyakufwala fyakwe na ukusamba umwine mu menshi, kabili akaba uushasanguluka mpaka icungulo. ⁷ Uyo onse uwaikata umubili uwa muntu uuli nefilepompa afwile ukucapa ifyakufwala fyakwe nokuisambika umwine mu menshi, nokuba uushasanguluka mpaka icungulo. ⁸ Nga cakuti umuntu uuli nefyo ifilepompa aikala nowasanguluka, kabili ulya muntu afwile ukuwasha ifyakuwala fyakwe nokuisambika umwine mu menshi, nokuba uushasanguluka mpaka icungulo. ⁹ Indiato shonse isho umuntu uuli nefilepompa aendelamo fikaba ifyakowela. ¹⁰ Eco ilyo waikata icili conse icili pali ifi ulya muntu akaba uushasanguluka mpaka icungulo, naonse uwasenda ifyo fyonse afwile ukucapa ifyakufwala fyakwe nokusamba umwine mu menshi; akaba uushasanguluka mpaka icungulo. ¹¹ Uyo onse muntu uwaikata ukwabula ukusamba iminwe yakwe na menshi afwile ukucapa ifyakufwala fyakwe nokusamba umwine mu menshi, akaba uushasanguluka mpaka icungulo. ¹² Impoto yonse iyebumba iyo umuntu uuli nefilepompa aikatako ifwile ukutobaulwa, na conse icakutapilamo amenshi icacimuti cifwile ukucisuka bwino bwino mu menshi. ¹³ Ilyo uuli nefilepompa asangululwa ukufuma kufilepompa, afwile ukuipendela umwine inshiku cine lubali pakusangululwa kwakwe; kabili afwile ukucapa ifyakufwala fyakwe nokusambika umubili wakwe mu menshi ayalepita. kabili akaba uwasanguluka. ¹⁴ Pabushiku bwa lenga cine konse konse afwile asenda inkunda shibili nangu utwana twa fipele tubili nokwisa kuntanshi yakwa Yawe pa mwinshi ye tenti lya kukumaninamo; kulya afwile apeela ifyoni kuli shimapepo. ¹⁵ Shimapepo afwile afitula, cimo nge cabupe ca lubembu cimbi naco nge cabupe cakooca, nashimapepo afwile apanga icikonsolwelo pali ena ku ntanshi yakwa Yawe pafilepompa fyakwe. ¹⁶ Nga umuntu onse uwamwaume apemuna panshi, afwile ukusamba umubili onse mu menshi; akaba uwakowela mpaka icungulo. ¹⁷ Onse umwingila nangu insalu yampapa ico umuntu apemenapo cifwile ukucapwa na menshi; cikaba icakowela mpaka icungulo. ¹⁸ Nga cakuti umwaume alala nomwanakashi elyo kwaba ukupema, bonse bafwile ukusamba na menshi nokuba abashasanguluka mpaka icungulo. ¹⁹ Umwanakashi nga aba kumpepo, ukukowela kwakwe kuli nokuba inshiku cine lubali, naonse uwamwikata ali nokuba uushasanguluka mpaka icungulo. ²⁰ Pali conse ico alalapo mu nshiku shamwenshi wakwe fikaba ifyakowela; pali conse ico aikalapo nacena cikaba icakowela. ²¹ Uyo onse uwaikata pabusanshi bwakwe afwile ukucapa ifyakufwala fyakwe nokusamba umwine mu mesnhi; ulya muntu akaba uwakowela mpaka icungulo. ²² Uuli onse uwaikata icili conse ico ekelepo afwile acaapa ifyakufwala fyakwe nokuisambika umwine mu menshi; ulya muntu akaba uwakowela mpaka icungulo. ²³ Ciibe cili pabusanshi nangu pali conse ico ekelepo, nga acikata, ulya muntu akaba uwakowela mpaka icungulo. ²⁴ Nga umwaume onse alala nankwe, nokukowela kwa mwanakashi kwamwikata, akaba uushasanguluka pa nshiku cine lubali. Pali bonse ubusanshi ubo alalapo bukaba ubwakowela. ²⁵ Nga umwanakashi uulepompa umulopa pa nshiku ishingi ishishili sha mumwenshi wakwe, nangu cakuti alepompa ukucila mu nshita ya mwenshi wakwe, munshita yaishi nshiku sha kupompa ishamwenshi wakwe, akaba ngefyo aba ku mpepo. ali uushasanguluka. ²⁶ Pabusanshi bonse ubo alelepo mu nshita yakupompa kwa mulopa pakaba kuli ena nga pabusanshi apo alala mu nshita yakumwenshi, naconse ico ekelepo cikaba icakowela, ngefyofye cikowela ilyo ali ku mpepo. ²⁷ Uuli onse uwaikata ifyo fyonse akaba uushasanguluka; afwile ukucapa ifyakufwala fyakwe nokusamba umwine mu menshi, kabili akaba uwakowela mpaka icungulo. ²⁸ Lelo nga awamishiwa ukupompa kwa mulopa, elyo afwile aipendela inshiku cine lubali, napanuma yaifyo akaba uwasanguluka. ²⁹ Pabushiku bwa lenga cine konse konse akabule inkunda shibili nangu utwana twa fipele tubili nokuleta kuli shimapepo pa mwinshi we tenti lyakukumaninamo. ³⁰ Shimapepo akatula icuni cimo nge cabupe ca lubembu nacimbi nge cabupe cakooca, kabili akapanga icikonsolwelo pali ena kuntanshi yakwa Yawe palwa kukowela kwakwe palwa kupompa. ³¹ Ifi efyo mufwile mwapatulula abena Israeli ukufuma mukukowela kwabo, pakuti tabafwile kumulandu wakukowela kwabo, pakukowesha itenti lyandi, ilyaba muli bena. ³² Ifi efyakukonka pali onse uulepompa, pa mwaume onse uulepemena panse nokumulenga ukukowela, ³³ pa mwanakashi onse uuli ku mwenshi, pauli onse uuli nefilepompa, cibe mwaume nangu mwanakashi, napamwaume onse uwalala nomwanakashi uuli uwakowela.''