Langit weru wo em bumi weru ¹ Laa o ku lumoo’ e langit weru wo em bumi weru, karengan e langit kasa ketare wo em bumi kasa ketare e limeasouw, wo en tasik tu’u e reiy’ mola kasi. ² Wo niaku ku limoo’ eng kota kudus, Yerusalem weru, en timumpami waki sorga, waki si Empung, si lino’or tanu mokan si beroit simudeiy i wee si tu’atuamana ³ Laa o ku luminga en suara menaleinteng waki takhta i ti’i e meila’: “Loo’onouw, en dasing ni Empung em bitu mouw eng keuneran ne tou wo Nisia si laa mena’ mewali-wali ampit nisea. Nisea se laa mamuali umat-Na wo Nisia si laa mamuali Empung nea. ⁴ Wo Nisia si laa rume’ila e reiy’ sa mina’sa lue’ witu em beren nea, wo e maut e reiy’ mouw laa wawean kasi; e reiy’ mouw laa wawean kasi em paeruran pinatean, ka’apa e narip e name’, ka’apa e mengasi’, karengan e reiy’ sa mina’asa wo’o sapa e nure i ti’i e limeasouw.” ⁵ Nisia si rimuber witu natas en takhta i ti’i si limila’: “Loo’onouw, Niaku ku simiwola e reiy’ sa mina’asa wo’o sapa weru!” Wo e nuwu’-Na: “I patikola, karengan e reiy’ sa mina’asa lelila’an i yi’i nyi’a mouw e minakatena’ wo e nulit.” ⁶ E nuwu’-Na kasi wia niaku: “Em baya nyi’a e minamuali mouw. Niaku nyi’a mouw si Alfa wo si Omega, Si Ketareani wo Si Kesampetan. Sitou re’o si laa Kuweean kumoo’ ni taber i te waki kembu’an e rano petou-touan. ⁷ Seiy i te si minuntung, nisia si laa maka’ato em baya nyi’a i yi’i, wo Niaku ku laa mamuali Empungna wo nisia si laa mamuali oki’-Ku. ⁸ Ta’an se tou-tou toroide’, se tou-tou reiy’ ma’eman, se tou-tou keji, se tou-tou memunu’, se tou-tou sa’amek, se meneniwo-meneniwo en sihir, se sumesempe-sumesempe berhala wo em baya ne menenowo, nisea se laa maka’ato e weteng nea witu eng gorem e lawanan melaya-layas kaa e napi wo em balelang; nyi’i mouw em patean karua.” ⁹ Takar meiy mouw siesa tou waki se pitu malaikat timiboiy em pitu kower, wuta ampit em pitu kacilaka’an kesampetan i ti’i, laa o sia lumila’ wia niaku, pokeiyna: “Meiy mouw wia nyi’i, niaku ku laa tumudu’la wia nikoo si beroit, beroit ni Oki’ ni Domba.” ¹⁰ O laa, witu e roh sia mali niaku minatas waki e nesa kuntung wangko’ e rakeke’ kasi wo nisia si timudu’la wia niaku eng kota kudus i ti’i, e Yerusalem, en timumpami waki sorga, waki si Empung. ¹¹ Eng kota i ti’i e wuta ampit eng kalo’oran ni Empung wo en sena’na masuat tanu em permata kasa wangun, tanu mokan em permata yaspis, e leno tanu eng Kristal. ¹² Wo em betonna e wangko’ rakeke’ kasi wo em pepalen leloanganna e mapulu’ o rua; wo witu natas em pepalen-pepalen e leloangan i ti’i wawean se mapulu’ o rua malaikat wo witu natasna neiy i kepatik e ngaran ne mapulu’ o rua suku Israel. ¹³ Waki esa nga weka sendangan niatoan en telu pepalen leloangan wo waki esa nga weka amian en telu pepalen leloangan wo waki esa nga weka timu en telu pepalen leloangan wo waki esa nga weka talikuran en telu pepalen leloangan. ¹⁴ Wo em beton kota i ti’i e makapunya mapulu’ o rua watu to’otolan wo witu natasna neiy i kepatik e mapulu’ o rua ngaran ne mapulu’ o rua rasul ni Oki’ ni Domba i ti’i. ¹⁵ Wo nisia, si menusu-nusuiy ampit niaku, si makapunya e nesa diki-diki mas i peukur kaa laa me’ukur eng kota i ti’i ma’an em pepalen-pepalen leloanganna wo em betonna. ¹⁶ Eng kota i ti’i en tempa paloo’on, eng kelabotna masuat ampit eng kapenarna. Wo nisia si minukur eng kota i ti’i ampit en diki-diki i ti’i: e mapulu’ o rua nga riwu stadia; eng kelabotna wo eng kapenarna wo eng kerakekna masuat. ¹⁷ Laa o sia mukur em betonna: esa nga atus epat nga pulu o epat hasta, i ki’it e nukuran ni tou, nyi’a mouw kangkasi e nukuran ne malaikat. ¹⁸ Em beton i ti’i em permata yaspis o siwon; wo eng kota i ti’i nuesa e mas tulen, en tanu mokan eng kaca murni. ¹⁹ Wo en to’otolan-to’otolan em beton eng kota i ti’i e lino’orla ampit e reiy’ sa mina’asa jenis permata. En to’otolan kasa ketare e watu yaspis, en to’otolan karua e watu nilam, en to’otolan katelu e watu mirah wo en to’otolan kaepat e watu zamrud, ²⁰ en to’otolan kalima e watu unam, en to’otolan kaenem e watu sardis, en to’otolan kapitu e watu ratna campaka, eng kauwalu e watu beril, eng kasiouw e watu krisolit, eng kapulu’ e watu krisopras, eng kapulu’ o esa e watu lazuardi wo eng kapulu’ o rua e watu kecubung. ²¹ Wo e mapulu’ o rua pepalen leloangan i ti’i nyi’a mouw e mapulu’ o rua mutiara: susur em pepalen leloangan en timo’otoli witu e nesa mutiara wo e lalan-lalan eng kota i ti’i e mas murni tanu mokan eng kaca leno. ²² Wo niaku ku reiy’ limoo’ em Bait Suci witu eng gorem nyi’a; karengan si Empung, Tuhan Si Kasakuasa, nyi’a mouw si Bait Sucina, tuanakan kangkasi si Oki’ ni Domba i ti’i. ²³ Wo eng kota i ti’i e reiy’ mepadungla si endo wo si sumedot kaa meteterangla nyi’a, karengan eng kalo’oran ni Empung en timerangla nyi’a wo si Oki’ ni Domba i ti’i nyi’a mouw si solona. ²⁴ Wo se bangsa-bangsa se laa kumelang witu en terangna wo se raja-raja wia em bumi se mali eng kakaya’an nea witu nyi’a; ²⁵ wo em pepalen-pepalen leloanganna e reiy’ laa kusi’in witu e nendo oat, karengan e wengi e reiy’ mola kasi maname; ²⁶ wo eng kakaya’an wo e normat ne bangsa-bangsa e laa alin wia nisia. ²⁷ Ta’an e reiy’ laa ghumorem witu nyi’a e wo’o sapa e najis, ka’apa sitou si simiwola eng kakejian ka’apa towo, ta’an nisea i te e ngaranna neiy i kepatik witu eng kaol em patou-touan ni Oki’ ni Domba i ti’i.