Ke'e eiy ni Empung Yesus ¹ Laa o sia tumuru’la wia niaku en temberan e rano patou-touan, e leno tanu mokan eng Kristal, wo e maso’oso’ mekaluari waki takhta ni empung wo waki takhta ni Oki’ ni Domba i ti’i. ² Witu eng keuneran e lalan kota i ti’i, nyi’a i ti’i witu e lewet-lewetna en temberan i ti’i, wawean e nakana-nakana em patou-touan e mawu’ala maka mapulu o rua, susur en sumedot mekasa; wo laleiyna e nakana-nakana i ti’i em paken kaa laa melele’osla se bangsa-bangsa. ³ Takar e reiy’ mouw laa wawean kasi si kinutok. En takhta ni Empung wo en takhta ni Oki’ ni Domba e laa wawean witu eng goremna wo se hamba-hamba-Na se laa rumaghes wia-Nisia, ⁴ Wo nisea se laa lumoo’ eng gio-Na, wo e ngaran-Na e laa i patik witu en tuintung nea. ⁵ Wo em bengi e reiy’ mouw laa wawean kasi maname, wo nisea se reiy’ mepadungla en terangna en solo wo en terangna ni endo, karengan si Empung Tuhan si laa tumerangla nisea, wo nisea se laa merenta tanume si raja i ka’ayo eng keure-urena. ⁶ Laa o Sia lumila’ wia niaku: “E lelila’an-lelila’an i yi’i e minakatena’ wo e nulit, Wo si Tuhan, Empung si minee e roh wia se nabi, si timoke mouw si malaikat-Na kaa laa tumuru’la wia se hamba-hamba-Na sapa e lewo’ sa reiy’ makarengan mamuali.” ⁷ “Eng kaulitna Niaku ku makarengan meiy. Ma’aruiyola se tou maki’itla e lelila’an-lelila’an e wenti’ eng kaol i yi’i!” ⁸ Wo niaku, si Yohanes, niaku mouw si liminga mola wo limoo’ em baya nyi’a i ti’i. Wo nu reiy’ mouw niaku nu limingala wo limoo’ nyi’a, niaku ku neiy i kasungkur witu en saruan e ne’a ni malaikat, si timuru’ mola em baya nyi’a i ti’i wia niaku, kaa laa mesesempe nisia. ⁹ Ta’an nisia si limila’ wia niaku: “Te’a masiwo en tuana! Niaku nyi’a mouw si hamba, masuat tanu nikoo wo se patuari-patuarimu, se nabi wo nisea nu waya se maki’itla e reiy’ sa mina’asa lelila’an eng kaol i yi’i. Sempenou si Empung!” ¹⁰ Laa o sia lumila’ wia niaku: “Te’a mewewa’ilela e lelila’an-lelila’an e wenti’ witu eng kaol i yi’i, karengan e nedona en tawi mouw. ¹¹ Seiy i te si sumiwo lewo’, i waya mola sia mapawee-weela masiwo lewo’; seiy i te si sa’amek, i waya mola sia mapawee-weela sa’amek; wo seiy i te si ulit, i waya mola sia mapawee-weela masiwo eng kaulitan; seiy i te si kudus, i waya mola sia mapawee-weela makudusla en touna!” ¹² “Eng kaulitna Niaku ku makarengan meiy wo Niaku ku maali-ali en tetoro-Ku kaa laa mesesuli’la wia se susur tou i ki’it em pasiwo-siwonna. ¹³ Niaku nyi’a mouw si Alfa wo si Omega, Si Kasaketare wo Si Kasakamurian, Si Ketareani wo Si Kesampetan.” ¹⁴ Ma’aruiyola nisea se minoas eng karaiyna. Nisea se laa maka’ato eng hak witu e nakana-nakana em patou-touan wo ghumorem tumorola em pepalen-pepalen leloangan o mea witu eng gorem eng kota i ti’i. ¹⁵ Ta’an se asu-asu wo se menenihir-menenihir, se tou-tou sa’amek, se tou-tou mememunu’, se sumesempe-sumesempe berhala wo susur tou se meupusla en towo wo se timuanala nyi’a, mena’ witu luar. ¹⁶ “Niaku, si Yesus, timoke mouw si malaikat-Ku kaa laa mee kasairian en tanume em baya nyi’a i yi’i wia nikoo i wee se jema’at-jema’at. Niaku nyi’a mouw si suruna, nyi’a i ti’i si see’ ni Daud, sumesena’ en sendangan si masena’ maserengat.” ¹⁷ E Roh wo si beroit i ti’i se limila’: “Meiy mouw!” Wo seiy i te si luminga nyi’a, satorona nisia si lumila’: “Meiy mouw!” Wo seiy i te si re’o, satorona nisia si meiy, wo seiy i te si pa’ar, satorona nisia si medo rano em patou-touan ampit ni’i taber i te! ¹⁸ Niaku ku mesairi wia se susur tou liminga e lelila’an-lelila’an e wenti’ witu eng kaol i yi’i: “Sa siesa tou si mawesla wo’o sapa witu e lelila’an-lelila’an i yi’i, takar si Empung si laa mawesla wia nisia eng kacilaka’an-kacilaka’an neiy i kepatik witu eng kaol i yi’i. ¹⁹ Wo sa wona’ siesa tou si kumurangla wo’o sapa witu e lelila’an-lelila’an witu eng kaol e wenti’ i yi’i, takar si Empung si laa medo e wetengna waki akana em patou-touan wo e waki kota kudus, tanu neiy i kepatik witu eng kaol i yi’i.” ²⁰ Nisia si minee kasairian tanume em baya nyi’a i yi’i, si minee nuwu’: “Iyon, Niaku ku makarengan meiy!” Amin, meiy mouw, Tuhan Yesus! ²¹ E nupus karunia ni Tuhan Yesus e rumapitla nikouw nu waya! Amin.