¹ Ifi efyalembwa muluko lwakwa Adamu. Mubushiku Lesa abumbile umutundu wamuntunse, ababumbiile mu cimpasho cakwe. ² Umwaume na umwanakashi efyo ababumbile, ali bapalile nokubenika abantunse ilyo ababumbile. ³ Ilyo adamu aikele imyka umwanda umo na makumi ya tatu, elyo aishile kwata umwana umwabela ukumoneka kwakwe, panuma cipansho cakwe amwinike ishina lyakwe Sete. ⁴ Panuma Adamu aishileba wishi wakwa Sete, aikele imyaka cine konse konse. Aishileba wishi wabana abengi abaume na banakashi. ⁵ Adamu aikele imyaka imyanda pabula namakumi yatatu, elyo afwile. ⁶ Ilyo Sete aikele imyaka umwanda umo na isano, aishileba wishi wakwa Enoshe. ⁷ Panuma yakuba wishi wakwa Enoshe, aikele imyaka imyanda cine konse konse na cine lubali nokwisaba wishi wa bana abengi abaume na banakashi. ⁸ Sete aikele imyaka imyanda pabula nekumi na ibili, elyo afwile. ⁹ Ilyo Enoshe aikele imyaka pabula, aishileba wishi wakwa Kenani. ¹⁰ Panuma ya kuba wishi wakwa Kenani, Enoshe aikele imyaka imyanda cine konse konse nekumi naisano. Aishileba wishi wabana abengi abaume na banakashi. ¹¹ Enoshe aikele imyaka imyanda pabula naisano, elyo afwile. ¹² Ilyo Kenani aikele imyaka amakumi cine lubali, aishileba wishi wakwa Mahalale. ¹³ Panuma yakuba wishi wakwa Mahalale, Kenani aikele imyaka imyanda cine konse konse na makumi yane. Aishileba wishi wabana abengi abaume nabanakashi. ¹⁴ Kenani aikele imyaka imyanda pabula nekumi, elyo afwile. ¹⁵ Ilyo Mahalale aikele imyaka amakumi mutanda naisano, aishileba wishi wakwa Jaredi. ¹⁶ Panuma yakuba wishi wakwa Jaredi, Mahalale aikele imyaka imyanda cine konse konse namakumi yatatu. Aishileba wishi wabana abengi abaume nabanakashi. ¹⁷ Mahalale aikele imyaka imyanda cine konsekonse na pabula naisano, elyo afwile. ¹⁸ Ilyo Jaredi aikele imyka umwanda umo na makumi mutanda na ibili, aishileba wishi wakwa Enoke. ¹⁹ Panuma yakuba wishi wakwa Enoke, Jaredi aikele imyaka imyanda cine konsekonse. Aishileba wishi wabana abengi abaume na banakashi. ²⁰ Jaredi aikele imyaka imyanda pabula na makumi mutanda naibili, elyo afwile. ²¹ Ilyo Enoke aikele imyaka amakimi mutanda na isano, aishileba wishi wakwa Metusela. ²² Enoke aleenda na lesa imyaka imyanda itatu panuma aishileba wishi wa kwa Metusela. Aishileba wishi wa bana abengi abaume nabanakashi. ²³ Enoke aikele imyaka imyanda itatu namakumi mutanda na isano. ²⁴ Enoke aleenda na Lesa, kabili alile, pantu Lesa ali musendele ena. ²⁵ Ilyo Metusela aikele imyaka umwanda umo nacine konsekonse na cine lubali, aishileba wishi wakwa Lameki. ²⁶ Panuma yakuba wishi wakwa Lameki, Metusela aikele imyaka imyanda cine lubali na makumi cine konse konse naibili. Aishileba wishi wabana abengi abaume nabanakashi. ²⁷ Metusela aikele imyaka imyanda pabula na makumi mutanda na pabula. Elyo afwile. ²⁸ Ilyo Lameki aikele imyaka umwanda umo na makumi cinekonse konse naibili, aishileba wishi wa mwana umwaume. ²⁹ Amwinike ishina lyakwe Naoh, alandile, ''Uyu eukatupela ukutusha ukufuma kukubomba kwesu na kubukali ubwacilisha kuminwe yesu ngefyo twacitile pamulandu wa mushili Yawe atipile.'' ³⁰ Lameki aikele imyaka imyanda isano na makumi pabula na isano panuma aishileba wishi wakwa Noah. Aishileba wishi wa bana abengi abaume na banakashi. ³¹ Lameki aikele imyaka imyanda cine lubali na makumi cine lubali na cine lubali. ³² Panuma Noah aikele imyaka imyanda isano, aishileba wishi wakwa Sheme, Hamu na Yafete.