Karaja’an esa nga riwu nge te’un ¹ Laa o ku lumoo’ siesa malaikat timumpami waki sorga si timiboiy eng kekusi’ temping e maut wo e nesa rante wangko’ witu e lawasna; ² nisia si simikop si naga, leloiy’ tu’a i ti’i, nyi’a i ti’i si Iblis wo si setang. Wo nisia si mina’akes nisia esa nga riwu nge te’un eng keurena, ³ laa o lumawala nisia witu en temping e maut, wo kumusi’ en temping e maut i ti’i wo meela wa’il nyi’a witu natasna, rio sia te’a kasi sumeipla se bangsa-bangsa, nu reiy’pe’ simampet e masa esa nga riwu nge te’un i ti’i; kamurian witu e ni’itu nisia si laa i reta’lai wee en toyo’ nedo eng keurena. ⁴ Laa o ku lumoo’ en takhta-takhta wo se tou-tou rimuber witu natasna; wia nisea se sinarakanala eng kuasa kaa laa ma’akimla. Niaku kangkasi ku limoo’ se imukur-imukur nea, em pinanggalouw eng kokongna karengan eng kasairian nea tanume si Yesus wo karengan e nuwu’ ni Empung; se reiy’ masempe si tekapen i ti’i wo em patongna wo se reiy’ kangkasi simungkul eng kowa’na witu en tuintung wo e lawas nea; wo nisea se timou sumeup wo maperenta tanume si raja mewali-wali ampit si Kristus lumaa esa nga riwu nge te’un. ⁵ Ta’an se tou-tou minate walina se reiy’ timo’or nu reiy’pe’ kimawus e masa esa nga riwu nge te’un i ti’i. Nyi’i mouw eng kineteto’or kasa ketare. ⁶ Ma’aruiyouw wo kudusouw sia, si minaka’ato weteng witu eng kineteto’or kasa ketare i ti’i. Pinatean eng karua e reiy’ mouw makakuasa kasi witu nisea, ta’an nisea se laa mamuali imam-imam ni Empung wo ni Kristus, wo nisea se laa merenta tanume si raja mewali-wali ampit Nisia, esa nga riwu nge te’un eng keurena. ⁷ Wo e masa esa nga riwu nge te’un i ti’i nu simampetola, Iblis si laa i reta’mi waki penjarana, ⁸ wo nisia si laa mea sumeipla se bangsa-bangsa witu e nepat ruuna em bumi, nyi’a i ti’i si Gog wo si Magog, wo merurla nisea kaa laa sumeke’ wo eng kelaker nea masuat ampit eng kelakerna e neris waki tasik. ⁹ Takar lumongkotouw sea mea waki e minapekasa nataran em bumi, laa o kumepung en dinasingan ne suraro ne tou-tou kudus wo eng kota neiy i koupusla i ti’i. Ta’an waki langit tu tumumpa momi e napi o rumengisla nisea, ¹⁰ wo si Iblis, si simeipla nisea, si neiy i lawala witu eng gorem e lawanan napi wo em balelang, nyi’a i ti’i en tampa ni tekapen wo ni nabi palsu i ti’i, wo nisea se pasiksan oat o wengi i ka’ayo eng keure-urena. ¹¹ Laa o ku lumoo’ e nesa takhta puti’ wangko’ wo Nisia, si rimuber witu natasna. Witu en sinaru-Na o ma’apula em bumi wo e langit wo reiy’ mouw kinia’atoala kasi en tampana. ¹² Wo niaku ku limoo’ se tou-tou minate, sela o rintek se rimedeiy witu en sinaru en takhta i ti’i. Laa o wuka’an em baya eng kaol. Wo winuka’ kangkasi e nesa kaol walina, nyi’a i ti’i eng kaol em patou-touan. Wo se tou-tou minate se niakimla i ki’it em pasiwo-siwon nea, timo’otol witu en sapa neiy i kepatik witu eng kaol-kaol i ti’i. ¹³ Takar en tasik en simarakanla se tou-tou minate witu eng goremna, wo e maut wo eng keraja’an maut en simarakanla se tou-tou minate witu eng goremna, wo nisea se niakimla siesa o siesa i ki’it em pasiwo-siwon nea. ¹⁴ O laa e maut wo eng keraja’an maut i ti’i neiy i lawala witu e lawanan napi. Ni’itu mouw em patean karua: e lawanan napi. ¹⁵ Wo susur tou e ngaranna reiy’ niatola neiy i kepatik witu eng kaol em patou-touan i ti’i, nisia si’i lawala witu eng gorem e lawanan napi i ti’i.